ನವದೆಹಲಿ: ಕೇಂದ್ರದ ಮೋದಿ ಸರ್ಕಾರದ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡಿಸಿರುವ ತೆಲುಗುದೇಶಂ ಪಕ್ಷ ಇದೀಗ ಕಾಂಗ್ರೆಸ್ ಪಕ್ಷದ ವಿರುದ್ಧವೂ ತನ್ನ ವಾಗ್ದಾಳಿ ನಡೆಸಿದ್ದು, ಅವೈಜ್ಞಾನಿಕವಾಗಿ ಆಂಧ್ರ ಪ್ರದೇಶ ರಾಜ್ಯವನ್ನು ಇಬ್ಭಾಗ ಮಾಡಲಾಗಿದೆ.

ಅವಿಶ್ವಾಸ ನಿರ್ಣಯ ಕುರಿತು ಇಂದು ಲೋಕಸಭೆಯಲ್ಲಿ ಮಾತನಾಡಿದ ಟಿಡಿಪಿ ಸಂಸದ ಗಲ್ಲಾ ಜಯದೇವ್ ಅವರು, ಅವೈಜ್ಞಾನಿಕವಾಗಿ ರಾಜ್ಯ ವಿಭಜನೆಯಾಗಿದೆ. ರಾಜ್ಯ ವಿಭಜನೆ ವೇಳೆ ಆಸ್ತಿಗಳನ್ನು ತೆಲಂಗಾಣಕ್ಕೆ ನೀಡಲಾಗಿದ್ದು, ಸಾಲದ ಶೂಲವನ್ನು ಆಂಧ್ರ ಪ್ರದೇಶಕ್ಕೆ ನೀಡಲಾಗಿದೆ. ಪ್ರಾದೇಶಿಕ ವ್ಯಾಪ್ತಿ ಮತ್ತು ಜನಸಂಖ್ಯೆ ಪ್ರಮಾಣದ ಆಧಾರದ ಮೇರೆಗೆ ಹಂಚಿಕೆ ಮಾಡಲಾಗಿದ್ದ ಆರ್ಥಿಕ ನೆರವಿನಲ್ಲೂ ಆಂಧ್ರ ಪ್ರದೇಶಕ್ಕೆ ಅನ್ಯಾಯವಾಗಿದೆ. ತೆಲಂಗಾಣ ಹೊಸ ಹೆಸರನ್ನಿಟ್ಟುಕೊಂಡಿರುವ ಹಳೆಯ ರಾಜ್ಯವಾಗಿದ್ದು, ಆಂಧ್ರ ಪ್ರದೇಶ ಹಳೆಯ ಹೆಸರನ್ನಿಟ್ಟುಕೊಂಡಿರುವ ಹೊಸ ರಾಜ್ಯವಾಗಿದೆ.

ತೆಲಂಗಾಣ ಈಗಾಗಲೇ ನಿರ್ಮಾಣವಾಗಿರುವ ರಾಜ್ಯವಾಗಿದ್ದು, ಆಂಧ್ರ ಪ್ರದೇಶ ಈಗಿನ್ನೂ ನಿರ್ಮಾಣವಾಗಬೇಕಿರುವ ರಾಜ್ಯ. ರಾಜಧಾನಿ ನಿರ್ಮಾಣದ ಹೊರೆ ಕೂಡ ಆಂಧ್ರ ಪ್ರದೇಶದ ಮೇಲಿದೆ. ಹೀಗಾಗಿ ರಾಜ್ಯ ವಿಭಜನೆ ವೇಳೆ ಆಂಧ್ರ ಪ್ರದೇಶಕ್ಕೆ ಹೆಚ್ಚಿನ ಒತ್ತು ನೀಡಬೇಕಿತ್ತು, ಇದಾವುದನ್ನೂ ಲೆಕ್ಕಿಸದೇ ರಾಜ್ಯ ವಿಭಜನೆ ಮಾಡಲಾಗಿದೆ. ಅಂದು ಕೈಗೊಂಡಿದ್ದ ಅವೈಜ್ಞಾನಿಕ ನಿರ್ಧಾರದಿಂದ ಇಂದು ಆಂಧ್ರ ಪ್ರದೇಶದ ಆರ್ಥಿಕ ಪರಿಸ್ಥಿತಿ ತೀರಾ ಹದಗೆಟ್ಟಿದೆ ಎಂದು ಜಯದೇವ್ ಹೇಳಿದರು.