ನವದೆಹಲಿ: ಸಿಯಾಚಿನ್ ನೀರ್ಗಲ್ಲು ಪ್ರದೇಶದಲ್ಲಿ ಹಿಮಪಾತದೊಳಕ್ಕೆ ಸಿಲುಕಿ ಜೀವನ್ಮರಣ ಹೋರಾಟ ನಡೆಸುತ್ತಿರುವ ಯೋಧ ಹನುಮಂತಪ್ಪ ಕೊಪ್ಪದ್ ಅವರ ತಾಯಿಗೆ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಭಾವನಾತ್ಮಕವಾದ ಪತ್ರ ಬರೆದಿದ್ದಾರೆ.

ಸಿಯಾಚಿನ್ ನ ನೀರ್ಗಲ್ಲಿನಲ್ಲಿ ಹಿಮಪಾತಕ್ಕೆ ಸಿಲುಕಿ ಭಾರತೀಯ ಸೇನೆಯ ಹತ್ತು ಮಂದಿ ಯೋಧರು ಸಾವನ್ನಪ್ಪಿರುವುದು ನಿಜಕ್ಕೂ ದುಃಖ ತರುವ ಸಂಗತಿ. ಆದರೂ ನಿಮ್ಮ ಪುತ್ರ ಭರವಸೆಯ ಕಿರಣವಾಗಿ ಉಳಿದಿದ್ದಾರೆ.
   
ಸಿಯಾಚಿನ್ ನಂತಹ ಸಂಪೂರ್ಣ ಹಿಮಪಾತ ಪ್ರದೇಶದಲ್ಲಿ ಬದುಕುತ್ತಾ ನಮ್ಮ ದೇಶ ರಕ್ಷಣೆಯಲ್ಲಿ ನಿರತರಾಗಿರುವ ಯೋಧರ ಕುರಿತು ಎಷ್ಟು ಪ್ರಶಂಸಿಸಿದರೂ ಅದು ಕಡಿಮೆಯೇ. ಲ್ಯಾನ್ಸ್ ನಾಯಕ್ ಹನುಮಂತಪ್ಪ ಕೊಪ್ಪದ್ ಅವರ ಆರೋಗ್ಯ ಸ್ಥಿತಿ ಚೇತರಿಕೆ ಕಂಡುಬಂದು ಅವರು ಮತ್ತೆ ನಮ್ಮ ದೇಶ ರಕ್ಷಣೆ ಕಾಯಕದಲ್ಲಿ ತೊಡಗುವಂತಾಗಲಿ ಎಂದು ನಾನು ದೇವರನ್ನು ಪ್ರಾರ್ಥಿಸುತ್ತೇನೆ ಎಂದು ಕೊಪ್ಪದ್ ಅವರ 62 ವರ್ಷದ ತಾಯಿಗೆ ಬರೆದ ಪತ್ರದಲ್ಲಿ ಸೋನಿಯಾ ಗಾಂಧಿ ಹೇಳಿದ್ದಾರೆ.