ಮುಂಬೈ: ಮುಂಬೈ ಮಹಾನಗರ ಪಾಲಿಕೆ ಚುನಾವಣಾ ಫಲಿತಾಂಶದ ವೇಳೆ ಖ್ಯಾತ ಅಂಕಣಗಾರ್ತಿ ಮತ್ತು ಬರಹಗಾರ್ತಿ ಶೋಭಾ ಡೇ ಅವರು ಅಧಿಕ ತೂಕದ ಪೊಲೀಸ್ ಸಿಬ್ಬಂದಿ ಕುರಿತಂತೆ ಮಾಡಿದ್ದ ಟ್ವೀಟ್ ವಿರುದ್ಧ ಸ್ವತಃ  ಸಿಬ್ಬಂದಿಯೇ ಕಿಡಿಕಾರಿದ್ದಾರೆ.

ನಿನ್ನೆ ತೂಕದ ಪೊಲೀಸ್ ಸಿಬ್ಬಂದಿ ಕುರಿತಂತೆ ಟ್ವೀಟ್ ಮಾಡಿದ್ದ ಶೋಭಾಡೇ ಚುನಾವಣೆ ಭದ್ರತೆಗೆ "ಹೆವಿ ಪೊಲೀಸ್" ಬಂದೋಬಸ್ತ್ ಎಂದು ಚಿತ್ರ ಸಹಿತ ಟ್ವೀಟ್ ಮಾಡಿದ್ದರು. ಇದಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ್ದ ಮಹಾರಾಷ್ಟ್ರ  ಪೊಲೀಸರು ಶೋಭಾಡೇ ಅದೇ ಟ್ವಿಟರ್ ನಲ್ಲಿ ಪ್ರತಿಕ್ರಿಯೆ ನೀಡುತ್ತಾ, ನಾವು ಕೂಡ ಹಾಸ್ಯವನ್ನು ಸ್ವೀಕರಿಸುತ್ತೇವೆ. ಆದರೆ ಈಗ ನೀವು ಮಾಡಿರುವ ಹಾಸ್ಯ ಸರಿಯಲ್ಲ. ಪ್ರಸ್ತುತ ಈ ಚಿತ್ರದಲ್ಲಿರುವ ಸಿಬ್ಬಂದಿ ಮುಂಬೈ ಪೊಲೀಸ್  ಸಿಬ್ಬಂದಿಯಲ್ಲ. ಜವಾಬ್ದಾರಿಯುತ ಸ್ಥಾನದಲ್ಲಿರುವ ನಿಮ್ಮಿಂದ ಇಂತಹ ಪ್ರತಿಕ್ರಿಯೆ ನಿರೀಕ್ಷಿಸರಲಿಲ್ಲ ಎಂದು ಕಿಡಿಕಾರಿದ್ದರು.

ಇದಕ್ಕೆ ಉತ್ತರಿಸಿದ್ದ ಶೋಭಾಡೇ ಕೂಡ ಮಧ್ಯಪ್ರದೇಶ ಪೊಲೀಸ್ ಸಿಬ್ಬಂದಿ ವೈದ್ಯರನ್ನು ಕಾಣುವುದು ಉತ್ತಮ ಎಂದು ಮತ್ತೆ ವ್ಯಂಗ್ಯ ಮಾಡಿದ್ದರು. ಇದೀಗ ಶೋಭಾ ಡೇ ವಿರುದ್ಧ ಅಪಹಾಸ್ಯಕ್ಕೀಡಾಗಿದ್ದ ಪೊಲೀಸ್ ಸಿಬ್ಬಂದಿ  ಕಿಡಿಕಾರಿದ್ದು, ಸೋಮಾರಿತನದಿಂದಲೋ ಅಥವಾ ಅತಿಯಾಗಿ ತಿಂದಿದ್ದರಿಂದಲೋ ಬಂದ ತೂಕವಲ್ಲ. 1993ರಲ್ಲಿ ನನಗೆ ಪಿತ್ತಕೋಶ ಶಸ್ತ್ರಚಿಕಿತ್ಸೆಯಾಗಿತ್ತು. ಬಳಿಕ ಹಾರ್ಮೋನ್ ಗಳ ತೊಂದರೆಯಿಂದಾಗಿ ಈ ರೀತಿ ತೂಕ ಹೆಚ್ಚಾಗಿದೆ.  ಇದನ್ನು ಅಪಹಾಸ್ಯ ಮಾಡಿದ್ದು ಸರಿಯಲ್ಲ ಎಂದು ಕಿಡಿಕಾರಿದ್ದಾರೆ.

ಪೊಲೀಸ್ ಸಿಬ್ಬಂದಿಗೆ ಟ್ವಿಟರ್ ನಲ್ಲಿ ವ್ಯಾಪಕ ಬೆಂಬಲ ದೊರೆಯುತ್ತಿದ್ದು, ಟ್ವೀಟ್ ಮಾಡಿದ್ದ ಶೋಭಾ ಡೇ ಮತ್ತೆ ಟ್ರೋಲ್ ಆಗಿದ್ದಾರೆ.

ಇನ್ನು ಈ ಹಿಂದೆ ಸಾಕಷ್ಟು ಭಾರಿ ವಿವಾದಾತ್ಮಕ ಟ್ವೀಟ್ ಮಾಡಿ ಟ್ವೀಟಿಗರ ಆಕ್ರೋಶಕ್ಕೆ ಶೋಭಾ ಡೇ ತುತ್ತಾಗಿದ್ದರು. ಈ ಹಿಂದೆ ರಿಯೋ ಒಲಿಂಪಿಕ್ಸ್ ಕುರಿತಂತೆ ಭಾರತೀಯ ಆಟಗಾರರನ್ನು ನಿಂದಿಸಿ ಶೋಭಾ ಡೇ ಆಕ್ರೋಶಕ್ಕೆ  ಕಾರಣರಾಗಿದ್ದರು.