ಶ್ರೀನಗರ: ಭಾರತ ಹಾಗೂ ಪಾಕಿಸ್ತಾನ ನಡುವೆ ಉತ್ತಮ ಬಾಂಧವ್ಯ ಮತ್ತು ಶಾಂತಿ ಸ್ಥಾಪನೆಯಾದರೆ ಅದು ಅಜಾತಶತ್ರು, ಮಾಜಿ ಪ್ರಧಾನಿ, ಭಾರತ ರತ್ನ ಅಟಲ್ ಬಿಹಾರಿ ವಾಜಪೇಯಿ ಅವರಿಗೆ ಸಲ್ಲಿಸುವ ಮಹಾನ್ ಗೌರವ ಎಂದು ನ್ಯಾಷನಲ್ ಕಾನ್ಫೆರೆನ್ಸ್ ನ ಅಧ್ಯಕ್ಷ ಫಾರೂಖ್ ಅಬ್ದುಲ್ಲಾ ಅವರು ಶುಕ್ರವಾರ ಹೇಳಿದ್ದಾರೆ.

ಇಂದು ಎಎನ್ಐ ಜೊತೆ ಮಾತನಾಡಿದ ವಾಜಪೇಯಿ ಒಬ್ಬ ಮಹಾನ್ ವ್ಯಕ್ತಿ. ಅವರಲ್ಲಿದ್ದ ಮೌಲ್ಯಗಳನ್ನು ಮತ್ತೊಬ್ಬ ನಾಯಕರಲ್ಲಿ ನೋಡಲು ಸಾಧ್ಯವೇ ಇಲ್ಲ. ಅವರು ಆರ್ ಎಸ್ಎಸ್ ಮತ್ತು ಭಾರತೀಯಜನಸಂಘದಿಂದ ಬಂದಿದ್ದರೂ ಸಿದ್ಧಾಂತ ಬೇರೆಯೇ ಆಗಿತ್ತು. ವಾಜಪೇಯಿ ಅವರು ಭಾರತ ಎಲ್ಲರ ದೇಶವಾಗಬೇಕು ಎಂದು ಬಯಸಿದ್ದರು. ಅಲ್ಲದೆ ಪಾಕಿಸ್ತಾನದೊಂದಿಗೆ ಉತ್ತಮ ಸ್ನೇಹ ಹೊಂದಬೇಕು ಎಂದು ಬಯಸಿದ್ದರು. ಆದರೆ ದುರಾದೃಷ್ಟವಶಾತ್ ಅದನ್ನು ಸಾಧಿಸಲು ಅವರಿಂದ ಸಾಧ್ಯವಾಗಲಿಲ್ಲ ಎಂದರು.

ಸದ್ಯದ ಕೇಂದ್ರ ಸರ್ಕಾರ ಮತ್ತು ಪಾಕಿಸ್ತಾನದ ಇಮ್ರಾನ್ ಖಾನ್ ಸರ್ಕಾರ ವಾಜಪೇಯಿ ಅವರ ಕನಸು ನನಸು ಮಾಡುವ ವಿಶ್ವಾಸವಿದೆ ಮತ್ತು ಅದುವೇ ಅಜಾತಶತ್ರುವಿಗೆ ಸಲ್ಲಿಸುವ ಮಹಾನ್ ಗೌರವ್ ಎಂದು ಅಬ್ದುಲ್ಲಾ ಹೇಳಿದ್ದಾರೆ.

ಇನ್ನು ವಾಜಪೇಯಿ ಅವರ ನಿಧನಕ್ಕೆ ಸಂತಾಪ ಸೂಚಿಸಿದ ಪಾಕ್ ನಿಯೋಜಿತ ಪ್ರಧಾನಿ ಇಮ್ರಾನ್ ಖಾನ್ ಅವರು, ದಿವಂಗತ ಅಟಲ್ ಬಿಹಾರಿ ವಾಜಪೇಯಿ ಅವರ ಶಾಂತಿಯ ಕನಸನ್ನು ನನಸು ಮಾಡುವ ಬಹುದೊಡ್ಡ ಜವಾಬ್ದಾರಿ ನಮ್ಮ ಮೇಲಿದೆ ಎಂದು ಹೇಳಿದ್ದಾರೆ.