ನವದೆಹಲಿ: ಕೇಂದ್ರ ಸಚಿವೆ ಸ್ಮೃತಿ ಇರಾನಿಯವರ ಕಾರನ್ನು ಹಿಂಬಾಲಿಸಿದ್ದ ದೆಹಲಿ ವಿವಿ ವಿದ್ಯಾರ್ಥಿಗಳ ವಿರುದ್ಧ ಎಫ್ ಐ ಆರ್ ದಾಖಲಾಗಿದೆ. ಇದೇ ವೇಳೆ ತಾವು ಏಕೆ ಕಾರು ಹಿಂಬಾಲಿಸಿದೆವು ಎಂಬುದರ ಬಗ್ಗೆ ಬಂಧಿತ ವಿದ್ಯಾರ್ಥಿಗಳು ಮಾಹಿತಿ ನೀಡಿದ್ದಾರೆ.

ಕಾರು ಹಿಂಬಾಲಿಸಿದ ಇಬ್ಬರು ವಿದ್ಯಾರ್ಥಿಗಳು ಇರಾನಿ ಅವರ ಕ್ಷಮೆ ಕೇಳಿದ್ದು. ಕೇವಲ ತಮಾಷೆಗಾಗಿ ತಾವು ಹಾಗೆ ಮಾಡಿದ್ದು ಎಂದು ಹೇಳಿದ್ದಾರೆ.

ನಾವು ನಾಲ್ಕು ಜನ ಸ್ನೇಹಿತರು ಸ್ನೇಹಿತನ ಹುಟ್ಟುಹಬ್ಬದ ಪಾರ್ಟಿಗೆ ತೆರಳಿ ಅಲ್ಲಿ ಮದ್ಯ ಸೇವಿಸಿ ಮನೆಗೆ ಕಾರಿನಲ್ಲಿ ಹಿಂತಿರುಗುತ್ತಿದ್ದೆವು. ನಾವು ನಿಯಮ ಉಲ್ಲಂಘಿಸಿದ್ದನ್ನು ಒಪ್ಪಿಕೊಳ್ಳುತ್ತೇವೆ, ನಾವು ಜೋರಾಗಿ ಮ್ಯೂಸಿಕ್ ಹಾಕಿಕೊಂಡು ವಿಡಿಯೋ ರೆಕಾರ್ಡ್ ಮಾಡುತ್ತಿದ್ದೆವು. ನಾವು ಕೇವಲ ಫನ್ನಿ ವಿಡಿಯೋಗಳನ್ನು ರೆಕಾರ್ಡಾ ಮಾಡುತ್ತಿದ್ದೆವು, ನಾವು ಕಾರನ್ನು ಓವರ್ ಟೇಕ್ ಮಾಡಿದಾಗ, ಅದರಲ್ಲಿ ಸ್ಮೃತಿ ಇರಾನಿ ಇದ್ದಾರೆಂದು ತಿಳಿದಿರಲಿಲ್ಲ. ಒಂದು ವೇಳೆ ಅದರಲ್ಲಿ ಇರಾನಿ ಇದ್ದಾರೆ ಎಂದು ತಿಳಿದಿದ್ದರೇ ನಾವು ಓವರ್ ಟೇಕ್ ಮಾಡುತ್ತಿರಲಿಲ್ಲ ಎಂದು ಆರೋಪಿ ವಿದ್ಯಾರ್ಥಿ ಹೇಳಿದ್ದಾನೆ.

ನಾವು ಮಾಡಿರುವ ತಪ್ಪಿಗಾಗಿ ನಾವು ಕ್ಷಮೆ ಕೇಳುತ್ತೇವೆ, ಆದರೆ ನಾವು ಆಕ್ಷೇಪಾರ್ಹವಾದದ್ದನ್ನು ಮಾಡಿಲ್ಲ, ಆದರೆ ನಾವು ಕೆಟ್ಟದ್ದು ಮಾಡಿದ್ದೇವೆ ಎಂದು ಅವರಿಗೆ ಅನ್ನಿಸಿದರೇ ನಾವು ಕ್ಷಮೆ ಯಾಚಿಸುತ್ತೇವೆ, ಇನ್ನು ಮುಂದೆ ಈ ರೀತಿಯ ಘಟನೆ ಮರುಕಳಿಸುವುದಿಲ್ಲ ಎಂದು ಹೇಳಿದ್ದಾರೆ.