ಚೆನ್ನೈ: ತಮಿಳುನಾಡಿನಲ್ಲಿ ಆಡಳಿತಾರೂಢ ಎಐಎಡಿಎಂಕೆ ಪಕ್ಷದ ವಿರುದ್ಧ ಪ್ರಚಾರ ನಡೆಸಲು ಬ್ಲಾಗರ್ ಗಳಿಗೆ ಹಣ ಪಾವತಿ ಮಾಡುತ್ತಿದ್ದ ಪ್ರಕರಣವನ್ನು ಚುನಾವಣಾ ಆಯೋಗ ಗಂಭೀರವಾಗಿ ಪರಿಗಣಿಸಿದೆ.
ಮುಂಬೈ ಮೂಲದ ಕಂಪನಿಯ ಮೂಲಕ ಡಿಎಂಕೆ ಪಕ್ಷ ಎಐಎಡಿಎಂಕೆ ವಿರುದ್ಧ ಪ್ರಚಾರ ನಡೆಸಲು ಯತ್ನಿಸಿತ್ತು. ಮುಂಬೈ ಮೂಲದ ಕಂಪನಿ ಸರ್ಕಾರದ ವಿರುದ್ಧ ಅಂಕಿ-ಅಂಶಳನ್ನೊಳಗೊಂಡ ಇ-ಮೇಲ್ ನ್ನು ಬ್ಲಾಗರ್ ಗಳಿಗೆ ಕಲಿಸುತ್ತಿತ್ತು. ಬ್ಲಾಗರ್ ಗಳು ಬ್ಲಾಗ್ ಗಳಲ್ಲಿ ಮುಂಬೈ ಕಂಪನಿ ಕಳಿಸಿದ್ದ ಇ-ಮೇಲ್ ಮಾಹಿತಿಗಳನ್ನು ಅಪ್ ಡೇಟ್ ಮಾಡಿ ಸಾಮಾಜಿಕ ಜಾಲತಾಣಗಳ ಮೂಲಕ ಸರ್ಕಾರದ ವಿರುದ್ಧ ಪ್ರಚಾರ ನಡೆಸಬೇಕಿತ್ತು. ಇದಕ್ಕಾಗಿ ಬ್ಲಾಗರ್ ಗಳಿಗೆ ಪ್ರತಿ ದಿನಕ್ಕೆ 300 ರೂ ನೀಡುವ ಆಮಿಷವೊಡ್ಡಲಾಗಿತ್ತು. ಈ ಬಗ್ಗೆ  ದಿ ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ವಿಸ್ತೃತ ವರದಿ ಪ್ರಕಟಿಸಿತ್ತು. ವರದಿಯನ್ನು ಗಂಭೀರವಾಗಿ ಪರಿಗಣಿಸಿರುವ ಚುನಾವಣಾ ಆಯೋಗ ಆರೋಪದ ಬಗ್ಗೆ ತನಿಖೆ ನಡೆಸಲು ಸಮಿತಿ ರಚಿಸಲಾಗುವುದು ಎಂದು ತಿಳಿಸಿದೆ.
"ಈಗಷ್ಟೆ ನಮಗೆ ವಿಷಯ ತಿಳಿದಿದೆ, ಈ ಬಗ್ಗೆ ಪರಿಶೀಲನೆ ನಡೆಸಿ ಕ್ರಮ ಕೈಗೊಳ್ಳುತ್ತೇವೆ ಎಂದು ಚುನಾವಣಾ ಆಯುಕ್ತ ನಸೀಮ್ ಜೈದಿ ಹೇಳಿದ್ದಾರೆ. ಚುನಾವಣಾ ನೀತಿ ಸಂಹಿತೆಯನ್ನು ಉಲ್ಲಂಘನೆ ಮಾಡಿರುವವರ ವಿರುದ್ಧ ತನಿಖೆ ನಡೆಸಿ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ತಮಿಳುನಾಡು ಚುನಾವಣಾ ಮುಖ್ಯಸ್ಥ ರಾಜೇಶ್ ಲಖಾನಿ ಹೇಳಿದ್ದಾರೆ. ಪೇಯ್ಡ್ ನ್ಯೂಸ್ ನಂತೆ, ಬ್ಲಾಗರ್ ಗಳಿಗೆ ಹಣ ನೀಡುವ ಪೇಯ್ಡ್ ವ್ಯೂಸ್ ತಂತ್ರ ರೂಪಿಸಿರುವುದು  ಡಿಯಾ ಸರ್ಟಿಫಿಕೇಶನ್ ಆ್ಯಂಡ್ ಮಾನಿಟರಿಂಗ್ ಸಮಿತಿಯ ನಿಯಮಗಳನ್ನು ಉಲ್ಲಂಘನೆ ಮಾಡಿರುವ ಅಪರಾಧದ ವ್ಯಾಪ್ತಿಗೆ ಬರುತ್ತದೆ ಆದ್ದರಿಂದ ಈ ಬಗ್ಗೆಯೂ ಪ್ರಕರಣ ದಾಖಲಾಗುವ ಸಾಧ್ಯತೆ ಇದೆ ಎಂದು ಚುನವಾಣಾ ಅಧಿಕಾರಿಗಳು ತಿಳಿಸಿದ್ದಾರೆ.