ನವದೆಹಲಿ: ತಮ್ಮ ವಿರುದ್ಧ ಜನಾಭಿಪ್ರಾಯ ಸಂಗ್ರಹಿಸಲು ಕಾಂಗ್ರೆಸ್ ಪಕ್ಷ ಹಾಕಿದ್ದ ಟ್ವೀಟ್ ಒಂದನ್ನು ಕೇಂದ್ರ ವಿದೇಶಾಂಗ ವ್ಯವಹಾರಗಳ ಸಚಿವೆ ಸುಷ್ಮಾ ಸ್ವರಾಜ್ ರೀಟ್ವೀಟ್​ ಮಾಡಿದ್ದಾರೆ!

ಇರಾಕ್ ನಲ್ಲಿ ಇಸಿಸ್ ಉಗ್ರರಿಂದ 39 ಭಾರತೀಯರು ಮೃತಪಟ್ಟ ಘಟನೆಯ ಸಂಬಂಧ ಕಾಂಗ್ರೆಸ್ ಪಕ್ಷ ಈ ಟ್ವೀಟ್ ಮಾಡಿತ್ತು. ಇರಾಕ್ ನಲ್ಲಿ ಭಾರತೀಯರು ಮೃತಪಟ್ಟ ಸಂಬಂಧ ವಿದೇಶಾಂಗ ಸಚಿವರಾಗಿ ಸುಷ್ಮಾ ಸ್ವರಾಜ್​ ಅವರ ದೊಡ್ಡ ಸೋಲು ಇದಾಗಿದೆಯೆ? ಎಂದು ಕಾಂಗ್ರೆಸ್ ತನ್ನ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ಪ್ರಶ್ನೆ ಮಾಡಿತ್ತು. ಈ ಟ್ವೀಟ್ ನ್ನು ಸುಷ್ಮಾ ಸ್ವರಾಜ್ ರೀಟ್ವಿಟ್ ಮಾಡಿದ್ದಾರೆ.

ಕಾಂಗ್ರೆಸ್ ತನ್ನ ಟ್ವೀಟ್ ಮೂಲಕ ಜನರ ಅಭಿಪ್ರಾಯ ಕೇಳಲು ಮುಂದಾಗಿದ್ದು ಸುಮಾರು 34 ಸಾವಿರ ಜನರು ಇದಕ್ಕೆ ಪ್ರತಿಕ್ರಯಿಸಿದ್ದಾರೆ.ಅದರಲ್ಲಿ 76% ಜನರು ಇಲ್ಲ ಎಂದೆನ್ನುವ ಮೂಲಕ ಸುಷ್ಮಾ ಅವರಿಗೆ ಬೆಂಬಲ ಸೂಚಿಸಿದ್ದಾರೆ. 24% ಜನರು ಮಾತ್ರವೇ ಸುಷ್ಮಾ ಸ್ವರಾಜ್ ತಮ್ಮ ಕರ್ತವ್ಯ ನಿಭಾಯಿಸುವಲ್ಲಿ ಸೋತಿದ್ದಾರೆಂದು ಒಪ್ಪಿಕೊಂಡಿದ್ದಾರೆ. 

ವಿದೇಶಾಂಗ ಸಚಿವೆ ವಿರುದ್ಧವೇ ಟ್ವಿಟ್ಟರ್ ಮೂಲಕ ಜನಾಭಿಪ್ರಾಯ ಸಂಗ್ರಹಕ್ಕೆ ಹೊರಟ ಕಾಂಗ್ರೆಸ್ ಗೆ ಇದರಿಂದ ಭಾರೀ ಮುಜುಗರ ಉಂತಾಗಿದೆ.

ಇರಾಕ್ ನಲ್ಲಿ ಇಸೀಸ್ ಉಗ್ರರಿಂದ ಅಪಹರಣಕ್ಕೊಳಗಾಗಿದ್ದ  39 ಭಾರತೀಯರು ಮೃತಪಟ್ಟಿದ್ದಾರೆ ಎಂದು ಸುಷ್ಮಾ ಸ್ವರಾಜ್​ ಕಳೆದ ವಾರ ಸಂಸತ್ತಿನಲ್ಲಿ ಪ್ರಕಟಿಸಿದ್ದರು. ಈ ಸಂಬಂಧ ಕಾಂಗ್ರೆಸ್ ವಿದೇಶಾಂಗ ಸಚಿವರ ವಿರುದ್ಧ ಟೀಕೆ ಮಾಡಿತ್ತು.