ಹೈದರಾಬಾದ್: ಮೇ 23ರಂದು ಹೈದರಾಬಾದ್‌ನಲ್ಲಿ ಹಿರಿಯ ವಕೀಲ ಖ್ವಾಜಾ ಮೊಯಿಜುದ್ದೀನ್ ಗೆ ಕಾರು ಡಿಕ್ಕಿ ಹೊಡೆದು ಮೃತಪಟ್ಟಿದ್ದಾರೆ. ಇದು ಪೂರ್ವಯೋಜಿತ ಕೊಲೆಯ ಪ್ರಕರಣವಾಗಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಖ್ವಾಜಾ ಮೊಯಿಜುದ್ದೀನ್ ಮನೆಯಿಂದ ಹೊರಬಂದು ತಮ್ಮ ಕಾರನ್ನು ಹತ್ತಲು ಹೊರಟಿದ್ದಾಗ, ಹಸಿರು ಬಣ್ಣದ ಸ್ಕಾರ್ಪಿಯೋ ಕಾರು ಅವರಿಗೆ ಡಿಕ್ಕಿ ಹೊಡೆದಿತ್ತು.
ಹೈದರಾಬಾದ್‌ನಲ್ಲಿ ನಡೆದ ಘಟನೆಯ ವೀಡಿಯೊ ಕೂಡ ಹೊರಬಿದ್ದಿದೆ. ವೀಡಿಯೊದಲ್ಲಿ 63 ವರ್ಷದ ವಕೀಲ ಮೊಯಿಜುದ್ದೀನ್ ತಮ್ಮ ಕಾರಿನಲ್ಲಿ ಚೀಲವನ್ನು ಇಡುವುದನ್ನು ಕಾಣಬಹುದು. ಈ ವೇಳೆ ವೇಗವಾಗಿ ಬಂದ ಕಾರು ಅವರಿಗೆ ಬಲವಾಗಿ ಡಿಕ್ಕಿ ಹೊಡೆದಿದೆ. ಪರಿಣಾಮ ಅವರು ಕಾರಿನಿಂದ ಸುಮಾರು 15-20 ಅಡಿಗಳಷ್ಟು ದೂರಕ್ಕೆ ಬಿದ್ದರು. ಕೂಡಲೇ ಸ್ಥಳೀಯರು ವಕೀಲ ಮೊಯಿಜುದ್ದೀನ್ ಅವರನ್ನು ಮಹಾವೀರ್ ಆಸ್ಪತ್ರೆಗೆ ಸಾಗಿಸಿದರು. ಆದರೆ ಚಿಕಿತ್ಸೆ ಫಲಿಸದೇ ಮೃತಪಟ್ಟಿದ್ದಾರೆ. ಹಿಟ್-ಅಂಡ್-ರನ್ ಪ್ರಕರಣವನ್ನು ದಾಖಲಿಸಲಾಗಿದೆ. ವಾಹನವನ್ನು ಪತ್ತೆಹಚ್ಚಲು ಮತ್ತು ಆರೋಪಿಗಳನ್ನು ಗುರುತಿಸಲು ನಾಲ್ಕು ತಂಡಗಳನ್ನು ನಿಯೋಜಿಸಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಕುಟುಂಬಸ್ಥರಿಂದ ಪಿತೂರಿ ಶಂಕೆ
ವಕ್ಫ್ ಭೂಮಿಯ ಅತಿಕ್ರಮಕ್ಕೆ ಸಂಬಂಧಿಸಿದ ದೀರ್ಘಕಾಲದ ಕಾನೂನು ವಿವಾದಗಳಿಗೆ ಸಂಬಂಧಿಸಿದ ಉದ್ದೇಶಪೂರ್ವಕ ಪಿತೂರಿ ಈ ಘಟನೆ ಎಂದು ವಕೀಲ ಮೊಯಿಜುದ್ದೀನ್ ಅವರ ಕುಟುಂಬ ಆರೋಪಿಸಿದೆ. ಮೊಯಿಜುದ್ದೀನ್ ಅವರು ವಕ್ಫ್ ಆಸ್ತಿಗಳ ಅಕ್ರಮ ಆಕ್ರಮಣ ಮತ್ತು ಖಾಸಗೀಕರಣಕ್ಕೆ ಸಂಬಂಧಿಸಿದ ಹಲವಾರು ಪ್ರಕರಣಗಳಲ್ಲಿ ಹೋರಾಡುತ್ತಿದ್ದಾರೆ ಎಂದು ಅವರ ಮಗ ಮತ್ತು ವಕೀಲ ಮೊಹಮ್ಮದ್ ಫರ್ಹಾನ್ ಹೇಳಿದ್ದಾರೆ.