ಹೈದರಾಬಾದ್: ಪೊಲಿಯೋ ಮುಕ್ತ ಭಾರತ ಎಂಬ ಹಣೆಪಟ್ಟಿ ಹೊಂದಿದ್ದ ಭಾರತದಲ್ಲಿ ಐದು ವರ್ಷಗಳ ಬಳಿಕ ಇದೇ ಮೊದಲ ಬಾರಿಗೆ ಪೋಲಿಯೋ ವೈರಾಣು ಪತ್ತೆಯಾಗಿದೆ.
ತೆಲಂಗಾಣದ ರಾಜಧಾನಿ ಹೈದರಾಬಾದ್ ನ ಅಂಬರ್‌ಪೆಟ್‌ನಲ್ಲಿ ಮೊದಲ ಪೋಲಿಯೋ ವೈರಾಣು ಪತ್ತೆಯಾಗಿರುವ ಕುರಿತು ಮಾಹಿತಿ ಕೇಳಿಬಂದಿದ್ದು, ತೆಲಂಗಾಣ ರಾಜ್ಯಾದ್ಯಂತ ಹೈಅಲರ್ಟ್ ಘೋಷಣೆ ಮಾಡಲಾಗಿದೆ. ಟೈಪ್ 2 ಬಗೆಯ ಪೋಲಿಯೋ ವೈರಸ್ ಪತ್ತೆಯಾಗಿರುವುದಾಗಿ ತೆಲಂಗಾಣ ಸರ್ಕಾರ ಖಚಿತ ಪಡಿಸಿದ್ದು, ಈಗಾಗಲೇ ರಾಜ್ಯ ಆರೋಗ್ಯ ಇಲಾಖೆಗೆ ಈ ಬಗ್ಗೆ ನಿರ್ದೇಶನ ನೀಡಿರುವ ತೆಲಂಗಾಣ ಸರ್ಕಾರ ಕಟ್ಟೆಚ್ಚರದಿಂದ ಇರುವಂತೆ ಸೂಚಿಸಿದ್ದು, ಪೋಲಿಯೋ ತಡೆಗಟ್ಟುವ ಸಲುವಾಗಿ ವ್ಯಾಪಕ ಸಮರೋಪಾದಿಯ ಪೋಲಿಯೋ ನಿಗ್ರಹ ಅಭಿಯಾನವನ್ನು ಆರಂಭಿಸಲು ಮುಂದಾಗಿದೆ.
ಈಗಾಗಲೇ ರಾಜ್ಯ ಆರೋಗ್ಯ ಇಲಾಖೆಗೆ ಈ ಬಗ್ಗೆ ನಿರ್ದೇಶನ ನೀಡಿರುವ ತೆಲಂಗಾಣ ಸರ್ಕಾರ ಕಟ್ಟೆಚ್ಚರದಿಂದ ಇರುವಂತೆ ಸೂಚಿಸಿದ್ದು, ಪೋಲಿಯೋ ತಡೆಗಟ್ಟುವ ಸಲುವಾಗಿ ವ್ಯಾಪಕ ಸಮರೋಪಾದಿಯ ಪೋಲಿಯೋ ನಿಗ್ರಹ ಅಭಿಯಾನವನ್ನು ಆರಂಭಿಸಲು ಮುಂದಾಗಿದೆ.
ಮೂಲಗಗಳ ಪ್ರಕಾರ ಪೋಲಿಯೋ ವೈರಾಣು ಅಂಬರ್ ಪೇಟ್ ನ ನೀರು ಹರಿವ ತೋಡಿನಲ್ಲಿ ಪತ್ತೆಯಾಗಿದ್ದು, ನೀರಿನ ಪರೀಕ್ಷೆಯನ್ನು ಪ್ರಯೋಗಾಲಯದಲ್ಲಿ ಕೈಗೊಂಡಾಗ ಟೈಪ್ 2 ಪೋಲಿಯೋ ವೈರಸ್ ಪತ್ತೆಯಾಗಿತ್ತು. ಈ ಬಗ್ಗೆ ಆರೋಗ್ಯ ಇಲಾಖೆ ನೀಡಿರುವ ವರದಿಯನ್ನಾಧರಿಸಿ ತೆಲಂಗಾಣ ಸರ್ಕಾರ ರಾಜ್ಯದಲ್ಲಿನ ಸುಮಾರು 3 ಲಕ್ಷ ಮಕ್ಕಳಿಗೆ ವ್ಯಾಕ್ಸಿನ್‌ ಹಾಕಿಸುವ ನಿರ್ಧಾರ ಕೈಗೊಂಡಿದೆ. ಈಗಾಗಲೇ ಜಿನೇವಾದಿಂದ ಎರಡು ಲಕ್ಷ ವ್ಯಾಕ್ಸಿನ್‌ಗಳನ್ನು ವಿಮಾನದ ಮೂಲಕ ತುರ್ತಾಗಿ ತರಿಸಿಕೊಳ್ಳಲಾಗಿದ್ದು, ಶೀಘ್ರದಲ್ಲೇ ಆರೋಗ್ಯ ಇಲಾಖೆಯ ಮೂಲಕ ವಿತರಣೆ ಮಾಡಲಾಗುತ್ತದೆ ಎಂದು ತೆಲಂಗಾಣ ಸರ್ಕಾರದ ಪ್ರಧಾನ ಕಾರ್ಯದರ್ಶಿ ರಾಜೇಶ್ವರ್ ತಿವಾರಿ ತಿಳಿಸಿದ್ದಾರೆ.
2011ರಲ್ಲಿ ವಿಶ್ವ ಆರೋಗ್ಯ ಸಂಸ್ಥೆ ಭಾರತವನ್ನು ಪೋಲಿಯೋ ಮುಕ್ತ ರಾಷ್ಟ್ರ ಎಂದು ಘೋಷಣೆ ಮಾಡಿತ್ತು. ಆದರೆ ಐದು ವರ್ಷಗದಳ ಬಳಿಕ ಇದೀಗ ತೆಲಂಗಾಣದಲ್ಲಿ ಮೊದಲ ಬಾರಿಗೆ ಮಾರಕ ಪೋಲಿಯೋ ವೈರಾಣು ಪತ್ತೆಯಾಗಿದೆ.