ಲಖನೌ: ಉತ್ತರ ಪ್ರದೇಶದಲ್ಲಿ 5 ನೇ ಹಂತದ ಚುನಾವಣೆಗೆ 51 ವಿಧಾನಸಭಾ ಕ್ಷೇತ್ರಗಳಲ್ಲಿ ಮತದಾನ ಪ್ರಾರಂಭವಾಗಿದ್ದು, ಬೆಳಿಗ್ಗೆ 10 ಗಂಟೆ ವರೆಗೆ ಶೇ.12-13 ರಷ್ಟು ಮತದಾನ ನಡೆದಿದೆ. 

11 ಜಿಲ್ಲೆಗಳ 51 ವಿಧಾನಸಭಾ ಕ್ಷೇತ್ರಗಳಲ್ಲಿ ಬಿಜೆಪಿ-ಎಸ್ ಪಿ-ಕಾಂಗ್ರೆಸ್ ನಡುವೆ ಜಿದ್ದಾಜಿದ್ದಿನ ಪೈಪೋಟಿ ಇದ್ದು,  105 ಕ್ಷೇತ್ರಗಳಲ್ಲಿ ಮೈತ್ರಿ ಮಾಡಿಕೊಂಡಿರುವ ಕಾಂಗ್ರೆಸ್-ಎಸ್ ಪಿ ಅಮೇಥಿ ಲೋಕಸಭಾ ಕ್ಷೇತ್ರಗಳಲ್ಲಿ ಕಾಂಗ್ರೆಸ್- ಎಸ್ ಪಿ ಅಭ್ಯರ್ಥಿಗಳು ಸ್ಪರ್ಧಿಸಿರುವುದು ವಿಶೇಷವಾಗಿದೆ. 

ಬೆಳಿಗ್ಗೆ 10 ಗಂಟೆ ವರೆಗೆ ಶೇ.12-13 ರಷ್ಟು ಮತದಾನ ನಡೆದಿದೆ ಎಂದು ಚುನಾವಣಾ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಅಮೇಥಿ ವಿಧಾನಸಭಾ ಕ್ಷೇತ್ರದಿಂದ ಕಾಂಗ್ರೆಸ್ ನ ಅಭ್ಯರ್ಥಿಯಾಗಿ ಅಮಿತಾ ಸಿಂಗ್ ಸ್ಪರ್ಧಿಸಿದ್ದು, ಬೆಳಿಗ್ಗೆ  7 ಕ್ಕೆ ಮತದಾನ ಪ್ರಾರಂಭವಾದ ಬೆನ್ನಲ್ಲೇ ಅಮಿತಾ ಸಿಂಗ್ ಮತ ಚಲಾವಣೆ ಮಾಡಿದ್ದಾರೆ. ಅಮಿತಾ ಸಿಂಗ್ ವಿರುದ್ಧ ಸಮಾಜವಾದಿ ಪಕ್ಷದಿಂದ ಗಾಯತ್ರಿ ಪ್ರಜಾಪತಿ ಸ್ಪರ್ಧಿಸಿದ್ದು, ಅವರೂ ಸಹ ಮತದಾನ ಮಾಡಿದ್ದಾರೆ. ಫೈಜಾಬಾದ್, ಬಹರೈಚ್, ಬಸ್ತಿ, ಗೊಂದಾ, ಸಿದ್ಧಾರ್ಥನಗರ್, ಸಂತ್ ಕಬೀರ್ ನಗರ್, ಸುಲ್ತಾನ್ ಪುರ, ಶ್ರವಸ್ತಿ ಕ್ಷೇತ್ರಗಳಲ್ಲಿ ಜನರು ಮತದಾನ ಮಾಡಲು ಸಾಲುಗಟ್ಟಿ ನಿಂತಿದ್ದಾರೆ. ಒಟ್ಟು 1.84 ಕೋಟಿ ಮತದಾರರು ಮತ ಚಲಾವಣೆ ಮಾಡಲಿದ್ದಾರೆ.