ವಿಜಯವಾಡ: ಭಾರತೀಯ ಮೂಲಕ ಮಹಿಳೆ ಹಾಗೂ ಆಕೆಯ ಮಗ ನ್ಯೂಜೆರ್ಸಿಯಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆಂದು ಶುಕ್ರವಾರ ತಿಳಿದುಬಂದಿದೆ. 

ಹತ್ಯೆಯಾದವರನ್ನು ಎನ್. ಶಶಿಕಲಾ (40) ಹಾಗೂ ಆಕೆಯ 7 ವರ್ಷದ ಮಗ ಅನಿಶ್ ಸಾಯಿ ಎಂದು ಗುರ್ತಿಸಲಾಗಿದ್ದು, ಶಶಿಕಲಾ ಅವರು ವಿಜಯವಾಡದ ಪ್ರಕಾಸಂ ಜಿಲ್ಲೆಯ ನಿವಾಸಿಗಳಾಗಿದ್ದಾರೆ. 

ಹನುಮಂತ ರಾವ್ ಹಾಗೂ ಶಶಿಕಲಾ ದಂಪತಿಗಳು ವೃತ್ತಿಯಲ್ಲಿ ಸಾಫ್ಟ್'ವೇರ್ ಗಳಾಗಿದ್ದು, ಕಳೆದ 9 ವರ್ಷಗಳಿಂದಲೂ ಅಮೆರಿಕದಲ್ಲಿ ನೆಲೆಯೂರಿದ್ದಾರೆ. ಶಶಿಕಲಾ ಅವರು ಮನೆಯಲ್ಲಿದ್ದುಕೊಂಡೇ ಕಚೇರಿಯ ಕೆಲಸಗಳನ್ನು ಮಾಡುತ್ತಿದ್ದರು. ಹನುಮಂತ ಅವರು ನಿನ್ನೆ ಆಫೀಸಿಗೆ ಹೋಗಿ ಮನೆಗೆ ಬಂದಾಗ ಪತ್ನಿ ಮತ್ತು ಮಗ ಇಬ್ಬರೂ ಶವವಾಗಿ ಬಿದ್ದಿರುವುದು ಕಂಡುಬಂದಿದೆ. 

ಕೂಡಲೇ ಅವರು ಉತ್ತರ ಅಮೆರಿಕಾದ ತೆಲುಗು ಸಂಘಟನೆಗೆ ಮಾಹಿತಿ ನೀಡಿದ್ದಾರೆ. ಶಶಿಕಲಾ ಹಾಗೂ ಅನೀಶ್ ನನ್ನು ಕತ್ತುಕೊಯ್ಡು ಹತ್ಯೆ ಮಾಡಲಾಗಿದೆ ಎಂದು ತಿಳಿದುಬಂದಿದೆ. 

ಕೆಲ ದಿನಗಳ ಹಿಂದಷ್ಟೇ ಹೈದರಾಬಾದ್ ಮೂಲದ ಇಂಜಿನಿಯರ್ ಶ್ರೀನಿವಾಸ್ ಕುಚಿಬೋಟ್ಲಾ ಅವರನ್ನು ಹತ್ಯೆ ಮಾಡಲಾಗಿತ್ತು. ನಂತರ ಉದ್ಯಮಿ ಹಾರ್ನಿಷ್ ಪಟೇಲ್ ರನ್ನು ಅಮೆರಿಕದಲ್ಲಿ ಹತ್ಯೆ ಮಾಡಲಾಗಿತ್ತು. ಇದಲ್ಲದೆ, ಭಾರತೀಯರೆಂಬ ಕಾರಣಕ್ಕೆ ನಿಂದಿಸಿದ ಕೆಲ ಪ್ರಕರಣಗಳೂ ಕೂಡ ವರದಿಯಾಗಿತ್ತು.