ನವದೆಹಲಿ: ಓರ್ವ ಭಾರತೀಯ ಮೀನುಗಾರನನ್ನು ಬಲಿ ಪಡೆದ ಗುಂಡಿನ ದಾಳಿ ಪ್ರಕರಣ ಸಂಬಂಧ ಕಳೆದ ಶನಿವಾರ ಬಂಧನಕ್ಕೊಳಗಾಗಿದ್ದ 85 ಭಾರತೀಯ ಮೀನುಗಾರರ ಪೈಕಿ 77 ಮೀನುಗಾರರನ್ನು ಶನಿವಾರ ಶ್ರೀಲಂಕಾ ಬಿಡುಗಡೆ ಮಾಡಿದೆ.
ಬಿಡುಗಡೆಯಾಗಿರುವ ಮೀನುಗಾರರು ಸದ್ಯ ಜಫ್ನಾದಲ್ಲಿದ್ದು, ಶೀಘ್ರದಲ್ಲೇ ಭಾರತಕ್ಕೆ ಬರಲಿದ್ದಾರೆ. ಆದರೆ ಜಪ್ತಿ ಮಾಡಿರುವ ಮೀನುಗಾರರ ಬೋಟ್ ಗಳು ಶ್ರೀಲಂಕಾದಲ್ಲಿ ಉಳಿಯಲಿವೆ.
85 ಭಾರತೀಯ ಮೀನುಗಾರರ ಪೈಕಿ 77 ಮಂದಿಯನ್ನು ಶ್ರೀಲಂಕಾ ಸರ್ಕಾರ ಬಿಡುಗಡೆ ಮಾಡಿದ್ದು, ಉಳಿದ ಮೀನುಗಾರರನ್ನು ಶೀಘ್ರದಲ್ಲಿ ಬಿಡುಗಡೆ ಮಾಡುವ ಸಾಧ್ಯತೆ ಇದೆ ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಗೋಪಾಲ್ ಬಗ್ಲಾಯ್ ಅವರು ತಿಳಿಸಿದ್ದಾರೆ.
ಶ್ರೀಲಂಕಾ ನೌಕಾಪಡೆ ಭಾರತೀಯ ಮೀನುಗಾರನನ್ನು ಗುಂಡಿಕ್ಕಿ ಹತ್ಯೆ ಮಾಡಿರುವ ಬಗ್ಗೆ ಭಾರತ ತೀವ್ರ ಕಳವಳ ವ್ಯಕ್ತಪಡಿಸಿದೆ.