ಹಣ ದುರುಪಯೋಗ ಆರೋಪ: ಸಿಬಿಐ, ಸೆಬಿಯಿಂದ ಸಾಕ್ಷಿ ಕೇಳಿದ ವಿಜಯ್ ಮಲ್ಯ

ನವದೆಹಲಿ: ತಮ್ಮ ಮೇಲಿನ ವಂಚನೆ ಆರೋಪವನ್ನು ಸಾಬೀತುಪಡಿಸುವಂತೆ ಸಿಬಿಐ ಮತ್ತು ಸೆಬಿಗೆ ಮದ್ಯ ದೊರೆ, ಕಿಂಗ್ ಫಿಶರ್ ಏರ್ ಲೈನ್ಸ್ ಅಧ್ಯಕ್ಷ ವಿಜಯ್ ಮಲ್ಯ ಒತ್ತಾಯಿಸಿದ್ದಾರೆ.

ಕಿಂಗ್ ಫಿಶರ್ ಏರ್ ಲೈನ್ಸ್ ನ ಷೇರು, ಹೂಡಿಕೆ ಹಣವನ್ನು ದುರುಪಯೋಗಪಡಿಸಿಕೊಂಡಿದ್ದರು ಎಂದು ವಿಜಯ್ ಮಲ್ಯ ವಿರುದ್ಧ ಆರೋಪ ಕೇಳಿಬರುತ್ತಿದ್ದು, ಇದಕ್ಕೆ ಇಂದು ಟ್ವಿಟ್ಟರ್ ನಲ್ಲಿ ಪ್ರತಿಕ್ರಿಯೆ ನೀಡಿರುವ ಮಲ್ಯ, ತಮ್ಮ ವಿರುದ್ಧ ಮಾಡುತ್ತಿರುವ ಆರೋಪಗಳಿಗೆ ಏನು ಸಾಕ್ಷ್ಯಾಧಾರಗಳಿವೆ ಎಂದು ಸಿಬಿಐ ಮತ್ತು ಸೆಬಿಗೆ ಮಾಧ್ಯಮಗಳು ಪ್ರಶ್ನೆ ಮಾಡಬೇಕು ಎಂದಿದ್ದಾರೆ.

ನನ್ನ ವಿರುದ್ಧ ಆರೋಪ ಮಾಡುವ ಮೊದಲು ಸಿಬಿಆ ಮತ್ತು ಸೆಬಿಗಳಿಗೆ ಕೆಲವು ಕಠಿಣ ಪ್ರಶ್ನೆಗಳನ್ನು ಕೇಳಿ ಎಂದು ಮಾಧ್ಯಮಗಳಿಗೆ ಸವಾಲು ಹಾಕಿ ಟ್ವೀಟ್ ಮಾಡಿದ್ದಾರೆ.

ಸುದ್ದಿ ಚಾನೆಲ್ ಗಳು ಸತ್ಯವನ್ನು ತಿರುಚಿ ಸುದ್ದಿಯನ್ನು ವೈಭವೀಕರಣಗೊಳಿಸುತ್ತಿವೆ ಎಂದು ಆರೋಪಿಸಿರುವ ಅವರು, ಮಾಧ್ಯಮಗಳು ಯಾವತ್ತಿಗೂ ಏಕಮುಖವಾಗಿ ಸುದ್ದಿಗಳನ್ನು ನೀಡಬಾರದು ಮತ್ತು ಒಬ್ಬರ ವಿರುದ್ಧ ಮಾತ್ರ ಆರೋಪ ಮಾಡಬಾರದು ಎಂದು ಹೇಳಿದ್ದಾರೆ.

ಸರಣಿ ಟ್ವೀಟ್ ಮಾಡಿರುವ ಅವರು, ತಮ್ಮನ್ನು ಸಿಬಿಐ ವಿಚಾರಣೆ ನಡೆಸಿದ್ದು ಅಗತ್ಯಪಟ್ಟ ದಾಖಲೆಗಳನ್ನು ನೀಡಿದ್ದೇನೆ, ನಾನಿಲ್ಲಿ ಒಂದು ರೂಪಾಯಿಯನ್ನೂ ದುರುಪಯೋಗಪಡಿಸಿಕೊಂಡಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.