ಇಸ್ಲಾಮಾಬಾದ್: ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದಲ್ಲಿ ಭಾರತೀಯ ಸೇನೆ ನಡೆಸಿದ ದಾಳಿ ಉಭಯ ದೇಶಗಳ ಗಡಿ ಭಾಗದ ಗ್ರಾಮಸ್ಥರ ಆತಂಕಕ್ಕೆ ಕಾರಣವಾಗಿದ್ದು, ಐಎಎಫ್ ನಡೆಸಿದ ವಾಯುದಾಳಿಯನ್ನು ಕಣ್ಣಾರೆ ಕಂಡ ಪಿಒಕೆ ಗ್ರಾಮಸ್ಥರು ತಮ್ಮ ಆತಂಕವನ್ನು ಸುದ್ದಿಸಂಸ್ಥೆಯೊಂದಿಗೆ ಹಂಚಿಕೊಂಡಿದ್ದಾರೆ.

ಈ ಬಗ್ಗೆ ಬಿಬಿಸಿ ಸುದ್ದಿವಾಹಿನಿಯೊಂದಿಗೆ ಮಾತನಾಡಿರುವ ಸ್ಥಳೀಯರೊಬ್ಬರು, ರಾತ್ರಿ ಮಲಗಿದ್ದಾಗ ಬಾರಿ ಪ್ರಮಾಣದ ಶಬ್ಧ ಕೇಳಿಸಿತು. ಬಳಿಕ ಭೂಮಿ ನಡುಗಲಾರಂಭಿಸಿತು. ಭೂಕಂಪ ಎಂದು ಭಾವಿಸಿ ಹೊರಗೆ ಓಡಿ ಬಂದೆ. 

ಒಟ್ಟಾರೆ ದಾಳಿ ಐದರಿಂದ ಹತ್ತು ನಿಮಿಷದಲ್ಲಿ ಮುಗಿದುಹೋಗಿರಬೇಕು. ನಾವು ಮಲಗಿದ್ದಾಗ ಬೆಚ್ಚಿಬೀಳುಂಥ ಬಾಂಬ್​ ಶಬ್ದವಾಯಿತು. ಏನಾಯಿತು ಎಂದು ಹೊರ ಬಂದು ನೋಡಿದಾಗ ಭಾರತದ ಕಡೆಯಿಂದ ವಿಮಾನಗಳು ಕಂಗ್ರಾ ಎಂದು ನಾವು ಕರೆಯುವ ಜಾಗದ ಮೇಲೆ ದಾಳಿ ನಡೆಸಿದವು. ನೋಡ ನೋಡುತ್ತಿದ್ದಂತೆಯೇ ಈ ಭಾಗದ ಸುಮಾರು 10ಕ್ಕೂ ಹೆಚ್ಚು ಮನೆಗಳ ಮೇಲೆ ಬಾಂಬ್ ಬಿತ್ತು. ಇಡೀ ಪ್ರದೇಶ ಬೆಂಕಿಯ ಜ್ವಾಲೆಗೆ ಸಿಲುಕಿತು. ಬಾಂಬ್​ ಸ್ಫೋಟಗೊಂಡ ನಂತರ ಆ ವಿಮಾನಗಳು ವಾಪಸ್​ ಹೊರಟವು. ಹತ್ತು ನಿಮಿಷದ ತರುವಾಯ ಪಾಕಿಸ್ತಾನ ಪಡೆಗಳು ದಾಳಿ ನಡೆಸಿದ ಶಬ್ದವಾಯಿತು ಎಂದು ಪ್ರತ್ಯಕ್ಷದರ್ಶಿ ತಿಳಿಸಿದ್ದಾರೆ.  

ಬೆಳಗ್ಗೆ ಬಾಂಬ್ ಸ್ಫೋಟವಾದ ಸ್ಥಳಕ್ಕೆ ತೆರಳಿದಾಗ ಅಲ್ಲಿ ದೊಡ್ಡ ಕಂದಕ ನಿರ್ಮಾಣವಾಗಿತ್ತು. ಆದರೆ ಅದೃಷ್ಟವಶಾತ್ ಯಾವುದೇ ರೀತಿಯ ಸಾವುನೋವು ಸಂಭವಿಸಿರಲಿಲ್ಲ ಎಂದು ಹೇಳಿದ್ದಾರೆ.

'ಆಗಸದಲ್ಲಿ 5ಕ್ಕೂ ಹೆಚ್ಚು ಯುದ್ಧ ವಿಮಾನಗಳು ದಾಳಿ ಮಾಡುತ್ತಿದ್ದ ದೃಶ್ಯ ಕಂಡೆ. ಸರಿ ಹೊತ್ತಲ್ಲಿ ವಿಮಾನಗಳ ಹಾರಾಟ ಶಬ್ದ ಕೇಳಿಸಿತು. ಗಡಿ ಭಾಗದಲ್ಲಿ ವಾಸವಿರುವ ಕಾರಣ ಇದು ಮಾಮೂಲಿಯಂತದ್ದು ಏನೋ ಎಂದು ಭಾವಿಸಿದ್ದೆವು. ಆದರೆ, ಈ ಬಾರಿ ನಮ್ಮ ಊಹೆ ಸುಳ್ಳಾಗಿತ್ತು... ಎಂದು ಹೇಳಿಕೊಂಡಿದ್ದಾರೆ.