ನವದೆಹಲಿ: 15,00 ಮಹಿಳೆಯರಿಗೆ ಅಶ್ಲೀಲ ಸಂದೇಶ ಕಳುಹಿಸಿದ್ದ 31 ವರ್ಷದ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಮೊಬೈಲ್ ಫೋನ್ ಮೂಲಕ 1500ಕ್ಕೂ ಹೆಚ್ಚು ಮಹಿಳೆಯರಿಗೆ ಅಶ್ಲೀಲ ಸಂದೇಶ ರವಾನಿಸಿದ್ದ ದೆಹಲಿಯ ಆರೋಪಿ ಮೊಹಮ್ಮದ್ ಖಾಲಿದ್ ಎಂಬಾತನನ್ನು  ಪೊಲೀಸರು ಬಂಧಿಸಿ ಪ್ರಕರಣ ದಾಖಲಿಸಿದ್ದಾರೆ.

ಈತ ವಿವಿಧ ಮೊಬೈಲ್ ಸಿಮ್ ಬಳಸಿ ಮನಸ್ಸಿಗೆ ಬಂದ ಸಂಖ್ಯೆಗೆ ಕರೆ ಮಾಡುತ್ತಿದ್ದ. ಮಹಿಳಾ ದನಿ ಉತ್ತರಿಸಿದರೆ ಆ ಸಂಖ್ಯೆ ಸಂಗ್ರಹ ಮಾಡಿಕೊಂಡು ಮೆಸೇಜ್ ಮತ್ತು ವಾಟ್ಯಾಪ್ ಮೂಲಕ ಅಶ್ಲೀಲ ಸಂದೇಶ ರವಾನೆ ಮಾಡುತ್ತಿದ್ದ.

ಅಶೋಕ್ ವಿಹಾರ ಪೊಲೀಸ್ ಠಾಣೆಯಲ್ಲಿ ಮಹಿಳೆಯೊಬ್ಬರು ದಾಖಲಿಸಿದ್ದ ದೂರಿನ ಅನ್ವಯ ಪೊಲೀಸರು ಬಂಧಿಸಿದ್ದಾರೆ. ದೂರು ನೀಡಿದ ಮಹಿಳೆಗೆ ಆರೋಪಿಯ ಎರಡು ನಂಬರ್ ಗಳಿಂದ ಅಶ್ಲೀಲ ಸಂದೇಶಗಳು ಬಂದಿದ್ದವು, ಆಕೆ ವಾಪಸ್ ಫೋನ್ ಮಾಡಿದಾಗ , ಆಕೆಯ ಫೋಟೋ ಹಾಗೂ ಮೊಬೈಲ್ ನಂಬರ್ ಗಳನ್ನು ಪೋರ್ನ್ ಸೈಟ್ ಗೆ ಅಪ್ ಲೋಡ್ ಮಾಡುವುದಾಗಿ  ಬೆದರಿಸಿದ್ದ.

ಪೊಲೀಸರು ಆತನ ನಂಬರ್ ಪರಿಶೀಲಿಸಿದಾಗ ನಕಲಿ ವಿಳಾಸ ನೀಡಿ ಆತ ನಂಬರ್ ಖರೀದಿಸಿದ್ದ ಎಂಬದು ತಿಳಿದು ಬಂದಿದೆ.

ವಿವಿಧ ಮೊಬೈಲ್ ಕಂಪೆನಿಗಳಿಗೆ ಗ್ರಾಹಕರು ಸಲ್ಲಿಸಿದ್ದ ದೂರಿನನ್ವಯ ಪೊಲೀಸರು ಈತನನ್ನು ಪತ್ತೆ ಹಚ್ಚಿ ಬಂಧಿಸಿದ್ದಾರೆ. ಖಾಲಿದ್ ಮೊಬೈಲ್ ಫೋನ್ ಸೆಟ್​ನಲ್ಲಿ 2000 ಮಹಿಳೆಯರು ಮತ್ತು ಯುವತಿಯರ ಫೋನ್ ಸಂಖ್ಯೆಗಳಿದ್ದವು ಎಂದು ಪೊಲೀಸರು ತಿಳಿಸಿದ್ದಾರೆ.