ನವದೆಹಲಿ: ಇಡೀ ದೇಶ ಈ ವಿಶೇಷ ಅಧಿವೇಶನವನ್ನು ವೀಕ್ಷಿಸುತ್ತಿದ್ದು, ಅವಿಶ್ವಾಸ ನಿರ್ಣಯವನ್ನು ಪ್ರಶ್ನೋತ್ತರ ಅವಧಿಯಂತೆ ಪರಿಗಣಿಸಬಾರದು ಎಂದು ಲೋಕಸಭೆ ವಿಪಕ್ಷ ನಾಯಕ ಮಲ್ಲಿಕಾರ್ಜುನ ಖರ್ಗೆ ಹೇಳಿದ್ದಾರೆ.
ಇಂದು ಕಲಾಪ ಆರಂಭವಾಗುತ್ತಿದ್ದಂತೆಯೇ ಸ್ಪೀಕರ್ ಸುಮಿತ್ರಾ ಮಹಾಜನ್ ಅವರನ್ನು ಉದ್ದೇಶಿಸಿ ಮಾತನಾಡಿದ ಮಲ್ಲಿಕಾರ್ಜುನ ಖರ್ಗೆ ಅವರು, ಇಡೀ ದೇಶ ಈ ಕಲಾಪವನ್ನು ಕುತೂಹಲದಿಂದ ನೋಡುತ್ತಿದೆ. ದೇಶದಲ್ಲಿನ ನಾನಾ ವಿಚಾರಗಳ ಕುರಿತು ಚರ್ಚಿಸಲೇ ಬೇಕಾದ ಅನಿವಾರ್ಯತೆ ಇದೆ. ಹೀಗಾಗಿ ವಿಪಕ್ಷಗಳಿಗೆ ನೀಡಿರುವ ಕಾಲಾವಕಾಶದ ಮಿತಿ ಸರಿಯಲ್ಲ. ವಿಪಕ್ಷಗಳಿಗೆ ಮಾತನಾಡಲು ಸಮಯದ ಮಿತಿ ನೀಡಬಾರದು ಎಂದು ಹೇಳಿದರು.
ಮಲ್ಲಿಕಾರ್ಜುನ ಖರ್ಗೆ ಅವರ ವಾದವನ್ನು ಒಪ್ಪದ ಸುಮಿತ್ರಾ ಮಹಾಜನ್ ಅವರು, ಎಲ್ಲದಕ್ಕೂ ಒಂದು ಅಂತ್ಯವಿರುತ್ತದೆ. ನಿರಂತರವಾಗಿರಲು ನಾವು ದೇವರಲ್ಲ. ಹೀಗಾಗಿ ನಾವು ಭಾಷಣಕ್ಕೆ ಮಿತಿ ಹೇರಲೇಬೇಕಾದ ಅನಿವಾರ್ಯತೆ ಇದೆ ಎಂದು ಹೇಳಿ, ಖರ್ಗೆ ಅವರ ಮನವಿಯನ್ನು ತಳ್ಳಿ ಹಾಕಿದರು.