ನವದೆಹಲಿ: ಭಾರತ-ಪಾಕಿಸ್ತಾನದ ಗಡಿ ನಿಯಂತ್ರಣ ಪ್ರದೇಶದಲ್ಲಿ ಪ್ರಕ್ಷುಬ್ಧತೆ ಎದುರಾಗಿರುವುದು ಒಂದೆಡೆಯಾದರೆ, ಮತ್ತೊಂದು ಬದಿಯ ಗಡಿಯಲ್ಲಿ ಚೀನಾದಿಂದ ತಲೆನೋವು ಎದುರಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಚೀನಾವನ್ನು ಗಡಿ ಭಾಗದಲ್ಲಿ ಹದ್ದುಬಸ್ತಿನಲ್ಲಿಡಲು ಭಾರತ ವಾಸ್ತವಿಕ ನಿಯಂತ್ರಣ ಗಡಿಯಲ್ಲಿ ತನ್ನ ಪಡೆಗಳ ಸಾಮರ್ಥ್ಯವನ್ನು ಹೆಚ್ಚಿಸಲು ಕ್ರಮ ಕೈಗೊಂಡಿದೆ. 

ಚೀನಾದೊಂದಿಗಿನ 4,507 ಕಿ.ಮೀ ಉದ್ದದ ವಾಸ್ತವಿಕ ನಿಯಂತ್ರಣ ಗಡಿ(ಎಲ್ಎಸಿ) ಯಲ್ಲಿ ಮೌಂಟೇನ್ ಸ್ಟ್ರೈಕ್ ಕಾರ್ಪ್ಸ್ ಅಡಿಯಲ್ಲಿ 2 ನೇ ವಿಭಾಗವನ್ನು ಪ್ರಾರಂಭಿಸಿ ಲಡಾಕ್ ನ ಪ್ರಾಂತ್ಯದಲ್ಲಿ ಸೇನಾ ತಾಲೀಮು ನಡೆಸಲು ಭಾರತ ಸಿದ್ಧತೆ ನಡೆಸಿದೆ. 

ಈಶಾನ್ಯ ಭಾಗದ ಗಡಿ ಪ್ರದೇಶದಲ್ಲಿ ಹೊಸ ಮೌಂಟೇನ್ ಸ್ಟ್ರೈಕ್ ಕಾರ್ಪ್ಸ್ ನ 2 ನೇ ವಿಭಾಗ ಪ್ರಾರಂಭವಾಗಲಿದ್ದು, ಈಶಾನ್ಯದ ಗಡಿಯಲ್ಲಿ ಚೀನಾದ ಪುಂಡಾಟಿಕೆಗೆ ಅಂಕುಶ ಹಾಕಲು ಭಾರತೀಯ ಸೇನೆ ಸನ್ನದ್ಧವಾಗಿರಲಿದೆ. ರಕ್ಷಣಾ ಇಲಾಖೆಯ ಮಾಹಿತಿಯ ಪ್ರಕಾರ ಹೊಸ 72 ಇನ್ ಫಾಂಟ್ರಿ ವಿಭಾಗದ ಕೇಂದ್ರ ಕಚೇರಿ ಪಠಾಣ್ ಕೋಟ್ ನಲ್ಲಿರಲಿದ್ದು, ಇನ್ನು 3 ವರ್ಷಗಳಲ್ಲಿ ಪೂರ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸಲಿದೆ, ಮೊದಲ ಹಂತದಲ್ಲಿ ಒಂದು ಬ್ರಿಗೇಡ್ ನ್ನು ಮಾತ್ರ ಪ್ರಾರಂಭಿಸಲಾಗುತ್ತದೆ. ಪೂರ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸಲು ಪ್ರಾರಂಭವಾದ ನಂತರ  ಮೌಂಟೇನ್ ಸ್ಟ್ರೈಕ್ ಕಾರ್ಪ್ಸ್ ಅಡಿಯಲ್ಲಿ ಒಟ್ಟು 3 ಬ್ರಿಗೇಡ್ ಗಳು ಕಾರ್ಯನಿರ್ವಹಿಸಲಿವೆ ಎಂದು ತಿಳಿದುಬಂದಿದೆ. 

ಭಾರತೀಯ ಸೇನೆಯಲ್ಲಿ 2014 ರ ವರೆಗೂ ಇದ್ದ ಮೌಂಟೇನ್ ಸ್ಟ್ರೈಕ್ ಕಾರ್ಪ್ಸ್ ನ ಸಿಬ್ಬಂದಿಗಳು ಬಹುತೇಕ ಪಾಕಿಸ್ತಾನದಿಂದ ಎದುರಾಗುವ ಸಮಸ್ಯೆ, ಅಪಾಯಗಳನ್ನೇ ನಿರ್ವಹಿಸುತ್ತಿದ್ದರು. ಈ ಕಾರಣದಿಂದ ಭಾರತ-ಚೀನಾ ಗಡಿ ಪ್ರದೇಶದಲ್ಲಿ ಸಿಬ್ಬಂದಿಗಳ ಕೊರತೆ ಎದುರಾಗಿತ್ತಾದ್ದರಿಂದ 2014 ರಲ್ಲಿ ಭಾರತ ಸರ್ಕಾರ 17 ಹೊಸ ಮೌಂಟೇನ್ ಸ್ಟ್ರೈಕ್ ಕಾರ್ಪ್ಸ್ ನ್ನು ಪ್ರಾರಂಭಿಸಲು ಕ್ರಮ ಕೈಗೊಂಡಿತ್ತು.