ಭುವನೇಶ್ವರ್: ತಾಯಿ ಅಂತ್ಯಸಂಸ್ಕಾರಕ್ಕೆ ಗ್ರಾಮಸ್ಥರು ನೆರವಾಗದ ಕಾರಣ ನಾಲ್ವರು ಹೆಣ್ಣುಮಕ್ಕಳು ಜನ್ಮದಾತೆ ಅಸುನೀಗಿದ್ದ ಮಂಚ ಸಮೇತ ರುದ್ರಭೂಮಿಗೆ ಹೊತ್ಯೊಯ್ದು ಅಂತ್ಯಸಂಸ್ಕಾರ ಮಾಡಿರುವ ಕರುಣಾಜನಕ ಘಟನೆ ಒಡಿಶಾದ ಕಾಳಹಂಡಿಯಲ್ಲಿ ನಡೆದಿದೆ. 

ತಾಯಿ ಶವವನ್ನು ಸ್ಮಶಾನಕ್ಕೆ ತೆಗೆದುಕೊಂಡು ಹೋಗಲು ನೆರವು ನೀಡುವಂತೆ ಹೆಣ್ಣುಮಕ್ಕಳು ಗ್ರಾಮಸ್ಥರಲ್ಲಿ ಮನವಿ ಮಾಡಿಕೊಂಡಿದ್ದಾರೆ. ತಮ್ಮ ಸಹಾಯಕ್ಕೆ ಗ್ರಾಮಸ್ಥರು ಮುಂದಾಗದಿದ್ದಾಗ ನಾಲ್ವರು ಹೆಣ್ಣುಮಕ್ಕಳೇ ತಾಯಿ ಮಲಗಿದ್ದ ಕಟ್ಟಿಗೆ ಮಂಚವನ್ನೇ ತಿರುಗಿಸಿ ಅದರ ಮೇಲೆ ಶವ ಇಟ್ಟು ತಮ್ಮ ಭುಜದ ಮೇಲೆ ಹೊತ್ತು ಸ್ಮಶಾನಕ್ಕೆ ಹೊತ್ತೊಯ್ದಿದ್ದಾರೆ. ಆದರೆ ತಾಯಿ ಮೃತದೇಹವನ್ನು ಸುಡಲು ಹಣವಿಲ್ಲದ ಕಾರಣ ಮನೆಯ ಚಾವಣಿಗೆ ಹಾಕಿದ್ದ ಮರದ ದಿಮ್ಮಿಗಳನ್ನೇ ಬಳಸಿ ಚಿತೆಗೆ ಬೆಂಕಿ ಹೊತ್ತಿಸಿ ಅಂತ್ಯಸಂಸ್ಕಾರ ಮಾಡಿದ್ದಾರೆ. 

ಒಡಿಶಾದ ಡೋಕ್ರಿಪಾಡಾ ಗ್ರಾಮದ ಗೋಲಾಮುಂಡಾ ಬ್ಲಾಕ್ ನ ನಿವಾಸಿಯಾದ 80 ವರ್ಷದ ಕನಕ್ ಸತ್ಪಥಿ ಕಳೆದ ಶುಕ್ರವಾರ ಸಾವನ್ನಪ್ಪಿದ್ದು ಇಕೆಗೆ ನಾಲ್ವರು ಹೆಣ್ಣುಮಕ್ಕಳಿದ್ದರು. ಆ ನಾಲ್ವರು ಹೆಣ್ಣುಮಕ್ಕಳ ಗಂಡಂದಿರು ಮೃತಪಟ್ಟಿದ್ದರಿಂದ ತಾಯಿಯ ಅಂತ್ಯಸಂಸ್ಕಾರಕ್ಕೆ ಈ ನಾಲ್ವರು ಪರದಾಡಬೇಕಾಯಿತು.