ನವದೆಹಲಿ: ಕೇಂದ್ರ ಹಣಕಾಸು ಸಚಿವ ಅರುಣ್ ಜೇಟ್ಲಿ ದೆಹಲಿ ಸಿಎಂ ಅರವಿಂದ್ ಕೇಜ್ರಿವಾಲ್ ವಿರುದ್ಧ ದಾಖಲಿಸಿರುವ ಮಾನನಷ್ಟ ಮೊಕದ್ದಮೆಯಲ್ಲಿ ಅರುಣ್ ಜೇಟ್ಲಿ ಅವರ ಪಾಟಿಸವಾಲನ್ನು ಜಂಟಿ ರಿಜಿಸ್ಟಾರ್ ನಿಂದ ಏಕಸದಸ್ಯ ಪೀಠಕ್ಕೆ ವರ್ಗಾವಣೆ ಮಾಡಿ ಕೋರ್ಟ್ ಆದೇಶ ಹೊರಡಿಸಿದೆ. 

ನ್ಯಾ.ಮನಮೋಹನ್ ಈ ಬಗ್ಗೆ ಆದೇಶ ಹೊರಡಿಸಿದ್ದು, ಹಣಾಕಾಸು ಸಚಿವ ಅರುಣ್ ಜೇಟ್ಲಿ ಅವರನ್ನು ಏಕಸದಸ್ಯ ಪೀಠದೆದುರು ಪಾಟಿಸವಾಲಿಗೆ ಒಳಪಡಬೇಕು, ಜಂಟಿ ರಿಜಿಸ್ಟಾರ್ ಎದುರಲ್ಲ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲದೇ ಫೆ.12 ರೊಳಗೆ ಜೇಟ್ಲಿ ಪಾಟಿಸವಾಲನ್ನು ಪೂರ್ಣಗೊಳಿಸುವಂತೆ ಕೇಜ್ರಿವಾಲ್ ಪರ ವಕೀಲರಿಗೆ ನೀಡಲಾಗಿದ್ದ ಈ ಹಿಂದಿನ ಆದೇಶವೂ ಅನ್ವಯವಾಗುವುದಿಲ್ಲ ಎಂದು ದೆಹಲಿ ಹೈಕೋರ್ಟ್ ಹೇಳಿದೆ. 

ಕೇಂದ್ರ ಸಚಿವರಿಗೆ ಕೇಳಬೇಕಿರುವ ಪ್ರಶ್ನೆಗಳ ಪ್ರಸ್ತುತತೆ, ಪಾಟಿಸವಾಲು ಮುಕ್ತಾಯಗೊಳಿಸಬೇಕಿರುವ ಅವಧಿಯನ್ನೂ ಸಹ ಏಕಸದಸ್ಯ ಪೀಠ ತೀರ್ಮಾನಿಸುತ್ತದೆ ಎಂದು ಹೈಕೋರ್ಟ್ ಹೇಳಿದೆ.