ಆಂಧ್ರ ಪ್ರದೇಶದ ಎನ್ಟಿಆರ್ ಜಿಲ್ಲೆಯ ವೀರವಳ್ಳಿ ಗ್ರಾಮದಲ್ಲಿರುವ ಬಾಪುಲಪಾಡು ಮಂಡಲದಲ್ಲಿ ಜಿಲ್ಲಾ ಪರಿಷತ್ ಹೈ ಸ್ಕೂಲ್ನ ತರಗತಿ ಕೊಠಡಿಯಲ್ಲಿ 10ನೇ ತರಗತಿಯ ವಿದ್ಯಾರ್ಥಿ ಶಿಕ್ಷಕನ ಮೇಲೆ ಹಲ್ಲೆ ನಡೆಸಿದ ವಿಡಿಯೊ ವ್ಯಾಪಕವಾಗಿ ವೈರಲ್ ಆಗಿದೆ.
ತರಗತಿಯಲ್ಲಿ ನಡೆದ ಸಣ್ಣ ಮಾತಿನ ಚಕಮಕಿ ವಿದ್ಯಾರ್ಥಿ ಮತ್ತು ಶಿಕ್ಷಕರ ನಡುವೆ ತೀವ್ರ ವಾಗ್ವಾದಕ್ಕೆ ತಿರುಗಿತು. ವಿದ್ಯಾರ್ಥಿಯನ್ನು ಗದರಿಸುವ ವೇಳೆ ಶಿಕ್ಷಕರು ಅವಾಚ್ಯ ಪದಗಳನ್ನು ಬಳಸಿದರೆಂದು ಆರೋಪವಾಗಿದ್ದು, ಇದರಿಂದ ಪರಿಸ್ಥಿತಿ ಮತ್ತಷ್ಟು ತೀವ್ರಗೊಂಡಿತು.
ವಿವಾದ ಕ್ಷಣಾರ್ಧದಲ್ಲೇ ಗಂಭೀರವಾಗಿದ್ದು, ವಿಡಿಯೋದಲ್ಲಿ ವಿದ್ಯಾರ್ಥಿ ಶಿಕ್ಷಕರಿಗೆ ಮುಷ್ಟಿಯಿಂದ ಹೊಡೆಯುತ್ತಿರುವುದು ಕಂಡುಬರುತ್ತದೆ. ಈ ವೇಳೆ ತರಗತಿಯಲ್ಲಿದ್ದ ಇತರ ವಿದ್ಯಾರ್ಥಿಗಳು ಅದನ್ನು ನೋಡುತ್ತಿರುವುದೂ ಕಾಣಿಸುತ್ತದೆ.
ಕೆಲ ವಿದ್ಯಾರ್ಥಿಗಳು ಜಗಳ ನಿಲ್ಲಿಸಲು ಹಾಗೂ ಇಬ್ಬರನ್ನೂ ಬೇರ್ಪಡಿಸಲು ಪ್ರಯತ್ನಿಸುತ್ತಿರುವುದೂ ಕಾಣುತ್ತದೆ.ಈ ಘಟನೆ ವಿದ್ಯಾರ್ಥಿಗಳ ಶಿಸ್ತು, ಶಿಕ್ಷಕರ ವರ್ತನೆ ಹಾಗೂ ಶಾಲಾ ಪರಿಸರದಲ್ಲಿ ಹೆಚ್ಚುತ್ತಿರುವ ಸಂಘರ್ಷಗಳ ಬಗ್ಗೆ ಆನ್ಲೈನ್ನಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.
ಈ ಜಗಳಕ್ಕೆ ಕಾರಣವಾದ ಅಂಶಗಳನ್ನು ತಿಳಿದುಕೊಳ್ಳಲು ಶಿಕ್ಷಣ ಇಲಾಖೆ ಅಧಿಕಾರಿಗಳು ತನಿಖೆ ನಡೆಸುವ ಸಾಧ್ಯತೆಯಿದೆ. ಅಧಿಕೃತ ವಿಚಾರಣೆಯ ಭಾಗವಾಗಿ ಅವರು ವಿಡಿಯೋವನ್ನು ಪರಿಶೀಲಿಸಿ ಶಾಲಾ ಸಿಬ್ಬಂದಿ ಮತ್ತು ವಿದ್ಯಾರ್ಥಿಗಳನ್ನು ವಿಚಾರಣೆ ಮಾಡಬಹುದು.