ಹರ್ಯಾಣ: ವಿವಾಹ ಕಾರ್ಯಕ್ರಮವೊಂದರಲ್ಲಿ ಅಸಭ್ಯ ವರ್ತನೆಯನ್ನು ವಿರೋಧಿಸಿದ್ದಕ್ಕಾಗಿ ಕ್ರೀಡಾಪಟುವಿನ ಮೇಲೆ ಹಲ್ಲೆ ನಡೆಸಿ ಹತ್ಯೆ ಮಾಡಲಾಗಿರುವ ಘಟನೆ ಹರಿಯಾಣದ ರೋಹ್ಟಕ್ ನಲ್ಲಿ ವರದಿಯಾಗಿದೆ.
ರಾಷ್ಟ್ರೀಯ ಮಟ್ಟದ ಪ್ಯಾರಾ-ಅಥ್ಲೀಟ್ ರೋಹಿತ್ ಧಂಕರ್ ಕೊಲೆಯಾದ ವ್ಯಕ್ತಿಯಾಗಿದ್ದು, ಒಬ್ಬರು ಮದುವೆಯಲ್ಲಿ ಅಸಭ್ಯವಾಗಿ ವರ್ತಿಸಿದ್ದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ನಂತರ, ಪುರುಷರ ಗುಂಪೊಂದು ಅವರನ್ನು ಕಬ್ಬಿಣದ ರಾಡ್ ಮತ್ತು ಹಾಕಿ ಸ್ಟಿಕ್ಗಳಿಂದ ಕ್ರೂರವಾಗಿ ಥಳಿಸಿತ್ತು. ತೀವ್ರವಾಗಿ ಗಾಯಗೊಂಡ ಅವರನ್ನು ಪಂಡಿತ್ ಬಿಡಿ ಶರ್ಮಾ ಸ್ನಾತಕೋತ್ತರ ವೈದ್ಯಕೀಯ ವಿಜ್ಞಾನ ಸಂಸ್ಥೆಯಲ್ಲಿ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗುತ್ತಿತ್ತು. ಎರಡು ದಿನಗಳ ನಂತರ ಅವರು ಸಾವನ್ನಪ್ಪಿದ್ದಾರೆ.
ನವೆಂಬರ್ 27 ರ ಸಂಜೆ, 28 ವರ್ಷದ ರೋಹಿತ್ ಧಂಕರ್ ಮತ್ತು ಅವರ ಸ್ನೇಹಿತ ಜತಿನ್, ರೇವಾರಿ ಖೇರಾದಲ್ಲಿರುವ ಸಂಬಂಧಿಕರ ಮನೆಯಲ್ಲಿ ನಡೆದ ಮದುವೆ ಸಮಾರಂಭದಲ್ಲಿ ಭಾಗವಹಿಸಲು ಹೋಗಿದ್ದರು. ಸಮಾರಂಭದಲ್ಲಿ ವರನ ಕಡೆಯವರು ತೋರಿದ ಅಶಿಸ್ತಿನ ವರ್ತನೆಗೆ ಧಂಕರ್ ಆಕ್ಷೇಪ ವ್ಯಕ್ತಪಡಿಸಿದ್ದರು. ವರನ ಕಡೆಯ ಕೆಲವು ಅತಿಥಿಗಳೊಂದಿಗೆ ಅವರು ವಾಗ್ವಾದ ನಡೆಸಿದರು.
ವಿವಾಹ ಸಮಾರಂಭದ ನಂತರ, ಅವರು ರೋಹ್ಟಕ್ಗೆ ಹಿಂತಿರುಗುತ್ತಿದ್ದಾಗ, ಧಂಕರ್ ಮತ್ತು ಅವರ ಸ್ನೇಹಿತ ಪ್ರಯಾಣಿಸುತ್ತಿದ್ದ ಕಾರನ್ನು ಹಿಂದಿನಿಂದ ಡಿಕ್ಕಿ ಹೊಡೆದರು ಮತ್ತು ಸುಮಾರು 15 ರಿಂದ 20 ಪುರುಷರು ಅವರನ್ನು ಸುತ್ತುವರೆದರು. ಅವರು ಧಂಕರ್ ಅವರನ್ನು ಕಬ್ಬಿಣದ ರಾಡ್ ಮತ್ತು ಹಾಕಿ ಸ್ಟಿಕ್ಗಳಿಂದ ಹಲ್ಲೆ ಮಾಡಿ ಗಂಭೀರವಾಗಿ ಗಾಯಗೊಳಿಸಿದರು. ಅವರ ಸ್ನೇಹಿತ ಹೇಗೋ ಹಲ್ಲೆಯಿಂದ ತಪ್ಪಿಸಿಕೊಳ್ಳುವಲ್ಲಿ ಯಶಸ್ವಿಯಾದರು. ವೃತ್ತಿಪರ ಪವರ್ಲಿಫ್ಟರ್ ಅವರನ್ನು ಮೊದಲು ಭಿವಾನಿ ಜನರಲ್ ಆಸ್ಪತ್ರೆಗೆ ದಾಖಲಿಸಲಾಯಿತು, ಮತ್ತು ಅವರ ಸ್ಥಿತಿ ಹದಗೆಟ್ಟ ನಂತರ, ಅವರನ್ನು ರೋಹ್ಟಕ್ಗೆ ಕರೆದೊಯ್ಯಲಾಯಿತು, ಅಲ್ಲಿ ಅವರು ಗಾಯಗಳಿಂದ ಸಾವನ್ನಪ್ಪಿದರು.
"ರೋಹಿತ್ ಮತ್ತು ನಾನು ನನ್ನ ಸಂಬಂಧಿಕರ ಮದುವೆಗೆ ಹೋಗಿದ್ದೆವು. ಅಲ್ಲಿ ಕೆಲವು ಜನರು ನಿಂದನೀಯ ಭಾಷೆಯನ್ನು ಬಳಸುತ್ತಿದ್ದರು. ಆದ್ದರಿಂದ ನಾವು ಅದನ್ನು ವಿರೋಧಿಸಿದೆವು. ನನ್ನ ಸೋದರ ಮಾವ ಮಧ್ಯಪ್ರವೇಶಿಸಿದ ನಂತರ ವಿಷಯ ಇತ್ಯರ್ಥವಾಯಿತು. ಆದಾಗ್ಯೂ, ಸುಮಾರು ಒಂದು ಗಂಟೆಯ ನಂತರ ನಾವು ಸ್ಥಳದಿಂದ ಹೊರಬಂದಾಗ, ಅದೇ ವ್ಯಕ್ತಿಗಳು ನಮ್ಮ ವಾಹನವನ್ನು ನಿಲ್ಲಿಸಿದರು. ನಾನು ನಾಳೆ ಮಾತನಾಡೋಣ ಎಂದು ಅವರಿಗೆ ಹೇಳಿದೆ. ಆದರೆ ಅಷ್ಟರಲ್ಲಿ, ಅವರು ರೋಹಿತ್ ಕುಳಿತಿದ್ದ ಪ್ರಯಾಣಿಕರ ಸೀಟಿನ ಕಿಟಕಿಯನ್ನು ತೆರೆಯುವಲ್ಲಿ ಯಶಸ್ವಿಯಾದರು. ನಂತರ ಅವರು ರಾಡ್ನಿಂದ ನನ್ನ ಬದಿಯ ಕಿಟಕಿ ಗಾಜಿಗೆ ಹೊಡೆದರು. ನಾನು ಓಡಿಸಿದೆ, ಆದರೆ ಅವರು ನಮ್ಮನ್ನು ಹಿಂಬಾಲಿಸಲು ಪ್ರಾರಂಭಿಸಿದರು," ಎಂದು ಜತಿನ್ ಹೇಳಿದರು.
"ನಾವು ರೈಲ್ವೆ ಕ್ರಾಸಿಂಗ್ನಲ್ಲಿ ಕಾರನ್ನು ನಿಲ್ಲಿಸಬೇಕಾಯಿತು, ಅಲ್ಲಿ ನಾವು ಈ ವ್ಯಕ್ತಿಗಳಿಂದ ಸುತ್ತುವರೆದಿದ್ದೆವು. ಅವರ ಒಂದು ಕಾರು ನಮ್ಮ ಮುಂದೆ ಇತ್ತು, ಮತ್ತು ಮೂರು ನಮ್ಮ ಕಾರಿನ ಹಿಂದೆ ಇದ್ದವು. ನಾನು ತಪ್ಪಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದರೂ ಅವರು ರೋಹಿತ್ನನ್ನು ಅವರು ಥಳಿಸಿದರು" ಎಂದು ಅವರು ಹೇಳಿದರು.
ಈ ಪ್ರಕರಣದಲ್ಲಿ ಪೊಲೀಸರು ಇಲ್ಲಿಯವರೆಗೆ ಆರು ಜನರನ್ನು ಬಂಧಿಸಿದ್ದಾರೆ ಮತ್ತು ಹಲ್ಲೆಗೆ ಬಳಸಲಾದ ವಾಹನಗಳಲ್ಲಿ ಒಂದನ್ನು ವಶಪಡಿಸಿಕೊಂಡಿದ್ದಾರೆ. "ರೋಹಿತ್ ಮತ್ತು ಜತಿನ್ ಮದಿರೆಯ ಮತ್ತಿನಲ್ಲಿದ್ದ ಕೆಲವು ಪುರುಷರ ಅಶಿಸ್ತಿನ ವರ್ತನೆಯನ್ನು ವಿರೋಧಿಸಿದರು. ರಾತ್ರಿ 11.30 ರ ಸುಮಾರಿಗೆ ಅವರು ಮನೆಗೆ ಹಿಂತಿರುಗುತ್ತಿದ್ದಾಗ, ಪುರುಷರ ಗುಂಪೊಂದು ಅವರ ಮೇಲೆ ಹಲ್ಲೆ ನಡೆಸಿತು" ಎಂದು ತನಿಖಾಧಿಕಾರಿ ದೇವೇಂದ್ರ ಕುಮಾರ್ ಹೇಳಿದರು.
ರೋಹಿತ್ ಧಂಕರ್ ಎರಡು ಬಾರಿ ಜೂನಿಯರ್ ಪ್ಯಾರಾ ರಾಷ್ಟ್ರೀಯ ದಾಖಲೆ ಹೊಂದಿರುವವರು ಮತ್ತು ಏಳು ಬಾರಿ ಸೀನಿಯರ್ ಪ್ಯಾರಾ ರಾಷ್ಟ್ರೀಯ ಚಾಂಪಿಯನ್ ಆಗಿದ್ದರು. ಅವರು ಪ್ಯಾರಾ ಪವರ್ಲಿಫ್ಟಿಂಗ್ನಲ್ಲಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದರು. ಅವರನ್ನು ಹರಿಯಾಣದ ಮಾಜಿ ಮುಖ್ಯಮಂತ್ರಿ ಮನೋಹರ್ ಲಾಲ್ ಖಟ್ಟರ್ ಕೂಡ ಸನ್ಮಾನಿಸಿದ್ದರು. ಅವರು ಜಿಮ್ ತರಬೇತುದಾರರಾಗಿ ಕೆಲಸ ಮಾಡುತ್ತಿದ್ದರು. ರೋಹಿತ್ ಧಂಕರ್ ಅವರ ದೇಹದ ಮೇಲೆ ಸುಮಾರು 30 ರಿಂದ 35 ಗಾಯದ ಗುರುತುಗಳಿದ್ದವು. ನಮಗೆ ನ್ಯಾಯ ಬೇಕು" ಎಂದು ಕುಟುಂಬ ಸದಸ್ಯರು ಆಗ್ರಹಿಸಿದ್ದಾರೆ.