ಹೈದರಾಬಾದ್‌: ಹೈದರಾಬಾದ್‌ನ ಯೂಸುಫ್‌ಗುಡದಲ್ಲಿ ಬಾಡಿಗೆಗೆ ಇರುವ ಮಹಿಳೆಯೊಬ್ಬರ ಮನೆಯ ಬಾತ್‍ರೂಮ್ ನ ಬಲ್ಬ್ ಹೋಲ್ಡರ್ ಒಳಗೆ ಹಿಡನ್ ಕ್ಯಾಮೆರಾ ಇಟ್ಟಿದ್ದ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ.
23 ವರ್ಷದ ಭೂಕ್ಯಾ ಸಂಸ್ಕೃತಿ ಎಂಬ ಯುವತಿ, ಅಮೀರ್‌ಪೇಟೆಯ ಆದಿತ್ಯ ಟ್ರೇಡ್ ಸೆಂಟರ್‌ನಲ್ಲಿ ಕೆಲಸ ಮಾಡುವ ಪತಿ ನೆನವತ್ ಉಮೇಶ್ ಅವರೊಂದಿಗೆ ಈ ಮನೆಯಲ್ಲಿ ವಾಸಿಸುತ್ತಿದ್ದರು.
ಅಕ್ಟೋಬರ್ 13 ರಂದು ಅವರು ತಮ್ಮ ಮನೆಯ ಬಾತ್‍ರೂಮ್ ನಲ್ಲಿ ಹಿಡನ್ ಕ್ಯಾಮೆರಾ ಪತ್ತೆ ಹಚ್ಚಿದ್ದು, ಈ ಸಂಬಂಧ ಪೊಲೀಸರು ದೂರು ನೀಡಿದ್ದಾರೆ. ಪ್ರಕರಣ ದಾಖಲಾಗಿದ್ದು, ತನಿಖೆ ನಡೆಯುತ್ತಿದೆ.
ಭೂಕ್ಯಾ ಅವರು ಅಕ್ಟೋಬರ್ 4 ರಂದು ಬಲ್ಬ್ ಕಾರ್ಯನಿರ್ವಹಿಸುತ್ತಿಲ್ಲ ಎಂದು ಮನೆ ಮಾಲೀಕ ಅಶೋಕ್ ಯಾದವ್ ಅವರಿಗೆ ತಿಳಿಸಿದ್ದಾರೆ. ಮಾಲೀಕರು ಮತ್ತು ಎಲೆಕ್ಟ್ರಿಷಿಯನ್ ಚಿಂಟು ಮಹಿಳೆ ಕಚೇರಿಯಲ್ಲಿದ್ದಾಗ ದುರಸ್ತಿ ಕೆಲಸಕ್ಕಾಗಿ ಅವರ ನಿವಾಸಕ್ಕೆ ಬಂದಿದ್ದರು. ದುರಸ್ತಿ ಮಾಡಿ ಹೋದ ಕೆಲವು ದಿನಗಳ ನಂತರ, ಬಲ್ಬ್ ಹೋಲ್ಡರ್‌ನಿಂದ ಸ್ಕ್ರೂ ಬಿದ್ದಿರುವುದನ್ನು ಅವರ ಪತಿ ಗಮನಿಸಿದ್ದಾರೆ. ದಂಪತಿಗಳು ಸೂಕ್ಷ್ಮವಾಗಿ ಪರಿಶೀಲಿಸಿದಾಗ ಅದರೊಳಗೆ ಕ್ಯಾಮೆರಾ ಇರುವುದು ಪತ್ತೆಯಾಗಿದೆ.
ನಂತರ, ಅವರು ತಕ್ಷಣ ಮನೆ ಮಾಲೀಕ ಅಶೋಕ್ ಯಾದವ್‌ಗೆ ಮಾಹಿತಿ ನೀಡಿದ್ದಾರೆ. ಅವರು ತಮ್ಮ ನಿವಾಸಕ್ಕೆ ಬಂದು ಬಲ್ಬ್ ಹೋಲ್ಡರ್ ಅನ್ನು ತೆಗೆದುಕೊಂಡು ಹೋದರು ಮತ್ತು ಸ್ವಲ್ಪ ಸಮಯದ ನಂತರ, ಅಶೋಕ್ ಹೋಲ್ಡರ್‌ನೊಂದಿಗೆ ವಾಪಸ್ ಬಂದು, ಅದು ಹಾಳಾಗಿದೆ, "ಕೆಲಸ ಮಾಡುತ್ತಿಲ್ಲ" ಎಂದು ಅವರಿಗೆ ತಿಳಿಸಿ ಅದನ್ನು ಸ್ವತಃ ಮತ್ತೊಮ್ಮೆ ಪರಿಶೀಲಿಸಲು ಹೇಳಿದರು.
ಈ ವೇಳೆ ಭೂಕ್ಯಾ ಪೊಲೀಸರಿಗೆ ದೂರು ನೀಡುವುದಾಗಿ ಮಾಲೀಕರಿಗೆ ಹೇಳಿದಾಗ, ವಿಷಯವನ್ನು ಇತ್ಯರ್ಥಪಡಿಸಲು ಎಲೆಕ್ಟ್ರಿಷಿಯನ್ ಅನ್ನು ಮನೆಗೆ ಕರೆತರುವುದಾಗಿ ಭರವಸೆ ನೀಡುವ ಮೂಲಕ ಅವರು ಮಹಿಳೆಯನ್ನು ತಡೆಯಲು ಪ್ರಯತ್ನಿಸಿದರು.
ಮಂಗಳವಾರ, ದಂಪತಿಗಳು ಎಲೆಕ್ಟ್ರಿಷಿಯನ್ ಬಗ್ಗೆ ಕೇಳಿದಾಗ, ಮಾಲೀಕರು, ನೀವು ಪೊಲೀಸರಿಗೆ ದೂರು ನೀಡಿದರೆ, "ಎಲೆಕ್ಟ್ರಿಷಿಯನ್ ಜೈಲಿನಿಂದ ಹೊರಬಂದ ನಂತರ ನಿಮ್ಮನ್ನು ಬ್ಲ್ಯಾಕ್‌ಮೇಲ್ ಮಾಡುತ್ತಾನೆ; ಎಚ್ಚರ. ಅದು ನಿಮಗೆ ಬಿಟ್ಟ ವಿಚಾರ" ಎಂದು ಹೆದರಿಸಿದರು ಎಂದು ದೂರಿನಲ್ಲಿ ತಿಳಿಸಲಾಗಿದೆ.