ರಾಯ್‌ಪುರ: ಮನೆ ಮುಂದೆ ಮಗು ಎತ್ತಿಕೊಂಡು ಆಟವಾಡಿಸುತ್ತಿದ್ದ ವ್ಯಕ್ತಿಯೊಬ್ಬರ ಮೇಲೆ ಗೂಳಿಯೊಂದು ಏಕಾಏಕಿ ದಾಳಿ ನಡೆಸಿದ ಘಟನೆ ಛತ್ತೀಸ್‌ಗಢದ ರಾಯ್‌ಪುರದ ಡಿಡಿ ನಗರದಲ್ಲಿ ನಡೆದಿದೆ.
ಗೂಳಿಯ ದಾಳಿಯಿಂದ ವ್ಯಕ್ತಿ ನೆಲಕ್ಕೆ ಬಿದ್ದಿದ್ದು, ಈ ವೇಳೆ ಆತನ ಕೈಯಲ್ಲಿದ್ದ ಮಗು ಕೂಡ ಕೆಳಗೆ ಬಿದ್ದಿದೆ. ಗೂಳಿ ವ್ಯಕ್ತಿಯ ಮೇಲೆ ದಾಳಿ ಮುಂದುವರಿಸಿದ ಸಂದರ್ಭದಲ್ಲಿ ಸ್ಥಳಕ್ಕೆ ಧಾವಿಸಿದ ಮಹಿಳೆಯೊಬ್ಬರು ಮಗುವನ್ನು ರಕ್ಷಿಸಿದ್ದಾರೆ. ಇಡೀ ಘಟನೆ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.
ಮೂಲಗಳ ಪ್ರಕಾರ ಅಕ್ಟೋಬರ್ 6ರಂದು ದಾಖಲಾಗಿರುವುದಾಗಿ ಹೇಳಲಾಗುತ್ತಿರುವ ಈ ದೃಶ್ಯ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.
ರಸ್ತೆಯಲ್ಲಿ ಮಗುವನ್ನು ಎತ್ತಿಕೊಂಡು ವ್ಯಕ್ತಿಯೊಬ್ಬರು ಆಟವಾಡಿಸುತ್ತಿರುವಾಗ ಎದುರಿನಿಂದ ದೊಡ್ಡ ಗೂಳಿಯೊಂದು ಬರುತ್ತದೆ. ಕೆಲವೇ ಕ್ಷಣಗಳಲ್ಲಿ ಅದು ಏಕಾಏಕಿ ವೇಗವಾಗಿ ವ್ಯಕ್ತಿಯತ್ತ ನುಗ್ಗಿದೆ.
ಗೂಳಿ ಡಿಕ್ಕಿ ಹೊಡೆದ ಪರಿಣಾಮ ವ್ಯಕ್ತಿ ನೆಲಕ್ಕೆ ಬಿದ್ದಿದ್ದಾರೆ. ಈ ವೇಳೆ ಅವರ ಕೈಯಲ್ಲಿದ್ದ ಮಗು ಕೆಳಗೆ ಬಿದ್ದಿದ್ದು, ಅಳುತ್ತಿರುವುದು ದೃಶ್ಯದಲ್ಲಿ ಕಂಡುಬರುತ್ತದೆ. ವ್ಯಕ್ತಿಯ ಸುತ್ತಲೂ ಗೂಳಿ ಆಕ್ರಮಣಕಾರಿಯಾಗಿ ಓಡಾಡುತ್ತಿದ್ದು, ಆತ ತನ್ನನ್ನು ರಕ್ಷಿಸಿಕೊಳ್ಳಲು ಪ್ರಯತ್ನಿಸುತ್ತಿರುವುದು ಸಿಸಿಟಿವಿ ದೃಶ್ಯದಲ್ಲಿ ಕಾಣಿಸುತ್ತದೆ.
ಮಗುವಿನ ರಕ್ಷಣೆಗೆ ಧಾವಿಸಿದ ಮಹಿಳೆ
ಘಟನೆಯಿಂದ ಉಂಟಾದ ಗದ್ದಲ ಕೇಳಿ ಸಮೀಪದ ಮನೆಯೊಂದರಿಂದ ಮಹಿಳೆಯೊಬ್ಬರು ಹೊರಗೆ ಓಡಿ ಬಂದಿದ್ದಾರೆ.
ನೆಲದ ಮೇಲೆ ಬಿದ್ದಿದ್ದ ಮಗುವಿನ ಬಳಿಗೆ ಧಾವಿಸಿದ ಅವರು ಮಗುವನ್ನು ಎತ್ತಿಕೊಂಡು ಗೂಳಿಯಿಂದ ದೂರಕ್ಕೆ ಕರೆದೊಯ್ದಿದ್ದಾರೆ. ಬಳಿಕ ಗೂಳಿ ಅಲ್ಲಿಂದ ತೆರಳಿದೆ. ಮಗುವಿನ ಕೂಗಾಟ ಕೇಳಿ ಸ್ಥಳೀಯರು ಕೂಡ ಹೊರಗೆ ಬಂದಿದ್ದು, ಗೂಳಿಯನ್ನು ಓಡಿಸಿದ್ದಾರೆ.
ಬೀದಿ ದನಗಳ ನಿಯಂತ್ರಣದ ಬಗ್ಗೆ ಮತ್ತೆ ಚರ್ಚೆ
ಸಮಾಜವಾದಿ ಪಕ್ಷದ ಸೆಲ್‌ವೊಂದು ಈ ವಿಡಿಯೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದೆ. ಬೀದಿ ದನಗಳಿಂದ ಸಾರ್ವಜನಿಕರಿಗೆ ಎದುರಾಗುತ್ತಿರುವ ಅಪಾಯ ಮತ್ತು ಅವುಗಳ ನಿಯಂತ್ರಣದ ವಿಚಾರವಾಗಿ ನಡೆಯುತ್ತಿರುವ ರಾಜಕೀಯ ಚರ್ಚೆಗಳ ನಡುವೆಯೇ ಈ ವಿಡಿಯೊ ಗಮನ ಸೆಳೆದಿದೆ.