ಥಾಣೆ: ಎನ್ಸಿಪಿ ಶಾಸಕ ಜಿತೇಂದ್ರ ಅವಾದ್ ಸಮ್ಮುಖದಲ್ಲೇ ತನಗೆ ಲೈಂಗಿಕ ಕಿರುಕಳ ನೀಡಿದ ವ್ಯಕ್ತಿಗೆ ಸಂತ್ರಸ್ತ ಯುವತಿ ಥಳಿಸಿರುವ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. 

ಇನ್ನು ಸಂತ್ರಸ್ತ ಯುವತಿ ಮತ್ತು ಆರೋಪಿಯನ್ನು ಕಚೇರಿಗೆ ಕರೆಸಿ ರಾಜಿ ಪಂಚಾಯಿತಿಗೆ ಮುಂದಾಗಿದ್ದ ಶಾಸಕರ ವರ್ತನೆಗೆ ಸಾರ್ವಜನಿಕರು ತೀವ್ರ ಆಕ್ಷೇಪವನ್ನು ವ್ಯಕ್ತಪಡಿಸಿದ್ದಾರೆ. 

ಕಾಲೇಜು ವಿದ್ಯಾರ್ಥಿಯಾಗಿರುವ ಆರೋಪಿ ಸಂತ್ರಸ್ತ ಯುವತಿಗೆ ಸತತ ಕಿರುಕುಳ ನೀಡುತ್ತಾ ಬಂದಿದ್ದ. ಇದರಿಂದ ಬೇಸತ್ತ ಯುವತಿ ಆತ್ಮಹತ್ಯೆ ಮಾಡಿಕೊಳ್ಳಲು ಮುಂದಾಗಿದ್ದಳು. ಆದರೆ ಈ ಮಧ್ಯೆ ಯುವತಿಯನ್ನು ಮತ್ತು ಆರೋಪಿಯನ್ನು ಶಾಸಕರು ತಮ್ಮ ಕಚೇರಿಗೆ ಕರೆಸಿ ಕಾನೂನು ನಿಯಮಾವಳಿಗಳನ್ನು ಮೀರಿ ಪ್ರಕರಣದಲ್ಲಿ ನ್ಯಾಯ ತೀರ್ಮಾನಕ್ಕೆ ಮುಂದಾಗಿದ್ದರು. 

ಯುವತಿ ಮತ್ತು ಶಾಸಕರ ಕೆಲ ಬೆಂಬಲಿಗರು ಆರೋಪಿಗೆ ಥಳಿಸಿರುವ ದೃಶ್ಯಾವಳಿಗಳು ವಿಡಿಯೋದಲ್ಲಿದೆ. ಇನ್ನು ಆರೋಪಿಯನ್ನು ಪೊಲೀಸರ ವಶಕ್ಕೆ ಒಪ್ಪಿಸಲಾಗಿದೆ. ಆರೋಪಿ ವಿರುದ್ಧ ಪೊಲೀಸರು ಐಪಿಸಿ ಸೆಕ್ಷನ್ 354(ಎ),(ಬಿ) ಮತ್ತು 506 ಮತ್ತು ಪೋಕ್ಸೋ ಕಾಯ್ದೆಯ ಸೆಕ್ಷನ್ 12ರಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.