ಚಂಡೀಗಢ: ಪಂಜಾಬ್ ನ ಚಂಡೀಗಢ ವಿಶ್ವವಿದ್ಯಾನಿಲಯದ ವಿದ್ಯಾರ್ಥಿನಿಯರ ಆಕ್ಷೇಪಾರ್ಹ ವೀಡಿಯೋ ಲೀಕ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಶಿಮ್ಲಾ ಮೂಲದ ಓರ್ವ ವ್ಯಕ್ತಿಯನ್ನು ಬಂಧಿಸಲಾಗಿದೆ.
ಪ್ರಕರಣದಲ್ಲಿ ಬಂಧನಕ್ಕೊಳಗಾಗುತ್ತಿರುವ 2 ನೇ ಆರೋಪಿ ಈತ. ಇದಕ್ಕೂ ಮುನ್ನ ಪಂಜಾಬ್ ಪೊಲೀಸರು ಹಾಸ್ಟೆಲ್ ನ ಸಹವಾಸಿಗಳ ಆಕ್ಷೇಪಾರ್ಹ ವೀಡಿಯೋಗಳನ್ನು ಚಿತ್ರೀಕರಿಸಿದ ಆರೋಪದ ಅಡಿ ವಿಶ್ವವಿದ್ಯಾನಿಲಯದ ಓರ್ವ ವಿದ್ಯಾರ್ಥಿನಿಯನ್ನು ಬಂಧಿಸಿದ್ದರು.
ಶಿಮ್ಲಾ ಮೂಲದ 23 ವರ್ಷದ ಸನ್ನಿ ಮೆಹ್ತಾ ಈಗ ಬಂಧನಕ್ಕೊಳಗಾಗಿರುವ ವ್ಯಕ್ತಿ ಆಗಿದ್ದು, ಬಂಧನಕ್ಕೊಳಗಾಗಿರುವ ವಿದ್ಯಾರ್ಥಿನಿ ರೋಹ್ರು ನಿವಾಸಿಯಾಗಿದ್ದು, ಆರೋಪಿ ಮಹಿಳಾ ವಿದ್ಯಾರ್ಥಿನಿಗೆ ಬಂಧಿತ ವ್ಯಕ್ತಿ ಪರಿಚಯವಿದ್ದ ಎಂದು ಪಂಜಾಬ್ ಪೊಲೀಸರು ತಿಳಿಸಿದ್ದಾರೆ.
ಆರೋಪಿ ವಿದ್ಯಾರ್ಥಿನಿಯ ಮೊಬೈಲ್ ನ ವಿಧಿವಿಜ್ಞಾನ ತನಿಖೆ ನಡೆಸುತ್ತೇವೆ ಎಂದು ಕಮ್ಯುನಿಟಿ ವಿಭಾಗದ ಎಡಿಜಿಪಿ ಗುರ್ಪ್ರೀತ್ ದೇವೋ ಮಾಹಿತಿ ನೀಡಿದ್ದಾರೆ.