ನವದೆಹಲಿ: ಭಾರತದ ಪ್ರಾಂತ್ಯವನ್ನು ಚೀನಾಕ್ಕೆ ಒಪ್ಪಿಸುವ ಮೂಲಕ ಪ್ರಧಾನಿ ಮೋದಿ ಸರೆಂಡರ್ (ಶರಣಾಗತ ಮೋದಿ) ಮೋದಿ ಆಗಿದ್ದಾರೆ ಎಂದು ನಿನ್ನೆ ಟೀಕಿಸಿದ್ದ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿಗೆ ಬಿಜೆಪಿ ನಾಯಕರು ತಿರುಗೇಟು ಕೊಟ್ಟಿದ್ದಾರೆ.
ನಿನ್ನೆಯಿಂದ ಟ್ವಿಟ್ಟರ್ ನಲ್ಲಿ ರಾಹುಲ್ ಗಾಂಧಿಯವರ ಸರೆಂಡರ್ ಮೋದಿ ಟ್ವೀಟ್ ಟ್ರೆಂಡ್ ಆಗಿದೆ. ಇಂಗ್ಲಿಷ್ ಪದ surrender ಎಂಬುದನ್ನು ರಾಹುಲ್ ಗಾಂಧಿ Surender Modi ಎಂದು ಬರೆದು ಅಪಹಾಸ್ಯಕ್ಕೀಡಾಗಿದ್ದಾರೆ. ಮೊದಲು ನೀವು ಬರೆದಿರುವ ಶಬ್ದದ ಸ್ಪೆಲ್ಲಿಂಗ್ ನೋಡಿಕೊಳ್ಳಿ ಎಂದು ತಮಾಷೆ ಮಾಡಿದ್ದಾರೆ.
ಉತ್ತರ ಪ್ರದೇಶ ಜನ ಸಂವಾದ ವರ್ಚುವಲ್ ರ್ಯಾಲಿಯಲ್ಲಿ ಮಾತನಾಡಿದ ಬಿಜೆಪಿ ಅಧ್ಯಕ್ಷ ಜೆ ಪಿ ನಡ್ಡಾ, ನರೇಂದ್ರ ಮೋದಿ ಸುರೇಂದರ್ ಮೋದಿ ಎಂದು ಹೇಳಿದ್ದೀರಿ, ಅದರ ಅರ್ಥ ಮೋದಿಯವರು ಕೇವಲ ಜನರಿಗೆ ಮಾತ್ರವಲ್ಲ, ದೇವರಿಗೂ ನಾಯಕರೇ ಎಂದು ಕೇಳಿದರು.
ಅಸ್ಸಾಂ ಸಚಿವ ಹೀಮಂತಾ ಬಿಸ್ವಾ ಶರ್ಮಾ, ರಾಹುಲ್ ಗಾಂಧಿ ಮೊದಲು ಇಂಗ್ಲಿಷ್ ಪದಗಳನ್ನು ಸರಿಯಾಗಿ ಬರೆಯುವುದನ್ನು ಕಲಿಯಬೇಕು ಎಂದು ವ್ಯಂಗ್ಯವಾಡಿದ್ದಾರೆ. ಶರಣಾಗುವುದು ನೆಹರೂ-ಗಾಂಧಿ ಪರಿವಾರದ ಲಕ್ಷಣವೇ ಹೊರತು ಬಿಜೆಪಿ ಹಾಗೂ ಪ್ರಧಾನಿ ಮೋದಿ ಅವರದ್ದಲ್ಲ ಎಂದು ಕಿಡಿಕಾರಿದ್ದಾರೆ.
ಇದೇ ವೇಳೆ ರಾಹುಲ್ ಗಾಂಧಿ ಅವರ ಟ್ವೀಟ್‌ಗೆ ಕೆಂಡಾಮಂಡಲವಾಗಿರುವ ಬಿಜೆಪಿ, ಪ್ರಧಾನಿ ವಿರುದ್ಧ ಹಗರು ಮಾತುಗಳು ಸಲ್ಲ ಎಂದು ಕಿಡಿಕಾರಿದೆ.