ಸೂರತ್: ಸೂರತ್ ನಗರದಲ್ಲಿ ವ್ಯಕ್ತಿಯೋರ್ವ ತನ್ನ ಇಬ್ಬರು ಗಂಡು ಮಕ್ಕಳನ್ನು ಕೊಂದು ನೇಣು ಬಿಗಿದುಕೊಂಡಿದ್ದು 'ಆತ್ಮಹತ್ಯೆಗೆ ಪ್ರಚೋದನೆ' ಆರೋಪದ ಮೇಲೆ ಮಹಿಳೆ ಮತ್ತು ಆಕೆಯ ಪ್ರಿಯಕರನನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆತ್ಮಹತ್ಯೆ ಪತ್ರ, ವೀಡಿಯೊ ಸಂದೇಶಗಳು ಮತ್ತು ಎರಡು ಡೈರಿಗಳಲ್ಲಿನ ಉಲ್ಲೇಖಗಳನ್ನು ಆಧರಿಸಿ ಆರೋಪಿಗಳನ್ನು ಬಂಧಿಸಲಾಗಿದೆ, ಅದರಲ್ಲಿ ಅಲ್ಪೇಶ್ ಸೋಲಂಕಿ (41) ತನ್ನ ಪತ್ನಿಯ ವಿವಾಹೇತರ ಸಂಬಂಧವೇ ತನ್ನ ಆತ್ಮಹತ್ಯೆಗೆ ಕಾರಣ ಎಂದು ಹೇಳಿದ್ದಾರೆ.

ಮೃತರು ಜಿಲ್ಲಾ ಪಂಚಾಯತ್ ಕ್ವಾರ್ಟರ್ಸ್‌ನಲ್ಲಿ ವಾಸಿಸುತ್ತಿದ್ದರು, ಅಲ್ಲಿ ಗುರುವಾರ 2 ಮತ್ತು 8 ವರ್ಷದ ತಮ್ಮ ಗಂಡು ಮಕ್ಕಳಿಗೆ ಇಲಿಗೆ ಹಾಕುವ ವಿಷ ಬೆರೆಸಿದ ತಂಪು ಪಾನೀಯವನ್ನು ನೀಡಿ ಕೊಂದ ಮೇಲೆ ವ್ಯಕ್ತಿ ತಾನೂ ನೇಣು ಬಿಗಿದುಕೊಂಡಿದ್ದಾರೆ ಎಂದು ಉಪ ಪೊಲೀಸ್ ಆಯುಕ್ತ (ವಲಯ 4) ವಿಜಯಸಿಂಹ ಗುರ್ಜರ್ ಹೇಳಿದ್ದಾರೆ.

"ನಾವು ಸೋಲಂಕಿ ಪತ್ನಿ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಿದ್ದೇವೆ ಮತ್ತು ತನಿಖೆ ವೇಳೆ ನಮಗೆ ಎರಡು ಡೈರಿಗಳು ಮತ್ತು ಆತ್ಮಹತ್ಯೆ ಟಿಪ್ಪಣಿ ಮತ್ತು ಅವರ ಮೊಬೈಲ್ ಫೋನ್‌ನಲ್ಲಿ ಕೆಲವು ವೀಡಿಯೊಗಳು ಸಿಕ್ಕಿವೆ" ಎಂದು ಅವರು ಹೇಳಿದ್ದಾರೆ.

ಸೋಲಂಕಿ ಸಹೋದರ ಪೊಲೀಸರಿಗೆ ನೀಡಿದ ಹೇಳಿಕೆಯಲ್ಲಿ ಸೋಲಂಕಿ ಅವರ ಪತ್ನಿ ಫಲ್ಗುಣಿ ನರೇಶ್ ರಾಥೋಡ್ ಜೊತೆ ವಿವಾಹೇತರ ಸಂಬಂಧ ಹೊಂದಿದ್ದಾರೆಂದು ಹೇಳಲಾಗಿದೆ ಎಂದು ಗುರ್ಜರ್ ಹೇಳಿದ್ದಾರೆ.

ಆರು ಪುಟಗಳ ದೀರ್ಘ ಆತ್ಮಹತ್ಯೆ ಪತ್ರದಲ್ಲಿ, ಸೋಲಂಕಿ ತನ್ನ ಹೆತ್ತವರು ಮತ್ತು ಹೆಂಡತಿಯನ್ನು ಉದ್ದೇಶಿಸಿ, ಈ ನಿರ್ಧಾರಕ್ಕೆ ಪತ್ನಿಯ ದಾಂಪತ್ಯ ದ್ರೋಹವೇ ಕಾರಣ ಎಂದು ದೂಷಿಸಿ, 'ಅಪರಾಧಿಗಳ' ವಿರುದ್ಧ ತನಿಖೆ ಮತ್ತು ಕ್ರಮ ಕೈಗೊಳ್ಳುವಂತೆ ಕೋರಿದ್ದಾರೆ. ವಿಚ್ಛೇದಿತ ರಾಥೋಡ್, ಫಲ್ಗುಣಿ ಜೊತೆ ಸಂಬಂಧ ಹೊಂದಿದ್ದಾಗಿ ಒಪ್ಪಿಕೊಂಡಿದ್ದಾರೆ ಎಂದು ಗುರ್ಜರ್ ಹೇಳಿದರು.

"ಭಾರತೀಯ ನ್ಯಾಯ ಸಂಹಿತಾ (ಬಿಎನ್‌ಎಸ್) ಸೆಕ್ಷನ್ 108 ಮತ್ತು 54 ರ ಅಡಿಯಲ್ಲಿ ಉಮ್ರಾ ಪೊಲೀಸ್ ಠಾಣೆಯಲ್ಲಿ ಆತ್ಮಹತ್ಯೆಗೆ ಪ್ರಚೋದನೆಯ ಪ್ರಕರಣ ದಾಖಲಾಗಿದ್ದು, ಫಲ್ಗುಣಿ ಮತ್ತು ನರೇಶ್ ರಾಥೋಡ್ ಇಬ್ಬರನ್ನೂ ಬಂಧಿಸಲಾಗಿದೆ. ಹೆಚ್ಚಿನ ತನಿಖೆ ನಡೆಯುತ್ತಿದೆ" ಎಂದು ಅಧಿಕಾರಿ ತಿಳಿಸಿದ್ದಾರೆ.