ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ನಾಳೆ ಡಿಸೆಂಬರ್ 4ರಿಂದ ಎರಡು ದಿನ ಭಾರತ ಪ್ರವಾಸದಲ್ಲಿರುತ್ತಾರೆ. ಆರ್ಥಿಕ, ರಕ್ಷಣಾ ಮತ್ತು ಇಂಧನ ಸಂಬಂಧಗಳನ್ನು ಬಲಪಡಿಸುವತ್ತ ಗಮನಹರಿಸುವ 23ನೇ ಭಾರತ-ರಷ್ಯಾ ಶೃಂಗಸಭೆಯಲ್ಲಿ ಭಾಗವಹಿಸಲಿದ್ದಾರೆ. ಉಕ್ರೇನ್‌ನಲ್ಲಿ ಯುದ್ಧ ಮುಂದುವರೆದಂತೆ ರಷ್ಯಾ ಮತ್ತು ಅಮೆರಿಕ ಜೊತೆ ಸಂಬಂಧಗಳನ್ನು ಸಮತೋಲನಗೊಳಿಸುವ ಭಾರತದ ಪ್ರಯತ್ನಕ್ಕೆ ಈ ಪ್ರವಾಸ ಪೂರಕವಾಗಲಿದೆ.

ಪುಟಿನ್ ನಾಳೆ ಭಾರತಕ್ಕೆ ಆಗಮಿಸಲಿದ್ದು, ಶುಕ್ರವಾರ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ಮಾತುಕತೆ ನಡೆಸಲಿದ್ದಾರೆ. ಎರಡೂ ಕಡೆಯವರು ದ್ವಿಪಕ್ಷೀಯ ಸಹಕಾರವನ್ನು ಪರಿಶೀಲಿಸುವ, ಪ್ರಮುಖ ಪ್ರಾದೇಶಿಕ ಸಮಸ್ಯೆಗಳನ್ನು ಚರ್ಚಿಸುವ ಮತ್ತು ಸರ್ಕಾರಿ ಮತ್ತು ವಾಣಿಜ್ಯ ಒಪ್ಪಂದಗಳಿಗೆ ಸಹಿ ಹಾಕುವ ನಿರೀಕ್ಷೆಯಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಉಕ್ರೇನ್ ಯುದ್ಧದ ಸಮಯದಲ್ಲಿ ವ್ಯಾಪಾರವು ರಷ್ಯಾ ಆದಾಯವನ್ನು ಉಳಿಸಿಕೊಳ್ಳಲು ಸಹಾಯ ಮಾಡುತ್ತದೆ ಎಂದು ಅಮೆರಿಕ ಹೇಳಿಕೊಂಡಿದ್ದರೂ ಭಾರತವು ರಿಯಾಯಿತಿ ದರದಲ್ಲಿ ರಷ್ಯಾದ ತೈಲವನ್ನು ಖರೀದಿಸುವುದನ್ನು ಮುಂದುವರೆಸಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಭಾರತೀಯ ಸರಕುಗಳ ಮೇಲೆ ಹೆಚ್ಚುವರಿ 25% ಸುಂಕವನ್ನು ವಿಧಿಸಿದ್ದಾರೆ, ಇದು ಪ್ರತೀಕಾರವಾಗಿ ಒಟ್ಟು ಸುಂಕಗಳನ್ನು ಶೇಕಡಾ 50ಕ್ಕೆ ಹೆಚ್ಚಿಸಿದೆ.

ಜಾಗತಿಕ ಬೆಲೆ ಏರಿಳಿತದ ನಡುವೆ 1.4 ಶತಕೋಟಿ ಜನರ ಹೆಚ್ಚುತ್ತಿರುವ ಇಂಧನ ಬೇಡಿಕೆಗಳನ್ನು ಪೂರೈಸಲು ಗ್ರಾಹಕರ ಹಿತಾಸಕ್ತಿಯಿಂದ ತನ್ನ ಇಂಧನ ಆಯ್ಕೆಗಳನ್ನು ಭಾರತ ಸಮರ್ಥಿಸಿಕೊಂಡಿದೆ.

ಪುಟಿನ್ ಕೊನೆಯದಾಗಿ 2021 ರಲ್ಲಿ ಭಾರತಕ್ಕೆ ಭೇಟಿ ನೀಡಿದ್ದರು. ಮೋದಿ ಕಳೆದ ವರ್ಷ ರಷ್ಯಾಗೆ ಭೇಟಿ ನೀಡಿದ್ದರು. ಇಬ್ಬರು ನಾಯಕರು ಸೆಪ್ಟೆಂಬರ್‌ನಲ್ಲಿ ಚೀನಾದಲ್ಲಿ ಶಾಂಘೈ ಸಹಕಾರ ಸಂಸ್ಥೆಯ ಶೃಂಗಸಭೆಯ ಸಮಯದಲ್ಲಿ ಭೇಟಿಯಾಗಿದ್ದರು.

ನಿರ್ಣಾಯಕ ರಾಜತಾಂತ್ರಿಕ ಮಾತುಕತೆ

ಅಮೆರಿಕ ಉಕ್ರೇನ್ ಶಾಂತಿ ಯೋಜನೆಗೆ ಪ್ರಮುಖ ಪಾಲುದಾರರಿಂದ ವಿಶಾಲ ಸಹಕಾರವನ್ನು ಬಯಸುತ್ತಿರುವ ಸಂದರ್ಭದಲ್ಲಿ ಭಾರತ-ರಷ್ಯಾ ಶೃಂಗಸಭೆ ನಡೆಯುತ್ತಿದೆ.

ಟ್ರಂಪ್ ಅವರ ಶಾಂತಿ ಯೋಜನೆಯು ರಷ್ಯಾ ಪರವಾಗಿದೆ ಎಂದು ಹೇಳಲಾಗುತ್ತಿದೆ. ವಾರದ ಹಿಂದೆ ಜಿನೀವಾದಲ್ಲಿ ಯುಎಸ್ ಮತ್ತು ಉಕ್ರೇನ್ ಅಧಿಕಾರಿಗಳು ಭೇಟಿಯಾದ ನಂತರ ಈ ಪ್ರಸ್ತಾಪವನ್ನು ಪರಿಷ್ಕರಿಸಲಾಗಿದೆ.

ಪುಟಿನ್ ಭೇಟಿಯ ಪ್ರಮುಖ ಗಮನ ಆರ್ಥಿಕ ಸಹಕಾರ

ಭಾರತ ಮತ್ತು ರಷ್ಯಾ ತಮ್ಮ ದ್ವಿಪಕ್ಷೀಯ ಸಂಬಂಧವನ್ನು ಬಲಪಡಿಸುವತ್ತ ಗಮನಹರಿಸಲಿವೆ ಮತ್ತು ಆರ್ಥಿಕ ಸಹಕಾರ, ವ್ಯಾಪಾರ ಸೌಲಭ್ಯ, ಕಡಲ, ಆರೋಗ್ಯ ಮತ್ತು ಮಾಧ್ಯಮ ವಿನಿಮಯಗಳ ಸುತ್ತ ಕೇಂದ್ರೀಕೃತವಾದ ದಾಖಲೆಗಳ ಪ್ಯಾಕೇಜ್ ನ್ನು ತಲುಪಿಸುವ ನಿರೀಕ್ಷೆಯಿದೆ ಎಂದು ಶೃಂಗಸಭೆಯ ಸಿದ್ಧತೆಯಲ್ಲಿ ಭಾಗಿಯಾಗಿರುವ ಭಾರತೀಯ ಅಧಿಕಾರಿಗಳು ತಿಳಿಸಿದ್ದಾರೆ.

ರಷ್ಯಾಕ್ಕೆ ಔಷಧಗಳು, ಕೃಷಿ ಮತ್ತು ಜವಳಿಗಳ ರಫ್ತು ಹೆಚ್ಚಿಸಲು ಭಾರತ ಉತ್ಸುಕವಾಗಿದೆ. ಸುಂಕ ರಹಿತ ಅಡೆತಡೆಗಳನ್ನು ತೆಗೆದುಹಾಕಲು ಪ್ರಯತ್ನಿಸುತ್ತಿದೆ. ಭಾರತ ರಷ್ಯಾದಿಂದ ರಸಗೊಬ್ಬರಗಳ ದೀರ್ಘಾವಧಿಯ ಪೂರೈಕೆಯನ್ನು ಸಹ ಬಯಸುತ್ತಿದೆ.

ಒಪ್ಪಂದವನ್ನು ಅಂತಿಮಗೊಳಿಸಲು ಎರಡೂ ದೇಶಗಳು ಕೆಲಸ ಮಾಡುತ್ತಿರುವ ಮತ್ತೊಂದು ಪ್ರಮುಖ ಕ್ಷೇತ್ರವೆಂದರೆ ರಷ್ಯಾಕ್ಕೆ ಭಾರತೀಯ ಕೌಶಲ್ಯಪೂರ್ಣ ಕಾರ್ಮಿಕರ ಸುರಕ್ಷಿತ ಮತ್ತು ನಿಯಂತ್ರಿತ ವಲಸೆ.

2018 ರಲ್ಲಿ ಸುಮಾರು 5.4 ಬಿಲಿಯನ್ ಡಾಲರ್ ಮೌಲ್ಯದ ಒಪ್ಪಂದದಡಿಯಲ್ಲಿ ಮೂರು S-400 ಮೇಲ್ಮೈಯಿಂದ ಗಾಳಿಗೆ ಹಾರುವ ಕ್ಷಿಪಣಿ ಸ್ಕ್ವಾಡ್ರನ್‌ಗಳನ್ನು ಪಡೆದ ನಂತರ, ಭಾರತವು ರಷ್ಯಾವನ್ನು ಇನ್ನೂ ಎರಡು S-400 ಮೇಲ್ಮೈಯಿಂದ ಗಾಳಿಗೆ ಹಾರುವ ಕ್ಷಿಪಣಿ ಸ್ಕ್ವಾಡ್ರನ್‌ಗಳ ತ್ವರಿತ ಪೂರೈಕೆ ಕೇಳುವ ಸಾಧ್ಯತೆಯಿದೆ. ಉಕ್ರೇನ್‌ನಲ್ಲಿನ ಯುದ್ಧಕ್ಕೆ ಸಂಬಂಧಿಸಿದ ಪೂರೈಕೆ ಸರಪಳಿ ಅಡಚಣೆಗಳಿಂದಾಗಿ ವಿಳಂಬವಾಗಿದೆ.

ಯಾವುದೇ ಒಪ್ಪಂದ ಅಥವಾ ಘೋಷಣೆಯನ್ನು ನಿರೀಕ್ಷಿಸಲಾಗಿಲ್ಲವಾದರೂ, ಹೆಚ್ಚುವರಿ ಎಸ್-400 ಘಟಕಗಳು ಅಥವಾ ನವೀಕರಿಸಿದ ರೂಪಾಂತರವನ್ನು ಸ್ವಾಧೀನಪಡಿಸಿಕೊಳ್ಳುವ ಸಾಧ್ಯತೆಯನ್ನು ಭಾರತ ಒಪ್ಪಂದದಲ್ಲಿ ಹೊಂದಿದೆ.

ಮೇ ತಿಂಗಳಲ್ಲಿ ಪಾಕಿಸ್ತಾನದೊಂದಿಗೆ ಮಿಲಿಟರಿ ಬಿಕ್ಕಟ್ಟಿನ ಸಮಯದಲ್ಲಿ ಎಸ್-400 ಪರಿಣಾಮಕಾರಿ ಎಂದು ಸಾಬೀತಾಗಿದೆ.

ಭಾರತದ ರಷ್ಯಾ ನಿರ್ಮಿತ Su-30MKI ಫೈಟರ್ ಜೆಟ್‌ಗಳನ್ನು ಮೇಲ್ದರ್ಜೆಗೇರಿಸುವುದು ಮತ್ತು ನಿರ್ಣಾಯಕ ಮಿಲಿಟರಿ ಹಾರ್ಡ್‌ವೇರ್ ವಿತರಣೆಯನ್ನು ವೇಗಗೊಳಿಸುವುದು, ವಿಪತ್ತು ಪರಿಹಾರದ ಸಮನ್ವಯವನ್ನು ಸುಧಾರಿಸುವ ಬಗ್ಗೆಯೂ ಮಾತುಕತೆ ನಡೆಯುವ ನಿರೀಕ್ಷೆಯಿದೆ.

ಕಳೆದ ಕೆಲವು ವರ್ಷಗಳಿಂದ ಭಾರತದ ಮಿಲಿಟರಿ ಹಾರ್ಡ್‌ವೇರ್ ಖರೀದಿಯಲ್ಲಿ ರಷ್ಯಾ ತನ್ನ ಅತಿದೊಡ್ಡ ಪೂರೈಕೆದಾರನಾಗಿ ಮುಂದುವರೆದಿದೆ. ರಷ್ಯಾ ತನ್ನ ಸ್ಟೆಲ್ತ್ ಫೈಟರ್ ಜೆಟ್ ಸು-57 ನ್ನು ಭಾರತಕ್ಕೆ ಮಾರಾಟ ಮಾಡಲು ಉತ್ಸುಕವಾಗಿದೆ. ಆದರೆ ಭಾರತ ತನ್ನ ಆಯ್ಕೆಗಳನ್ನು ಇತರ ವಿದೇಶಿ ಪೂರೈಕೆದಾರರಿಗೂ ಮುಕ್ತವಾಗಿರಿಸಿದೆ.