ನವದೆಹಲಿ: ಪರೀಕ್ಷೆಗೆ ಹೆದರಿ 9 ವರ್ಷದ ಬಾಲಕಿಯೊಬ್ಬಳು ಆತ್ಮಹತ್ಯೆಗೆ ಯತ್ನಿಸಿರುವ ಘಟನೆಯೊಂದು ವಾಯುವ್ಯ ದೆಹಲಿಯ ಭರತ್ ನಗರ ಪ್ರದೇಶದಲ್ಲಿ ನಡೆದಿದೆ.
ಮಾರ್ಚ್ 21 ರಂದು ಘಟನೆ ನಡೆದಿದೆ. ಸಹೋದರ ಮನೆಯಲ್ಲಿ ಒಬ್ಬನೇ ಇದ್ದ ವೇಳೆ ರೂಮಿಗೆ ಬಂದಿರುವ ಬಾಲಕಿ ಬಟ್ಟೆ ಬದಲಿಸಬೇಕು ಹೊರಗೆ ಹೋಗೆಂದು ತಿಳಿಸಿದ್ದಾಳೆ. ಸಹೋದರ ಹೊರಗೆ ಹೋದ ನಂತರ ಬಾಗಿಲು ಹಾಕಿರುವ ಬಾಲಕಿ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದಾಳೆ.
ಗಂಟೆ ಕಳೆದರೂ ಬಾಲಕಿ ಹೊರಗೆ ಬಾರದಿರುವುದನ್ನು ಗಮನಿಸಿದ ಸಹೋದರು ಬಾಗಿಲು ತೆಗೆಯುವಂತೆ ಹೇಳಿದ್ದಾನೆ. ಈ ವೇಳೆ ಯಾವುದೇ ಪ್ರತಿಕ್ರಿಯೆ ಬಾರದ ಹಿನ್ನಲೆಯಲ್ಲಿ ಹೆದರಿದ ಆತ ಮನೆಯವರನ್ನು ಕೂಗಿದ್ದಾನೆ. ನಂತರ ನೆರೆಮನೆಯವರು ಹಾಗೂ ಕುಟುಂಬಸ್ಥರು ಸೇರಿ ಬಾಲಕಿಯನ್ನು ರಕ್ಷಣೆ ಮಾಡಿದ್ದಾರೆ. ಪರೀಕ್ಷಾ ಭಯದಿಂದಾಗಿ ಬಾಲಕಿ ಆತ್ಮಹತ್ಯೆಗೆ ಯತ್ನಿಸಿದ್ದಾಳೆಂದು ವರದಿಗಳು ತಿಳಿಸಿವೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.