ಮೋದಿ ಸರ್ಕಾರದ ವಿರುದ್ಧ ಏನನ್ನೇ ಬರೆದರೂ ಅಂತಹ ಮಾಧ್ಯಮಗಳನ್ನು ಟಾರ್ಗೆಟ್ ಮಾಡಲಾಗುತ್ತಿದೆ ಎಂದು ಮಲ್ಲಿಕಾರ್ಜುನ ಖರ್ಗೆ ಆರೋಪಿಸಿದ್ದು, ಮೋದಿ ಹೇಳುವುದು ಸತ್ಯವೋ ಸುಳ್ಳೋ ಎಂದು ಪರೀಕ್ಷಿಸಲು ಹೊರಟ ಒಂದು ನ್ಯೂಸ್ ಚಾನಲ್ ನ ಇಬ್ಬರು ಪತ್ರಕರ್ತರನ್ನು ಸಂಸ್ಥೆಯಿಂದ ತೆಗೆದುಹಾಕಲಾಗಿದೆ ಎಂದು ಆರೋಪಿಸಿದ್ದಾರೆ.

ಕಾಂಗ್ರೆಸ್ ಆರೋಪವನ್ನು ಆಡಳಿತಾರೂಢ ಬಿಜೆಪಿ ತಳ್ಳಿಹಾಕಿದ್ದು, ಮಾಹಿತಿ ಮತ್ತು ಪ್ರಸಾರ ಸಚಿವ ರಾಜ್ಯವರ್ಧನ್ ರಾಥೋಡ್  ಸ್ವತಃ ಪ್ರತಿಕ್ರಿಯೆ ನೀಡಿದ್ದು, ನ್ಯೂಸ್ ಚಾನಲ್ ಮೊದಲಿಗೆ ಪ್ರಸಾರ ಮಾಡಿದ್ದ ಸುದ್ದಿ ತಪ್ಪಾಗಿತ್ತು, ಆದರೆ ಅದಕ್ಕಾಗಿ ಶೋಕಾಸ್ ನೊಟೀಸ್ ಜಾರಿಗೊಳಿಸಿಲ್ಲ. ಆದರೆ ಎಲ್ಲದ್ದಕ್ಕೂ ಸರ್ಕಾರವನ್ನು ದೂರುವುದು ವಿಪಕ್ಷಗಳ ಹವ್ಯಾಸ ಎಂದು ಹೇಳಿದ್ದಾರೆ.

ಸಂಸತ್ ನ ಶೂನ್ಯ ವೇಳೆಯಲ್ಲಿ ಈ ವಿಷಯವನ್ನು ಪ್ರಸ್ತಾಪಿಸಿದ ಮಲ್ಲಿಕಾರ್ಜುನ ಖರ್ಗೆ, ಬರಹ ಹಾಗೂ ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಆರ್ಟಿಕಲ್ 19 ರ ಅಡಿಯಲ್ಲಿ ಅವಕಾಶವಿದೆ. ಆದರೆ ಮಾಧ್ಯಮಗಳ ಮೇಲೆಯೇ ನಿಷೇಧ ವಿಧಿಸುವುದು ವಿಷಾದನೀಯ, ಸರ್ಕಾರದ ವಿರುದ್ಧ ಬರೆದವರು ಹಾಗೂ ಸರ್ಕಾರ ಹೇಳುತ್ತಿರುವ ನೈಜತೆಯನ್ನು ಪರೀಕ್ಷಿಸಲು ನಿಂತರೆ ಅಂತಹವರನ್ನು ಬೆದರಿಸಿ, ಸದ್ದಡಗಿಸಲಾಗುತ್ತಿದೆ ಎಂದು ಖರ್ಗೆ ಆರೋಪಿಸಿದ್ದರು. ಇದಕ್ಕೆ ಉದಾಹರಣೆಯನ್ನೂ ನೀಡಿದ್ದ ಖರ್ಗೆ, ಮೋದಿ ಹೇಳಿದ್ದರ ಬಗ್ಗೆ ರಿಯಾಲಿಟಿ ಚೆಕ್ ಮಾಡಲು ಯತ್ನಿಸಿದ ಎಬಿಪಿ ನ್ಯೂಸ್ ಚಾನಲ್ ನ ಇಬ್ಬರು ಹಿರಿಯ ನೌಕರರನ್ನು ರಾಜೀನಾಮೆ ನೀಡುವಂತೆ ಸೂಚನೆ ನೀಡಲಾಗಿದೆ ಎಂದು ಹೇಳಿದ್ದಾರೆ. 

ಆದರೆ ಮಧ್ಯ ಪ್ರವೇಶಿಸಿದ ಸ್ಪೀಕರ್ ಸುಮಿತ್ರಾ ಮಹಾಜನ್, ಈ ವಿಷಯ ಖಾಸಗಿ ಮಾಧ್ಯಮವೊಂದಕ್ಕೆ ಸಂಬಂಧಿಸಿದ್ದಾಗಿದೆ ಎಂದು ಹೇಳಿದ್ದರೆ ಅಷ್ಟೇ ಅಲ್ಲದೇ ನೀವು ಆರೋಪ ಮಾಡುತ್ತಿರುವ ವಿಷಯದ ಬಗ್ಗೆ ಸೂಕ್ತ ಅಂಕಿ-ಅಂಶಗಳಿವೆಯೇ ಎಂದು ಪ್ರಶ್ನಿಸಿದ್ದಾರೆ.