ಈ ವಾರ ಸಂಸತ್ ನಲ್ಲಿ ಮಂಡನೆಯಾದ ಸಿಎಜಿ ವರದಿಯಲ್ಲಿ ರೈಲ್ವೆ ಇಲಾಖೆ ರೈಲುಗಳ ಸಮಯ ಪಾಲನೆ ಬಗ್ಗೆಯೂ ಉಲ್ಲೇಖಿಸಿರುವ ಸಿಎಜಿ, ನಿಲ್ದಾಣ ಅಭಿವೃದ್ಧಿ ಯೋಜನೆಗಳಲ್ಲಿ ಪ್ರಯಾಣಿಕರ ಸೌಲಭ್ಯಗಳ ಸುಧಾರಣೆ, ರೈಲು ನಿಲ್ದಾಣದ ಹೊರನೋಟದ ಬಗ್ಗೆಯೇ ಹೆಚ್ಚು ಗಮನಹರಿಸಲಾಗಿದೆಯೇ ಹೊರತು ರೈಲುಗಳ ಸಮಯ ಪಾಲನೆಯನ್ನು ಸುಧಾರಿಸುವ ಬಗ್ಗೆ ಹೆಚ್ಚು ಗಮನಹರಿಸಲಾಗಿಲ್ಲ ಎಂದು ಹೇಳಿದೆ. 

15 ನಿಲ್ದಾಣಗಳಲ್ಲಿ ಪ್ರತಿ ದಿನ ನಿರ್ವಹಿಸಲ್ಪಡುವ ರೈಲುಗಳ ಸಂಖ್ಯೆ ಗಣನೀಯವಾಗಿ ಎರಿಕೆಯಾಗಿದೆ. ಆದರೆ ಪ್ಲ್ಯಾಟ್ಫಾರ್ಮ್ ಗಳು, ರೈಲು ನಿಲ್ದಾಣಗಳಲ್ಲಿನ ಲೈನ್ ಗಳ ಸ್ಥಿರತೆಯನ್ನೂ ಸಹ ಅದಕ್ಕೆ ತಕ್ಕಂತೆ ಸುಧಾರಣೆ ಮಾಡಲಾಗಿಲ್ಲ ಎಂದು ಸಿಎಜಿ ಹೇಳಿದೆ. 

ಮಾರ್ಚ್ 2017 ರ ವರೆಗೂ ಇರುವ ಮಾಹಿತಿಯ ಪ್ರಕಾರ 15 ನಿಲ್ದಾಣಗಳಲ್ಲಿ 2,436 ರೈಲುಗಳನ್ನು ನಿರ್ವಹಣೆ ಮಾಡಲಾಗುತ್ತಿದೆ, ಈ ಪಕಿ 638 ರೈಲುಗಳು 24 ಅಥವಾ ಅದಕ್ಕಿಂತ ಹೆಚ್ಚು ಕೋಚ್ ಗಳನ್ನು ಹೊಂದಿದ್ದು, ಪ್ರತಿ ನಿತ್ಯ ಸಂಚರಿಸುತ್ತವೆ. ಈ ರೈಲುಗಳ ನಿಲುಗಡೆಗೆ ಪೂರಕವಾಗಿ ಸಾಕಷ್ಟು ಉದ್ದವಿರುವ  ಪ್ಲ್ಯಾಟ್ಫಾರ್ಮ್ ಅಗತ್ಯವಿದ್ದು,  ಲೈನ್ ಗಳ ಸ್ಥಿರತೆಯನ್ನೂ ಕಾಯ್ದುಕೊಳ್ಳಬೇಕಿದೆ ಎಂದು ಸಿಎಜಿ ವರದಿ ಹೇಳಿದೆ.

ಸಾಕಷ್ಟು ಪ್ಲಾಟ್ಫಾರ್ಮ್ ಗಳ ಕೊರತೆ ಇರುವುದು ಸಹ ರೈಲುಗಳು ಸರಿಯಾದ ಸಮಯಕ್ಕೆ ಬಾರದೇ ಇರುವುದಕ್ಕೆ ಇರುವ ಪ್ರಮುಖ ಕಾರಣ ಎಂದು ಸಿಎಜಿ ತನ್ನ ವರದಿಯಲ್ಲಿ ಹೇಳಿದೆ. ರೈಲುಗಳ ಸಮಯ ಪಾಲನೆಗೆ ಸಿಎಜಿ ರೈಲ್ವೆಯ ಎಲ್ಲಾ ವಿಭಾಗಗಳಿಗೂ ಕೆಲವು ಸಲಹೆ ಸೂಚನೆಗಳನ್ನು ನೀಡಿದ್ದು, ಸಮಗ್ರ ಯೋಜನೆಯನ್ನು ರೂಪಿಸಬೇಕೆಂದು ಹೇಳಿದೆ. ಮುಂದಿನ ಹಂತದ ಯೋಜನೆಯನ್ನು ರೂಪಿಸುವಾಗ ಹೆಚ್ಚು ಪ್ಲಾಟ್ ಫಾರ್ಮ್ ಗಳನ್ನು ಸೇರಿಸುವುದರ ಬಗ್ಗೆಯೂ ರೈಲ್ವೆ ಹೆಚ್ಚಿನ ಗಮನ ನೀಡಬೇಕಿದೆ ಎನ್ನುತ್ತಿದೆ ಸಿಎಜಿ ವರದಿ.