ಚಂಡೀಗಢ: ದುಷ್ಕರ್ಮಿಗಳ ದಾಳಿಗೊಳಗಾಗಿ ಹತ್ಯೆಗೀಡಾಗಿದ್ದ ಹಿರಿಯ ಪತ್ರಕರ್ತ ಕೆ.ಜೆ ಸಿಂಗ್ ಅವರ ಮೃತದೇಹದ ಮೇಲೆ 14-17 ಬಾರಿ ಇರಿದಿರುವ ಗಾಯಗಳಿದ್ದವು ಎಂದು ಮರಣೋತ್ತರ ಪರೀಕ್ಷೆ ನಡೆಸಿದ್ದ ವೈದ್ಯರು ಹೇಳಿದ್ದಾರೆ. 

ಕೆಲ ದಿನಗಳ ಹಿಂದಷ್ಟೇ ಸಿಂಗ್ ಅವರ ಮನೆಯೊಳಗೆ ನುಗ್ಗಿದ್ದ ದುಷ್ಕರ್ಮಿಗಳ ಗುಂಪೊಂದು ಪತ್ರಕರ್ತ ಕೆ.ಜೆ. ಸಿಂಗ್ ಅವರ ಕತ್ತು ಸೀಳಿ ಬರ್ಬರವಾಗಿ ಹತ್ಯೆ ಮಾಡಿತ್ತು. ಇದೇ ವೇಳೆ ಮನೆಯಲ್ಲಿದ್ದ ಸಿಂಗ್ ಅವರ ತಾಯಿ ಗುರುಚರಣ್ ಕೌರ್ ಅವರ ಉಸಿರುಗಟ್ಟಿಸಿ ಕೊಲೆ ಮಾಡಿಲಾಗಿತ್ತು. 

ಹತ್ಯೆ ಬಳಿಕ ಮೂರು ಸದಸ್ಯರ ಸರ್ಕಾರಿ ನಾಗರೀಕ ಆಸ್ಪತ್ರೆ ವೈದ್ಯರ ತಂಡ ಸಿಂಗ್ ಅವರ ಮೃತದೇಹವನ್ನು ಮರಣೋತ್ತರ ಪರೀಕ್ಷೆ ನಡೆಸಿತ್ತು. ಪರೀಕ್ಷೆ ವೇಳೆ ಸಿಂಗ್ ಅವರ ದೇಹದ ಮೇಲೆ 14-17 ಬಾರಿ ಚೂರಿಯಿಂದ ಇರಿದಿರುವ ಗಾಯಗಳಿರುವುದು ಕಂಡು ಬಂದಿದೆ. ಈಗಾಗಲೇ ಮರಣೋತ್ತರ ವರದಿಯನ್ನು ಸಿದ್ಧಪಡಿಸಿರುವ ವೈದ್ಯರ ತಂಡ ಶೀಘ್ರದಲ್ಲಿಯೇ ವಿಶೇಷ ತನಿಖಾಧಿಕಾರಿಗಳ ವಶಕ್ಕೆ ನೀಡಲಿದೆ. 

ಹತ್ಯೆಯಾದ ಬಳಿಕ ಪತ್ರಕರ್ತ ಸಿಂಗ್ ಹಾಗೂ ಆವರ ತಾಯಿಯವರ ಫೋನ್ ಗಳು ಕಾಣೆಯಾಗಿದ್ದು, ತನಿಖೆ ನಡೆಸುತ್ತಿರುವ ಅಧಿಕಾರಿಗಳು ಇದೀಗ ಸಿಂಗ್ ಅವರ ದೂರವಾಣಿ ಕರೆಗಳ ಮಾಹಿತಿಗಳನ್ನು ಕಲೆಹಾಕುತ್ತಿದ್ದಾರೆಂದು ಮೂಲಗಳು ತಿಳಿಸಿವೆ. 

ಈಗಾಗಲೇ ಸಿಂಗ್ ಅವರ ಎರಡು ನೆರೆಮನೆಗಳಲ್ಲಿರುವ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲನೆ ನಡೆಸಿರುವ ಅಧಿಕಾರಿಗಳು, ವಿಚಾರಣೆ ನಡೆಸುತ್ತಿದ್ದಾರೆಂದು ತಿಳಿದುಬಂದಿದೆ.