ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಭಾನುವಾರ ದೇಶದ ಜೆನ್-ಝೀ(Gen-Z) ದೃಢಸಂಕಲ್ಪವು 'ವಿಕಸಿತ ಭಾರತ'ದ ದೊಡ್ಡ ಶಕ್ತಿ ಎಂದು ಹೇಳಿದ್ದಾರೆ.

ಇಂದು ತಮ್ಮ ಮಾಸಿಕ ರೇಡಿಯೋ ಕಾರ್ಯಕ್ರಮ 'ಮನ್ ಕಿ ಬಾತ್' ನ 128 ನೇ ಸಂಚಿಕೆಯನ್ನುದ್ದೇಶಿಸಿ ಮಾತನಾಡಿದ ಪ್ರಧಾನಿ ಮೋದಿ, "ಹೃದಯದಲ್ಲಿ ದೃಢಸಂಕಲ್ಪವಿದ್ದರೆ, ತಂಡವಾಗಿ ಕೆಲಸ ಮಾಡುವ ಸಾಮೂಹಿಕ ಶಕ್ತಿಯ ಮೇಲೆ ನಂಬಿಕೆ ಇದ್ದರೆ, ಒಮ್ಮೆ ಮುಗ್ಗರಿಸಿದರೂ ನಂತರ ಮತ್ತೆ ಮೇಲೇಳುವ ಧೈರ್ಯವಿದ್ದರೆ, ಕಷ್ಟದ ಸಮಯಗಳಲ್ಲಿಯೂ ಯಶಸ್ಸು ಖಚಿತ" ಎಂದು ಹೇಳಿದರು.

ಉಪಗ್ರಹಗಳು, ಜಿಪಿಎಸ್ ಅಥವಾ ಸಂಚರಣೆ ಸೌಲಭ್ಯಗಳಿಲ್ಲದ ಆ ಯುಗವನ್ನು ಊಹಿಸಿ, ಆಗಲೂ ನಮ್ಮ ನಾವಿಕರು ದೊಡ್ಡ ಹಡಗುಗಳನ್ನು ಸಾಗರಕ್ಕೆ ತೆಗೆದುಕೊಂಡು ತಮ್ಮ ಗಮ್ಯಸ್ಥಾನಗಳನ್ನು ತಲುಪುತ್ತಿದ್ದರು. ಈಗ, ಸಮುದ್ರಗಳನ್ನು ಮೀರಿ, ಪ್ರಪಂಚದ ದೇಶಗಳು ಬಾಹ್ಯಾಕಾಶದ ಅನಂತ ವಿಸ್ತಾರವನ್ನು ಅಳೆಯುತ್ತಿವೆ. ಸವಾಲು ಹಾಗೆಯೇ ಉಳಿದಿದೆ - ಜಿಪಿಎಸ್ ಅಥವಾ ಯಾವುದೇ ಸಂವಹನವಿಲ್ಲದ ಕಾಲದಿಂದ ಇಷ್ಟು ದೂರ ಮುಂದುವರಿದುಕೊಂಡು ಹೇಗೆ ಬಂದೆವು ಎಂದು ಪ್ರಧಾನಿ ಹಿಂದಿನ ಮತ್ತು ಇಂದಿನ ಕಾಲಕ್ಕೆ ತುಲನೆ ಮಾಡಿ ಹೇಳಿದ್ದಾರೆ.

ಪುಣೆಯ ಯುವಕರ ಡ್ರೋನ್ ವಿಡಿಯೊ, ಮರಳಿ ಯತ್ನ ಮಾಡುತ್ತಿರಬೇಕು

ಒಂದು ಉದಾಹರಣೆಯನ್ನು ನೆನಪಿಸಿಕೊಂಡ ಪ್ರಧಾನ ಮಂತ್ರಿಗಳು, ಜೆನ್-ಝೀ ತಮ್ಮ ಕೌಶಲ್ಯಗಳನ್ನು ಪ್ರದರ್ಶಿಸಿದ ಇಸ್ರೋದ ಡ್ರೋನ್ ಸ್ಪರ್ಧೆಯಿಂದ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆದ ವೀಡಿಯೊವನ್ನು ನೋಡಿದೆ. ಆ ವಿಡಿಯೋದಲ್ಲಿ, ನಮ್ಮ ದೇಶದ ಯುವಕರು, ವಿಶೇಷವಾಗಿ ನಮ್ಮ ಜೆನ್-ಝೀ, ಮಂಗಳ ಗ್ರಹದಂತೆಯೇ ಇರುವ ಪರಿಸ್ಥಿತಿಗಳಲ್ಲಿ ಡ್ರೋನ್‌ಗಳನ್ನು ಹಾರಿಸಲು ಪ್ರಯತ್ನಿಸುತ್ತಿದ್ದರು. ಡ್ರೋನ್‌ಗಳು ಹಾರಾಟ ನಡೆಸಿದ, ಸ್ವಲ್ಪ ಸಮಯದವರೆಗೆ ಸ್ಥಿರವಾಗಿರುತ್ತವೆ, ನಂತರ ಇದ್ದಕ್ಕಿದ್ದಂತೆ ನೆಲಕ್ಕೆ ಅಪ್ಪಳಿಸುತ್ತವೆ.

ಏಕೆ ಗೊತ್ತಾ? ಏಕೆಂದರೆ ಈ ಡ್ರೋನ್‌ಗಳಿಗೆ ಜಿಪಿಎಸ್ ಬೆಂಬಲವಿರಲಿಲ್ಲ. ಮಂಗಳ ಗ್ರಹದಲ್ಲಿ ಜಿಪಿಎಸ್ ಸಾಧ್ಯವಿಲ್ಲ. ಆದ್ದರಿಂದ ಡ್ರೋನ್ ಯಾವುದೇ ಬಾಹ್ಯ ಸಂಕೇತ ಅಥವಾ ಮಾರ್ಗದರ್ಶನವನ್ನು ಸ್ವೀಕರಿಸುವುದಿಲ್ಲ. ಡ್ರೋನ್ ತನ್ನ ಕ್ಯಾಮೆರಾಗಳು ಮತ್ತು ಅಂತರ್ನಿರ್ಮಿತ ಸಾಫ್ಟ್‌ವೇರ್ ಬಳಸಿ ಹಾರಬೇಕಾಗಿತ್ತು. ಸಣ್ಣ ಡ್ರೋನ್ ನೆಲದ ಮೇಲಿನ ಮಾದರಿಗಳನ್ನು ಗುರುತಿಸಬೇಕಾಗಿತ್ತು, ಎತ್ತರವನ್ನು ಅಳೆಯಬೇಕಾಗಿತ್ತು, ಅಡೆತಡೆಗಳನ್ನು ಅರ್ಥಮಾಡಿಕೊಳ್ಳಬೇಕಾಗಿತ್ತು ಮತ್ತು ತನ್ನದೇ ಆದ ಸುರಕ್ಷಿತ ಲ್ಯಾಂಡಿಂಗ್ ಮಾರ್ಗವನ್ನು ಕಂಡುಕೊಳ್ಳಬೇಕಾಗಿತ್ತು. ಅದಕ್ಕಾಗಿಯೇ ಡ್ರೋನ್‌ಗಳು ಒಂದರ ನಂತರ ಒಂದರಂತೆ ಅಪ್ಪಳಿಸುತ್ತಲೇ ಇದ್ದವು ಎಂದು ಪ್ರಧಾನಿ ವಿವರಿಸಿದರು.

ಈ ಸ್ಪರ್ಧೆಯಲ್ಲಿ, ಪುಣೆಯ ಯುವಕರ ತಂಡವು ತಮ್ಮ ಡ್ರೋನ್ ಹಲವು ಬಾರಿ ಬಿದ್ದು ಅಪಘಾತಕ್ಕೀಡಾದ ನಂತರವೂ ಅವರು ಬಿಟ್ಟುಕೊಡಲಿಲ್ಲ. ಪದೇ ಪದೇ ಪ್ರಯತ್ನಿಸಿದ ನಂತರ, ಅವರ ಡ್ರೋನ್ ಅಂತಿಮವಾಗಿ ಮಂಗಳ ಗ್ರಹದಂತಹ ಪರಿಸ್ಥಿತಿಗಳಲ್ಲಿ ಸ್ವಲ್ಪ ಸಮಯದವರೆಗೆ ಹಾರಲು ಸಾಧ್ಯವಾಯಿತು. ಈ ವೀಡಿಯೊವನ್ನು ನೋಡುವಾಗ, ಚಂದ್ರಯಾನ -2 ಸಂವಹನವನ್ನು ಕಳೆದುಕೊಂಡ ದಿನ ನೆನಪಿಗೆ ಬರುತ್ತದೆ ಎಂದರು.

ಆ ದಿನ, ಇಡೀ ರಾಷ್ಟ್ರ, ವಿಶೇಷವಾಗಿ ನಮ್ಮ ವಿಜ್ಞಾನಿಗಳು ಕೆಲವು ಕ್ಷಣಗಳ ಕಾಲ ನಿರಾಶೆಗೊಂಡರು. ಆದಾಗ್ಯೂ, ಈ ವೈಫಲ್ಯ ಅವರನ್ನು ತಡೆಯಲಿಲ್ಲ. ಆ ದಿನವೇ ಅವರು ಚಂದ್ರಯಾನ-3 ರ ಯಶೋಗಾಥೆಯನ್ನು ಬರೆಯಲು ಪ್ರಾರಂಭಿಸಿದರು. ಚಂದ್ರಯಾನ-3 ಯಶಸ್ವಿಯಾಗಿ ಭೂಮಿಗೆ ಇಳಿದಾಗ, ಅದು ಕೇವಲ ಕಾರ್ಯಾಚರಣೆಯ ಯಶಸ್ಸಲ್ಲ, ಬದಲಾಗಿ ವೈಫಲ್ಯದಿಂದ ಹುಟ್ಟಿದ ಆತ್ಮವಿಶ್ವಾಸದ ವಿಜಯವಾಗಿತ್ತು ಎಂದು ಮೋದಿ ಬಣ್ಣಿಸಿದರು.

ಈ ವಿಡಿಯೋದಲ್ಲಿ, ಈ ಯುವಕರ ಕಣ್ಣುಗಳಲ್ಲಿ ಅದೇ ಕಿಡಿಯನ್ನು ನಾನು ನೋಡಬಹುದು. ನಮ್ಮ ಯುವಕರ ಸಮರ್ಪಣೆ ಮತ್ತು ನಮ್ಮ ವಿಜ್ಞಾನಿಗಳ ಬದ್ಧತೆಯನ್ನು ನಾನು ನೋಡಿದಾಗಲೆಲ್ಲಾ, ನನ್ನ ಹೃದಯವು ಉತ್ಸಾಹದಿಂದ ತುಂಬುತ್ತದೆ. ನಮ್ಮ ಯುವಕರ ದೃಢಸಂಕಲ್ಪವು ವಿಕಸಿತ ಭಾರತದ ಅತಿದೊಡ್ಡ ಶಕ್ತಿಯಾಗಿದೆ ಎಂದು ಹೇಳಿದರು.