ಚೆನ್ನೈ: ಮನೆಯಲ್ಲಿದ್ದ ಮೊಬೈಲ್ ಸ್ಫೋಟಗೊಂಡ ಪರಿಣಾಮ ದಂಪತಿ ಸಾವನ್ನಪ್ಪಿರುವ ಘಟನೆ ಚೆನ್ನೈನ ವ್ಯಾರ್ಸಪಡಿಯಲ್ಲಿ ಸೋಮವಾರ ನಡೆದಿದೆ. 

ರಾಜೇಂದ್ರನ್ ಮತ್ತು ರಾಣಿ ಮೃತಪಟ್ಟವರು. ರಾತ್ರಿ ಇಡೀ ಸೆಲ್ ಫೋನನನ್ನು ಚಾರ್ಜ್ ಹಾಕಲಾಗಿತ್ತು. ಅದೇ ಮೊಬೈಲ್ ನಲ್ಲಿ ಬೆಳಿಗ್ಗೆ 5 ಗಂಟೆಗೆ ಅಲರಾಂ ಸೆಟ್ ಮಾಡಲಾಗಿತ್ತು. ಬೆಳಿಗ್ಗ ಅಲಾರಾಂ ಬಡಿಯುತ್ತಿದ್ದಂತೆ ಚಾರ್ಜಿಂಗ್ ಸ್ವಿಚ್ ಆಫ್ ಮಾಡುಲು ರಾಜೇಂದ್ರನ್  ಮುಂದಾಗಿದ್ದಾರೆ. ಈ ವೇಳೆ ಮೊಬೈಲ್ ಸ್ಫೋಟಗೊಂಡಿದೆ. ಘಟನೆಯಲ್ಲಿ ರಾಜೇಂದ್ರನ್ ಮತ್ತು ಅವರ ಪತ್ನಿ ರಾಣಿ ಮೃತಪಟ್ಟಿದ್ದಾರೆ. ಅದೇ ರೂಮಿನಲ್ಲಿ ಮಲಗಿದ್ದ ಮಗ ದಿನೇಶ್ ಗಾಯಗೊಂಡಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. 

ಮನೆಯಲ್ಲಿ ಎಲ್ ಪಿಜಿ ಸಿಲಿಂಡರ್ ಸ್ಫೋಟಗೊಂಡಿರಬಹುದು ಎಂದು ಸ್ಥಳಿಯರು ಶಂಕಿಸಿದ್ದರು. ಆದರೆ, ಸ್ಥಳಕ್ಕೆ ಭೇಟಿ ನೀಡಿದ ಪೊಲೀಸರು ಪರಿಶೀಲನೆ ನಡೆಸಿದಾಗ, ಸಿಲಿಂಡರ್ ಸ್ಫೋಟಗೊಳ್ಳದೇ, ಮೊಬೈಲ್ ಸ್ಫೋಟದಿಂದಾಗಿ ಮೃತಪಟ್ಟಿರುವುದು ದೃಢಪಟ್ಟಿದೆ.