ಮುಂಬೈ: ವಜ್ರಾಭರಣ ವ್ಯಾಪಾರಿ ನೀರವ್ ಮೋದಿ ತಲೆಮರೆಸಿಕೊಂಡಿಲ್ಲ, ಉದ್ಯಮ ಸಂಬಂಧ ವಿದೇಶಕ್ಕೆ ತೆರಳಿದ್ದಾರೆಂದು ನೀರವ್ ಮೋದಿ ಪರ ವಕೀಲ ವಿಜಯ್ ಅಗರ್ವಾಲ್ ಅವರು ಬುಧವಾರ ಹೇಳಿದ್ದಾರೆ. 

ಬಹುಕೋಟಿ ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಹಗರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾಧ್ಯಮಗಳೊಂದಿಗೆ ಮಾತನಾಡಿರುವ ಅವರು, ನೀರವ್ ಮೋದಿ ತಲೆ ಮರೆಸಿಕೊಂಡಿಲ್ಲ, ಉದ್ಯಮದ ಉದ್ದೇಶದಿಂದ ವಿದೇಶಕ್ಕೆ ತೆರಳಿದ್ದಾರೆಂದು ಹೇಳಿದ್ದಾರೆ. 

ನೀರವ್ ಮೋದಿ ತಲೆಮರೆಸಿಕೊಂಡಿದ್ದಾರೆಂಬುದು ನಿಮ್ಮ ಆಲೋಚನೆಗಳಷ್ಟೇ. ನೀರವ್ ಮೋದಿ ಅಂತರಾಷ್ಟ್ರದ ಮಟ್ಟದಲ್ಲಿ ವ್ಯವಹಾರ ನಡೆಸುತ್ತಿದ್ದು, ಅವರು ತಲೆಮರೆಸಿಕೊಂಡಿಲ್ಲ. ಉದ್ಯಮದ ಉದ್ದೇಶದಿಂದ ಭಾರತದಿಂದ ಹೊರಗೆ ಹೋಗಿದ್ದಾರೆ. ಪ್ರಕರಣ ಬೆಳಕಿಗೆ ಬಂದ ಬಳಿಕ ಅವರ ಪಾಸ್'ಪೋರ್ಟ್ ರದ್ದು ಮಾಡಲಾಗಿದೆ. ನೀರವ್ ಕುಟುಂಬಸ್ಥರಲ್ಲಿ ಕೆಲವರು ವಿದೇಶಿಗರಾಗಿದ್ದು, ಯಾವಾಗಲೂ ಅವರು ಹೊರಗಡೆಯೇ ಇರುತ್ತಾರೆಂದು ಸಮರ್ಥಿಸಿಕೊಂಡಿದ್ದಾರೆ. 

ವಾಣಿಜ್ಯ ವಹಿವಾಟನ್ನು ಪಂಜಾಬ್ ನ್ಯಾಷನಲ್ ಬ್ಯಾಂಕ್ ವಂಚನೆ ಎಂದು ಹೇಳುತ್ತಿದೆ. ಇಡೀ ಪ್ರಕರಣದ ಬಗ್ಗೆ ಬ್ಯಾಂಕ್'ಗೆ ಗೊತ್ತಿದೆ. ಬ್ಯಾಂಕ್ ಕೋಟ್ಯಾಂತರ ರೂಪಾಯಿ ಕಮಿಷನ್ ಪಡೆದು. ಇದೀಗ ಅದನ್ನು ಒಪ್ಪಿಕೊಳ್ಳುತ್ತಿಲ್ಲ. ಇದೊಂದು ವಾಣಿಜ್ಯ ವಹಿವಾಟಾಗಿದ್ದು, ಇದನ್ನು ವಂಚನೆ ಎಂದು ಬ್ಯಾಂಕ್ ಹೇಳುತ್ತಿದೆ ಎಂದು ಆರೋಪಿಸಿದ್ದಾರೆ. 

ರೂ.5,000 ಕೋಟಿ ಆಸ್ತಿಯನ್ನು ಬಿಟ್ಟು ನೀರವ್ ಮೋದಿ ಏಕೆ ದೇಶ ಬಿಟ್ಟು ಓಡುಹೋಗುತ್ತಾರೆ? ಸಿಬಿಐ ಅಧಿಕಾರಿಗಳು ಚಾರ್ಜ್ ಶೀಟ್ ಸಲ್ಲಿಸಿದ ಬಳಿಕ ಪ್ರಕರಣದ ಎಲ್ಲಾ ವಿಚಾರಗಳು ಬಹಿರಂಗಗೊಳ್ಳಲಿದೆ. ನೀರವ್ ಮೋದಿಯವರ ಎಲ್ಲಾ ವ್ಯವಹಾರಗಳು ಬಂದ್ ಆಗಿದೆ. ಬ್ಯಾಂಕ್ ಖಾತೆಗಳಿಗೆ ಮುಟ್ಟುಗೋಲು ಹಾಕಲಾಗಿದೆ. ಎಲ್ಲಾ ಅಂಗಡಿಗಳು ಬಂದ್ ಆಗಿವೆ. ಇಂತಹ ಸಂದರ್ಭದಲ್ಲಿ ಎಲ್ಲವೂ ಕತ್ತಲೆ ಕವಿದಂತೆ ಕಾಣುತ್ತಿದೆ. ಸಿಬಿಐ ಚಾರ್ಜ್ ಶೀಟ್ ಸಲ್ಲಿಸಿದ ಬಳಿಕವಷ್ಟೇ ಎಲ್ಲಾ ತಂತ್ರಗಳು ಕೆಲಸ ಮಾಡಲಿದೆ ಎಂದು ತಿಳಿಸಿದ್ದಾರೆ.