ಶ್ರೀನಗರ: ಪಾಕಿಸ್ತಾನ ಸೇನೆ ಮತ್ತೆ ಕದನ ವಿರಾಮ ಉಲ್ಲಂಘನೆ ಮಾಡಿದ್ದು, ಮೆಂದಾರ್ ಸೆಕ್ಟರ್ ನಲ್ಲಿ ಭಾರತೀಯ ಪೋಸ್ಚ್ ಗಳನ್ನು ಗುರಿಯಾಗಿಸಿಕೊಂಡು ಗುಂಡಿನ ದಾಳಿ ನಡೆಸಿದೆ.

ಬುಧವಾರ ಮುಂಜಾನೆ ಮೆಂಧಾರ್ ನ ಮನ್ ಕೋಟೆ ಪ್ರದೇಶದಲ್ಲಿ ಮೇಲೆ ಪಾಕಿಸ್ತಾನ ಸೈನಿಕರು ಗುಂಡಿನ ದಾಳಿ ಆರಂಭಿಸಿದ್ದು, ಭಾರತೀಯ ಸೈನಿಕರು ಕೂಡ ಪಾಕ್ ಸೈನಿಕರಿಗೆ ದಿಟ್ಟ ಉತ್ತರ ನೀಡುತ್ತಿದ್ದಾರೆ. ಈ ವರೆಗೂ ಗುಂಡಿನ  ಚಕಮಕಿ ನಡೆಯುತ್ತಿದ್ದು, ಯಾವುದೇ ಸಾವುನೋವಿನ ಕುರಿತು ವರದಿಯಾಗಿಲ್ಲ.

ಇನ್ನು ಇದೇ ಭಾನುವಾರ ಭಾರತದ ಗಡಿಯೊಳಗೆ ನುಸುಳಿದ್ದ ಪಾಕಿಸ್ತಾನ ಸೈನಿಕರು ಇಬ್ಬರು ಭಾರತೀಯ ಯೋಧರನ್ನು ಕೊಂದು ಅವರ ಶಿರಚ್ಛೇದ ಮಾಡಿದ್ದರು. ಈ ಸಂಬಂಧ ತಕ್ಕ ಪ್ರತಿಕ್ರಿಯೆ ನೀಡಿದ್ದ ಭಾರತೀಯ ಸೇನೆ  ಪಾಕಿಸ್ತಾನ ಗಡಿಯಲ್ಲಿನ 7 ಸೇನಾ ಪೋಸ್ಟ್ ಗಳನ್ನು ಧ್ವಂಸಗೊಳಿಸಿತ್ತು. ಈ ವೇಳೆ ಹಲವು ಪಾಕ್ ಸೈನಿಕರು ಹತರಾಗಿದ್ದರು ಎಂದು ತಿಳಿದುಬಂದಿದೆ. ಇಷ್ಟೆಲ್ಲಾ ಆದರೂ ಪಾಕಿಸ್ತಾನ ಮಾತ್ರ ತಮ್ಮ ಸೈನಿಕರು ಭಾರತೀಯ ಯೋಧರ  ಶಿರಚ್ಛೇದ ಮಾಡಿಲ್ಲ ಎಂದು ತನ್ನ ಮೊಂಡುವಾದ ಮಂಡಿಸುತ್ತಿದೆ.