ನವದೆಹಲಿ: ಪ್ರಧಾನಮಂತ್ರಿ ನರೇಂದ್ರಮೋದಿಯವರಿಗೆ ಎಲ್ಲಾ ತಿಳಿದಿದ್ದು, ಅವರಿಗೆ ರಘುರಾಮ್ ರಾಜನ್ ರಂತಹ ತಜ್ಞರ ಅವಶ್ಯವಿಲ್ಲ ಎಂದು ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿಯವರು ಭಾನುವಾರ ಹೇಳಿದ್ದಾರೆ.

ನಿನ್ನೆಯಷ್ಟೇ ತಮ್ಮ ಹುದ್ದೆ ಕುರಿತಂತೆ ಮಾತನಾಡಿದ್ದ ಆರ್ ಬಿಐ ಗವರ್ನರ್ ರಘುರಾಮ್ ರಾಜನ್ ಅವರು, ಎರಡನೇ  ಅವಧಿಯಲ್ಲೂ ರಿಸರ್ವ್ ಬ್ಯಾಂಕ್ ಗವರ್ನರ್ ಆಗಿ ಮುಂದುವರೆಯುವ ಇಚ್ಛೆ ನನಗಿಲ್ಲ. ನನ್ನ ಅವಧಿ ಮುಗಿದ ಬಳಿಕ ಶೈಕ್ಷಣಿಕ ಕ್ಷೇತ್ರಕ್ಕೆ ಮರಳಬೇಕೆಂದಿದ್ದೇನೆಂದು ಹೇಳಿದ್ದರು.

ರಘುರಾಮ್ ರಾಜನ್ ಅವರ ನಿರ್ಧಾರ ಕುರಿತಂತೆ ಇಂದು ಪ್ರತಿಕ್ರಿಯೆ ನೀಡಿರುವ ರಾಹುಲ್ ಗಾಂಧಿಯವರು, ರಾಜನ್ ಅವರ ನಿರ್ಧಾರ ನಿಜಕ್ಕೂ ಬೇಸರವನ್ನುಂಟು ಮಾಡಿದೆ. ರಾಜನ್ ರಂತಹ ವ್ಯಕ್ತಿಗಳಿಂದಲೇ ಭಾರತ ಇಂದು ಶ್ರೇಷ್ಠ ರಾಷ್ಟ್ರವಾಗಿರುವುದು. ಆರ್ಥಿಕ ಸಂಕಷ್ಟದಲ್ಲಿದ್ದ ಸಂದರ್ಭದಲ್ಲಿ ಭಾರತವನ್ನು ಮುನ್ನಡೆಸಿದ್ದಕ್ಕಾ ರಾಜನ್ ಅವರಿಗೆ ಧನ್ಯವಾದಗಳು ಎಂದು ಹೇಳಿದ್ದಾರೆ.

ಇದೇ ವೇಳೆ ಭಾರತೀಯ ಜನತಾ ಪಕ್ಷ (ಬಿಜೆಪಿ) ವಿರುದ್ಧ ಕಿಡಿಕಾರಿರುವ ಅವರು, ಈ ರೀತಿಯ ಬೆಳವಣಿಗೆಗಳಿಗೆ ಕೇಂದ್ರ ಸರ್ಕಾರವೇ ನೇರ ಹೊಣೆಯಾಗಿದೆ. ಅಡಿಪಾಯವೇ ಇಲ್ಲದ ಆರೋಪಗಳನ್ನು ರಾಜನ್ ಮೇಲೆ ಹೊರಿಸಲಾಗಿದೆ. ಇವೆಲ್ಲವೂ ಪೂರ್ವ ನಿಯೋಜಿತ ಪ್ರಯತ್ನಗಳಾಗಿದ್ದವು ಎಂದು ಆರೋಪಿಸಿದ್ದಾರೆ.

ಪಿ.ಚಿದಂಬರಂ ರಂತಹ ವ್ಯಕ್ತಿಗಳನ್ನು ಉಳಿಸಿಕೊಳ್ಳಲಾಗದ ಸರ್ಕಾರ ಡಾ.ರಾಜನ್ ಅವರನ್ನು ಉಳಿಸಿಕೊಳ್ಳುತ್ತದೆಯೇ ಎಂದು ನಾನು ಈ ಹಿಂದೆಯೇ ಹೇಳಿದ್ದೆ. ಆ ಮಾತು ಇಂದು ಸತ್ಯವಾಗಿದೆ. ಪ್ರಧಾನಮಂತ್ರಿ ನರೇಂದ್ರ ಮೋದಿಯವರಿಗೆ ಎಲ್ಲವೂ ತಿಳಿದಿದ್ದು, ಅವರಿಗೆ ರಾಜನ್ ರಂತಹ ತಜ್ಞರ ಅವಶ್ಯಕತೆಯಿಲ್ಲ ಎಂದು ವ್ಯಂಗ್ಯವಾಡಿದ್ದಾರೆ.