ಪುಣೆ: ಜನವರಿ 1 ರಂದು ಸಂಭವಿಸಿದ ಭೀಮಾ ಕೊರೆಗಾಂವ್ ಹಿಂಸಾಚಾರದಲ್ಲಿ ಯುವಕರ ಮೇಲೆ ಹಲ್ಲೆ ನಡೆಸಿದ ನಾಲ್ವರ ಭಾವಚಿತ್ರವನ್ನು ಮಹಾರಾಷ್ಟ್ರದ ಅಪರಾಧ ವಿಭಾಗದ ಪೋಲೀಸರು ಬಿಡುಗಡೆ ಮಾಡಿದ್ದಾರೆ.
ಕನೂರ್ ಮಸಾಯಿ ನಿವಾಸಿಯಾಗಿದ್ದ ರಾಹುಲ್ ಫತಂಗಡೆ (30) ಎನ್ನುವಾತನ ಮೇಲೆ ಗುಂಪೊಂದು ಹಲ್ಲೆ ನಡೆಸಿ ಕೊಲೆ ಮಾಡಿದ್ದ ಘಟನೆ ಜನವರಿ 1 ರಂದು ಭೀಮಾ ಕೋರೆಗಾಂವ್ ಹಿಂಸಾಚಾರದ ಸಂದರ್ಭದಲ್ಲಿ ಮಹಾರಾಷ್ಟ್ರದ ಸನಸ್ವಾಡಿ ಸಮೀಪ ನಡೆದಿತ್ತು.
ಪ್ರಕರಣ ಸಂಬಂಧ ಪುಣೆ ಗ್ರಾಮೀಣ ವಿಭಾಗದ ಪೋಲೀಸರು ಇದಾಗಲೇ ಮೂವರನ್ನು ಬಂಧಿಸಿದ್ದು ಫೆಬ್ರವರಿಯಲ್ಲಿ ಪ್ರಕರಣವನ್ನು ರಾಜ್ಯ ಸಿಐಡಿಗೆ ವಹಿಸಲಾಗಿತ್ತು.
"ತನಿಖೆಯ ಸಮಯದಲ್ಲಿ ಕಲ್ಲುಗಳು ಹಾಗೂ ಕೋಲಿನಿಂದ ಫತಂಗಡೆ ಮೇಲೆ ಹಲ್ಲೆ ನಡೆಸುತ್ತಿರುವ ಜನಸಂದಣಿಯ ದೃಶ್ಯವನ್ನು ಒಳಗೊಂಡ ವೀಡಿಯೋ ಫೂಟೇಜ್ ಅನ್ನು ವಶಪಡಿಸಿಕೊಂಡಿದ್ದೇವೆ. ಅಲ್ಲದೆ ಘಟನೆ ಸಂಬಂಧ ಇನ್ನೂ ನಾಲ್ವರು ಆರೋಪಿಗಳನ್ನು ಗುರುತಿಸಿದ್ದೇವೆ" ಪುಣೆ ಸಿಐಡಿ ಘಟಕದ ಪೊಲೀಸ್ ಅಧೀಕ್ಷಕ ಅಕ್ಕನೌರು ಪ್ರಸಾದ್ ಪ್ರಹ್ಲಾದ್ ಹೇಳಿದ್ದಾರೆ.
"ವೀಡಿಯೋದಲ್ಲಿ ಇರುವ ನಾಲ್ವರ ಗುರುತು ಇನ್ನೂ ಪತ್ತೆಯಾಗಬೇಕಿದೆ.ಆದ್ದರಿಂದ ನಾವು ಈ ಶಂಕಿತರ ಚಿತ್ರವನ್ನು, ಸಂಪೂರ್ಣ ವೀಡಿಯೊವನ್ನು ಬಿಡುಗಡೆ ಮಾಡಿದ್ದೇವೆ" ಅವರು ಹೇಳಿದ್ದಾರೆ.
ವೀಡಿಯೋದಲ್ಲಿರುವ ನಾಲ್ವರು ಶಂಕಿತರ ಪತ್ತೆಗೆ ತಮಗೆ ಸಾರ್ವಜನಿಕರು ಸಹಕರಿಸಬೇಕೆಂದು ಅವರು ಮನವಿ ಮಾಡಿದ್ದಾರೆ.
ಬ್ರಿಟಿಷ್ ಈಸ್ಟ್ ಇಂಡಿಯಾ ಕಂಪೆನಿಮತ್ತು ಮಹಾರಾಷ್ಟ್ರದಲ್ಲಿ ಮೇಲ್ಜಾತಿಯ ಬ್ರಾಹ್ಮಣರೆನಿಸಿಕೊಂಡಿರುವ ಪೇಶಾವರ ಮಧ್ಯೆ 1818 ಜನವರಿ 1ರಂದು ಮಹಾರಾಷ್ಟ್ರದ ಕೊರೆಗಾಂವ್ ಭೀಮಾದಲ್ಲಿ ಯುದ್ಧವಾಗಿತ್ತು. ಮರಾಠರು ಯುದ್ಧದಲ್ಲಿ ಹಿಂತೆಗೆದುಕೊಂಡರು. ಅಂದಿನಿಂದ ಇದು ತಮ್ಮ ಗೆಲುವೆಂದು ಕೆಳಜಾತಿಯ ಸಮುದಾಯದವರು ಭಾವಿಸುತ್ತಾರೆ.