ನವದೆಹಲಿ: ಭಾರತದಲ್ಲಿ ಎಚ್ಐವಿ ಸೋಂಕು ಕಡಿಮೆಯಾಗುತ್ತಿದೆ. ಆದರೆ ದೇಶದಲ್ಲಿ ಇನ್ನೂ 51,000 ಮಕ್ಕಳು ಸೇರಿದಂತೆ ಅಂದಾಜು 24.01 ಲಕ್ಷ ರೋಗಿಗಳಿದ್ದಾರೆ. ಈ ರೋಗಿಗಳಲ್ಲಿ ಹೆಚ್ಚಿನವರು ಆಂಧ್ರಪ್ರದೇಶ, ಕರ್ನಾಟಕ, ತಮಿಳುನಾಡು ಮತ್ತು ತೆಲಂಗಾಣ ಸೇರಿದಂತೆ ಎಂಟು ರಾಜ್ಯಗಳಲ್ಲಿ ಕೇಂದ್ರೀಕೃತರಾಗಿದ್ದಾರೆ ಎಂದು ಕೇಂದ್ರ ಸರ್ಕಾರ ಬುಧವಾರ ರಾಜ್ಯಸಭೆಗೆ ತಿಳಿಸಿದೆ.
ಸರ್ಕಾರದ 2021 ಎಚ್ಐವಿ ವರದಿಯ ಪ್ರಕಾರ, ಭಾರತದಲ್ಲಿ ಎಚ್ಐವಿ(PLHIV) ಸೋಂಕಿತರ ಸಂಖ್ಯೆ 24.01 ಲಕ್ಷ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಖಾತೆ ರಾಜ್ಯ ಸಚಿವ ಭಾರತಿ ಪ್ರವೀಣ್ ಪವಾರ್ ಅವರು ರಾಜ್ಯಸಭೆಗೆ ಲಿಖಿತ ಉತ್ತರ ನೀಡಿದ್ದಾರೆ.
ಇದನ್ನು ಓದಿ: ಕೇರಳ ಹಾಗೂ ದೆಹಲಿಯಲ್ಲಿ ಮತ್ತೊಂದು ಮಂಕಿಪಾಕ್ಸ್ ಪಾಸಿಟಿವ್ ಕೇಸ್ ಪತ್ತೆ: ದೇಶದಲ್ಲಿ ಪ್ರಕರಣಗಳ ಸಂಖ್ಯೆ 8ಕ್ಕೆ ಏರಿಕೆ!
ಒಟ್ಟು ಸೋಂಕಿತರಲ್ಲಿ ಸುಮಾರು ಶೇ. 45 ರಷ್ಟು (10.83 ಲಕ್ಷ) ಮಹಿಳೆಯರು ಮತ್ತು ಶೇ. 2 ರಷ್ಟು ಅಂದರೆ ಸುಮಾರು 51,000 ಸೋಂಕಿತರು 12 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಾಗಿದ್ದಾರೆ ಎಂದು ಸರ್ಕಾರ ಮಾಹಿತಿ ನೀಡಿದೆ.
ಮಹಾರಾಷ್ಟ್ರದಲ್ಲಿ ಅತಿ ಹೆಚ್ಚು ಎಚ್ಐವಿ ಸೋಂಕಿತರಿದ್ದು(3.94 ಲಕ್ಷ), ಆಂಧ್ರಪ್ರದೇಶ (3.21 ಲಕ್ಷ), ಕರ್ನಾಟಕ (2.76 ಲಕ್ಷ), ಉತ್ತರ ಪ್ರದೇಶ (1.78 ಲಕ್ಷ), ತಮಿಳುನಾಡು (1.63 ಲಕ್ಷ), ತೆಲಂಗಾಣ (1.56 ಲಕ್ಷ), ಬಿಹಾರ. (1.43 ಲಕ್ಷ), ಮತ್ತು ಗುಜರಾತ್ 1.14 ಲಕ್ಷ ಸೋಂಕಿತರಿದ್ದಾರೆ.