ಗುವಾಹತಿ: ನಾಗಾಲ್ಯಾಂಡ್‌ ನಲ್ಲಿ ಶನಿವಾರ ಸೇನೆ ಮತ್ತು ಉಗ್ರರ ನಡುವೆ ನಡೆದ ಗುಂಡಿನ ಕಾಳಗದಲ್ಲಿ ಇಬ್ಬರು ಅಸ್ಸಾಂ ರೈಫಲ್ಸ್ ಯೋಧರು ಹುತಾತ್ಮರಾಗಿದ್ದು, ಮೂವರು ಗಾಯಗೊಂಡಿದ್ದಾರೆ.
ಅಧಿಕೃತ ಮೂಲಗಳ ಪ್ರಕಾರ, ಭಾರತ-ಮ್ಯಾನ್‌ಮಾರ್‌ ಗಡಿಗೆ ತಾಗಿಕೊಂಡಿರುವ ಮೋನ್‌ ಪ್ರದೇಶದಲ್ಲಿ ಬಂಡುಕೋರರ ಸಮೂಹದೊಂದಿಗೆ ನಡೆದ ಗುಂಡಿನ ಕಾಳಗದಲ್ಲಿ ಇಬ್ಬರು ಯೋಧರು ಹುತಾತ್ಮರಾಗಿದ್ದಾರೆ.
ಇಂದು ಮಧ್ಯಾಹ್ನ ಅಸ್ಸಾಂ ರೈಫ‌ಲ್‌ ಪಡೆಯ ಯೋಧರು ತೆರಳುತ್ತಿದ್ದ ಎರಡು ವಾಹನಗಳನ್ನು ಉಗ್ರರು ಐಇಡಿ ಬಳಸಿ ಸ್ಫೋಟಿಸಿದ್ದು, ಸ್ಫೋಟದ ಬಳಿಕ ಯೋಧರ ಮತ್ತು ಬಂಡುಕೋರರ ನಡುವೆ ಗುಂಡಿನ ಕಾಳಗ ನಡೆಯಿತು. ಇದರಲ್ಲಿ ಇಬ್ಬರು ಜವಾನರು ಹುತಾತ್ಮರಾಗಿದ್ದಾರೆ ಎಂದು ಸೇನಾ ಮೂಲಗಳು ತಿಳಿಸಿವೆ.
ಇದುವರೆಗೂ ಈ ದಾಳಿಯ ಹೊಣೆಯನ್ನು ಯಾವ ಉಗ್ರ ಸಂಘಟನೆಯೂ ಹೊತ್ತುಕೊಂಡಿಲ್ಲ. ಆದರೆ ದಾಳಿಗೆ ಎನ್ಎಸ್ ಸಿಎನ್(ಐಎಂ) ಸಂಘಟನೆಯೇ ಕಾರಣ ಎಂದು ಶಂಕಿಸಲಾಗಿದೆ.