ಶ್ರೀನಗರ: ಭಯೋತ್ಪಾದನೆ ತೊರೆದು ಹೆಂಡತಿ ಮಕ್ಕಳೊಂದಿಗೆ ತನ್ನ ಪಾಡಿಗೆ ತಾನು ಜೀವನ ನಡೆಸುತ್ತಿದ್ದ ಮಾಜಿ ಉಗ್ರಗಾಮಿಯೊಬ್ಬನನ್ನು ಭಯೋತ್ಪಾದಕರು ಗುಂಡಿನ ದಾಳಿ ನಡೆಸಿ ಕೊಂದು  ಹಾಕಿರುವ ಘೋರ ಘಟನೆ ಜಮ್ಮು ಮತ್ತು ಕಾಶ್ಮೀರದ ಸೋಪೊರ್ ನಲ್ಲಿ ನಡೆದಿದೆ.

ಬಾರಾಮುಲ್ಲಾದ ಜಿಲ್ಲೆಯ ಸೋಪೊರ್ ಗ್ರಾಮದಲ್ಲಿ ಈ ಘಟನೆ ಸಂಭವಿಸಿದ್ದು, 36 ವರ್ಷದ ಬಷೀರ್ ಅಹ್ಮದ್ ಭಟ್ ಮತ್ತು ಆತನ 3 ವರ್ಷದ ಪುಟ್ಟಮಗನನ್ನು ಭಯೋತ್ಪಾದಕರು ಕೊಂದು  ಹಾಕಿದ್ದಾರೆ. ಮೂಲಗಳ ಪ್ರಕಾರ ಬಷೀರ್ 15 ವರ್ಷಗಳ ಹಿಂದೆ ಭಯೋತ್ಪಾದಕ ಚಟುವಟಿಕೆಯಲ್ಲಿ ನಿರತನಾಗಿದ್ದ. ಆದರೆ ಪ್ರಸ್ತುತ ತನ್ನ ಎಲ್ಲ ಸಾಮಾಜ ಬಾಹಿರ ಚಟುವಟಿಕೆಗಳನ್ನು ನಿಲ್ಲಿಸಿ  ತನ್ನದೇ ಒಂದು ಅಂಗಡಿಯನ್ನು ಹಾಕಿಕೊಂಡು ವ್ಯಾಪಾರ ಮಾಡಿಕೊಂಡಿದ್ದನು ಎಂದು ತಿಳಿದುಬಂದಿದೆ.

ನಿನ್ನೆ ಸೋಪೊರ್ ಗ್ರಾಮದಲ್ಲಿರುವ ಬಷೀರ್ ಮನೆಗೆ ನುಗ್ಗಿದ ಕೆಲ ಶಂಕಿತ ಭಯೋತ್ಪಾದಕರು ಇದ್ದಕ್ಕಿದ್ದಂತೆಯೇ ಗುಂಡಿನ ದಾಳಿ ನಡೆಸಿದ್ದಾರೆ. ದಾಳಿ ವೇಳೆ ಮನೆಯಲ್ಲಿ ಬಷೀರ್ ಮತ್ತು ಆತನ 3  ವರ್ಷದ ಮಗ ಮಾತ್ರ ಇದ್ದ ಕಾರಣ ಇಬ್ಬರಿಗೂ ಗಂಭೀರ ಗಾಯಗಳಾಗಿದ್ದವು. ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಬಷೀರ್ ನನ್ನು ನಿನ್ನೆ ಆಸ್ಪತ್ರೆಗೆ ದಾಖಲಿಸುವಾಗ ಆತ ಮೃತಪಟ್ಟಿದ್ದರೆ, ಇಂದು ಆತನ  ಮಗ ಕೂಡ ಚಿಕಿತ್ಸೆ ಫಲಕಾರಿಯಾಗದೇ ಸಾವನ್ನಪ್ಪಿದ್ದಾನೆ.

ಪ್ರಸ್ತುತ ಪ್ರಕರಣ ದಾಖಲಿಸಿಕೊಂಡಿರುವ ಬಾರಾಮುಲ್ಲಾ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.