ನವದೆಹಲಿ: ಇದು ನಿಮಗೆ ಗೊತ್ತೆ..? ಪ್ರತೀ ಮೂವರು ಮೋದಿ ಬೆಂಬಲಿಗರ ಪೈಕಿ ಓರ್ವ ಉಳಿದ ಇಬ್ಬರಂತೆಯೇ ಮೂರ್ಖ ರಂತೆ..

ಲೋಕಸಭಾ ಚುನಾವಣೆಗೆ ದಿನಗಣನೆ ಆರಂಭವಾಗಿರುವಂತೆಯೇ ನಾಯಕರ ಆರೋಪ-ಪ್ರತ್ಯಾರೋಪ, ವಾಗ್ದಾಳಿ, ಕಾಲೆಳೆಯುವಿಕೆ, ವ್ಯಂಗ್ಯದಂತಹ ಪ್ರಹಸನಗಳು ಮುಗಿಲು ಮುಟ್ಟಿದ್ದು, ಇದೀಗ ಕಾಂಗ್ರೆಸ್ ಸಾಮಾಜಿಕ ಜಾಲತಾಣ ವಿಭಾಗದ ಮುಖ್ಯಸ್ಥೆ ರಮ್ಯಾ, ಮೋದಿ ಬೆಂಬಲಿಗರ ಕಾಲೆಳೆದಿದ್ದಾರೆ. ಪುಲ್ವಾಮ ಉಗ್ರ ದಾಳಿ, ಅಭಿನಂದನ್ ವರ್ಧಮಾನ್ ಪ್ರಕರಣ, ವಾಯುದಾಳಿ ಕುರಿತು ಮೋದಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ್ದ ರಮ್ಯಾ ಇದೀಗ ನೇರವಾಗಿ ಮೋದಿ ಬೆಂಬಲಿಗರ ಕಾಲೆಳೆದಿದ್ದಾರೆ.

ಈ ಬಗ್ಗೆ ಟ್ವಿಟರ್ ನಲ್ಲಿ ಮೋದಿ ಬೆಂಬಲಿಗರನ್ನು ಉದ್ದೇಶಿಸಿ ವ್ಯಂಗ್ಯವಾಡಿರುವ ರಮ್ಯಾ.. ಇದು ನಿಮಗೆ ಗೊತ್ತೆ..? ಪ್ರತೀ ಮೂವರು ಮೋದಿ ಬೆಂಬಲಿಗರ ಪೈಕಿ ಓರ್ವ ಉಳಿದ ಇಬ್ಬರಂತೆಯೇ ಮೂರ್ಖ ರಂತೆ ಎಂದು ಮೋದಿ ಫೋಟೋವೊಂದನ್ನು ಟ್ವೀಟ್ ಮಾಡಿದ್ದಾರೆ. ಅಲ್ಲದೆ ಇದನ್ನು ತಮ್ಮ ನೆಚ್ಚಿನದ್ದು ಎಂದು ವ್ಯಂಗ್ಯ ಮಾಡಿದ್ದಾರೆ. 

ಇನ್ನು ಈ ವಿಚಾರವನ್ನು ಸುದ್ದಿಸಂಸ್ಥೆಯೊಂದು ವರದಿ ಮಾಡಿದ್ದು, ಆ ಸಂಸ್ಥೆಗೂ ಧನ್ಯವಾದ ಹೇಳುವ ಮೂಲಕ ರಮ್ಯಾ ಆ ಸಂಸ್ಥೆಯ ಕಾಲೆಳೆಯುವ ಪ್ರಯತ್ನ ಮಾಡಿದ್ದಾರೆ. ರಮ್ಯಾ ಅವರ ಈ ಟ್ವೀಟ್ ಗೆ ವ್ಯಾಪಕ ಪರ-ವಿರೋಧ ಟ್ವೀಟ್ ಗಳು ಹರಿದು ಬರುತ್ತಿದ್ದು, ಈ ಟ್ವೀಟ್ ವೈರಲ್ ಆಗಿದೆ.