ಮುಂಬೈ: ಸಂಜಯ್ ದತ್ ಜೀವನ ಚರಿತ್ರೆಯ ಸಿನಿಮಾ ಬಗ್ಗೆ ಆರ್ ಎಸ್ ಎಸ್ ಟೀಕೆ ಮಾಡಿದ್ದು, ಭಾರತೀಯ ಸಿನಿಮಾಗಳ ನೈತಿಕ ಮಟ್ಟ ಹಾಳಾಗಿದೆ ಎಂಬುದಕ್ಕೆ ಸಂಜು ಸಿನಿಮಾ ಉದಾಹರಣೆ ಎಂದು ಹೇಳಿದೆ. 

ಆರ್ ಎಸ್ಎಸ್ ನ ಮುಖವಾಣಿ ಪಾಂಚಜನ್ಯದಲ್ಲಿ ಸಂಜು ಚಿತ್ರದ ಬಗ್ಗೆ ಅಭಿಪ್ರಾಯ ವ್ಯಕ್ತಪಡಿಸಿದ್ದು, ಹಿಂದಿ ಸಿನಿಮಾಗಳೇಕೆ ಕಳಂಕಿತ ವ್ಯಕ್ತಿತ್ವಗಳತ್ತ ಆಕರ್ಷಿತವಾಗುತ್ತವೆ ಎಂದು ಪ್ರಶ್ನಿಸಿದೆ. ಸುನಿಲ್ ದತ್ ಹಾಗೂ ನರ್ಗಿಸ್ ದತ್ ಪುತ್ರನಾಗಿರುವ ಸಂಜಯ್ ದತ್ ಗೆ  ಮಾದರಿ, ಆದರ್ಶ ವ್ಯಕ್ತಿಯನ್ನಾಗಿ ಬಿಂಬಿಸುವ, ತೆರೆ ಮೇಲೆ ವೈಭವದಿಂದ ತೋರಿಸುವ ಗುಣಗಳೇನಿವೆ ಎಂದು ಆರ್ ಎಸ್ಎಸ್ ಮುಖವಾಣಿ ಪ್ರಶ್ನಿಸಿದೆ. 

ಸಂಜು ಸಿನಿಮಾದ ಮೂಲಕ ಸಿನಿಮಾ ನಿರ್ದೇಶಕರು ಹಣ ಗಳಿಸುತ್ತಿದ್ದರೆ ಅದು ಭಾರತೀಯ ಸಿನಿಮಾಗಳ ನೈತಿಕತೆ ಹಾಳಾಗಿದೆ ಎಂಬುದಕ್ಕೆ ಉದಾಹರಣೆ ಎಂದು ಆರ್ ಎಸ್ ಎಸ್ ಹೇಳಿದೆ. ಇದೇ ವೇಳೇ ರಾಜ್ ಕುಮಾರ್ ಹಿರಾನಿ ಅವರ ಪಿಕೆ ಸಿನಿಮಾ ಬಗ್ಗೆಯೂ ಆರ್ ಎಸ್ಎಸ್ ಆಕ್ಷೇಪ ವ್ಯಕ್ತಪಡಿಸಿದೆ.