ಚಂಡೇಲ್: ಮಣಿಪುರದಲ್ಲಿ ಮತ್ತೆ ಉಗ್ರರ ಅಟ್ಟಹಾಸ ಮುಂದುವರೆದಿದ್ದು, ಚಂಡೇಲ್ ಜಿಲ್ಲೆಯಲ್ಲಿ ಉಗ್ರರು ನಡೆಸಿದ ಗುಂಡಿನ ದಾಳಿಗೆ ಅಸ್ಸಾಂ ರೈಫಲ್ಸ್​ನ 6 ಯೋಧರು ಹುತಾತ್ಮರಾಗಿದ್ದಾರೆ.

ಮಣಿಪುರದ ಚಂಡೇಲ್ ಜಿಲ್ಲೆಯಲ್ಲಿ ಉಂಟಾಗಿರುವ ಭೂಕುಸಿತ ಪ್ರದೇಶ ಪರಿಸ್ಥಿತಿಯನ್ನು ಪರಿಶೀಲಿಸಿ ವಾಪಸ್ಸಾಗುತ್ತಿದ್ದ 29ನೇ ಅಸ್ಸಾಂ ರೈಫಲ್ಸ್ ಯೋಧರ ಮೇಲೆ ಉಗ್ರರು ಏಕಾಏಕಿ ಗುಂಡಿನ  ದಾಳಿ ನಡೆಸಿದ್ದಾರೆ. ಈ ವೇಳೆ ಓರ್ವ ಸೇನಾಧಿಕಾರಿ ಸೇರಿದಂತೆ ಒಟ್ಟು ಆರು ಮಂದಿ ಯೋಧರು ಮೃತಪಟ್ಟಿದ್ದಾರೆ. ಸೈನಿಕರ ಹತ್ಯೆ ಬಳಿಕ ಉಗ್ರರು ಯೋಧರ ಬಳಿ ಇದ್ದ 4 ಎಕೆ.47 ರೈಫಲ್,  ಇನ್ಸಾಸ್ ರೈಫಲ್​ಗಳು ಮತ್ತು ಎಲ್​ಎಂಜಿ ರೈಫಲ್ ಕಸಿದು ಪರಾರಿಯಾಗಿದ್ದರು.

ಈ ವೇಳೆ ಇತರೆ ಯೋಧರು ನಡೆಸಿದ ಮರುದಾಳಿಗೆ ಬೆದರಿದ ಉಗ್ರರು ಶಸ್ತ್ರಾಸ್ತ್ರ ಬಿಟ್ಟು ಪರಾರಿಯಾಗಿದ್ದಾರೆ ಎಂದು ರಕ್ಷಣಾ ಸಚಿವಾಲಯದ ಮೂಲಗಳು ತಿಳಿಸಿವೆ. ಗೃಹ ಸಚಿವ ರಾಜನಾಥ್  ಸಿಂಗ್ ಅಸ್ಸಾಂ ರೈಫಲ್ಸ್​ನ ಡಿಜಿಯೊಂದಿಗೆ ಮಾತುಕತೆ ನಡೆಸಿದ್ದು, ಘಟನೆ ಕುರಿತು ಮಾಹಿತಿ ಪಡೆದಿದ್ದಾರೆ.

"ಉಗ್ರರು ಯೋಧರನ್ನು ಹೊಡೆದುರುಳಿಸಿರುವುದು ದುಃಖದ ವಿಷಯ. ಯೋಧರು ಕುಟುಂಬದವರಿಗೆ ನೋವು ತಡೆದುಕೊಳ್ಳುವ ಶಕ್ತಿ ನೀಡಲಿ. ಅಸ್ಸಾಂ ರೈಫಲ್ಸ್​ನ ಡಿಜಿಯೊಂದಿಗೆ ಮಾತನಾಡಿದ್ದು,  ಗೃಹ ಸಚಿವಾಲಯ ಘಟನೆಯ ನಂತರದ ಬೆಳವಣಿಗೆಗಳ ಮೇಲೆ ನಿಗಾ ವಹಿಸಿದೆ" ಎಂದು ರಾಜನಾಥ್ ಸಿಂಗ್ ಪ್ರತಿಕ್ರಿಯೆ ನೀಡಿದ್ದಾರೆ.