ಶ್ರೀನಗರ: ಜಮ್ಮು-ಕಾಶ್ಮೋರದಲ್ಲಿ ವೈದ್ಯಕೀಯ ಪೂರೈಕೆಗಳ ನಿಗಮ ದೆಹಲಿ ಮೂಲದ ವ್ಯಕ್ತಿಗೆ ರಾಜ್ಯದಲ್ಲಿ ಫಾರ್ಮಸಿ ತೆರೆಯಲು ಟೆಂಡರ್ ನೀಡಿರುವುದು ರಾಜ್ಯದಲ್ಲಿ ಪ್ರತಿಭಟನೆಗೆ ಕಾರಣವಾಗಿದೆ. ಹೊರ ರಾಜ್ಯದವರಿಗೆ ಫಾರ್ಮಸಿ ತೆರೆಯಲು ಅನುಮತಿ ನೀಡುವುದು ಜಮ್ಮು-ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ನೀಡುವ ಆರ್ಟಿಕಲ್ 370 ರ ಉಲ್ಲಂಘನೆಯಾಗಲಿದೆ ಎಂದು ಸ್ಥಳೀಯ ಫಾರ್ಮಸಿಗಳನ್ನು ನಡೆಸುವವರು ಪ್ರತಿಭಟನೆ ನಡೆಸಿದ್ದಾರೆ. 

ಜೆಕೆಎಂಎಸ್ ಸಿಎಲ್ ಜಮ್ಮು-ಕಾಶ್ಮೀರದಲ್ಲಿ 57 ಫಾರ್ಮಸಿಗಳನ್ನು ಪ್ರಾರಂಭಿಸಲು ದೆಹಲಿ ಮೂಲದ ವ್ಯಕ್ತಿಗೆ ಟೆಂಡರ್ ಘೋಷಿಸಿತ್ತು. ಈ ಬಗ್ಗೆ ಸ್ಥಳೀಯವಾಗಿ ಫಾರ್ಮಸಿಗಳನ್ನು ನಡೆಸುವ ಸಾವಿರಾರು ಜನರು ಬೀದಿಗಿಳಿದು ಪ್ರತಿಭಟನೆ ನಡೆಸಿದ್ದಾರೆ. ಪ್ರತಿಭಟನೆ ಹಿನ್ನೆಲೆಯಲ್ಲಿ ಪಿಡಿಪಿ-ಬಿಜೆಪಿ ಸರ್ಕಾರದ ಆರೋಗ್ಯ ಸಚಿವ ನಿರ್ಮಲ್ ಸಿಂಗ್, ರಾಜ್ಯಕ್ಕೆ ನೀಡಲಾಗಿರುವ ಆರ್ಟಿಕಲ್ 370 ರ ಉಲ್ಲಂಘನೆಯಾಗುವಂತೆ ಅನ್ಯ ರಾಜ್ಯದವರಿಗೆ ಫಾರ್ಮಸಿ ತೆರೆಯಲು ಅನುಮತಿ ಹೇಗೆ ನೀಡಲಾಯಿತು ಎಂಬ ಬಗ್ಗೆ ತನಿಖೆ ನಡೆಸುವುದರ ಬಗ್ಗೆ ಭರವಸೆ ನೀಡಿದ್ದು, ಪ್ರತಿಭಟನೆಯನ್ನು ಹಿಂಪಡೆಯಲಾಗಿದೆ.