ಬಲರಾಂಪುರ (ಉತ್ತರ ಪ್ರದೇಶ): ಉತ್ತರ ಪ್ರದೇಶದ ಬಲರಾಂಪುರ ಜಿಲ್ಲೆಯ ಕೊತ್ವಾಲಿ ದೇಹತ್ ಪೊಲೀಸ್ ಠಾಣಾ ವ್ಯಾಪ್ತಿಯ ಚರನಗಹಿಯಾ-ಬೆಳ್ಹಾ ಗ್ರಾಮದಲ್ಲಿ ಭಾನುವಾರ ಮಧ್ಯರಾತ್ರಿ ದುರ್ಗಾ ಪೂಜಾ ಮಂಟಪದ (ಪಂಡಾಲ್) ಹೊರಗೆ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಮೂವರು ಗ್ರಾಮಸ್ಥರು ಸಾವನ್ನಪ್ಪಿದ್ದು, ನಾಲ್ವರು ತೀವ್ರವಾಗಿ ಗಾಯಗೊಂಡಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:

ಅಪಘಾತ ಸಂಭವಿಸಿದ್ದು ಹೇಗೆ?

ಶನಿವಾರ ರಾತ್ರಿ ಸುಮಾರು 11 ರಿಂದ 12 ಗಂಟೆಯ ಅವಧಿಯಲ್ಲಿ ಸ್ಥಳೀಯ ದುರ್ಗಾ ದೇವಿ ಮಂಟಪದಲ್ಲಿ ಮಹಾಮಂಗಳಾರತಿ ಮುಗಿದಿತ್ತು. ಆರತಿ ಮುಗಿದ ಬಳಿಕ ಗ್ರಾಮಸ್ಥರು ಮಂಟಪದ ಪಕ್ಕದಲ್ಲೇ ರಸ್ತೆ ಬದಿಯ ಟೆಂಟ್‌ವೊಂದರಲ್ಲಿ ಪ್ರೊಜೆಕ್ಟರ್ ಮತ್ತು ಪರದೆ ಅಳವಡಿಸಿ ಧಾರ್ಮಿಕ ವಿಡಿಯೋಗಳನ್ನು ವೀಕ್ಷಿಸುತ್ತಿದ್ದರು. ಈ ಸಮಯದಲ್ಲಿ ಗೌರಾ ಚೌರಾಹಾ ಕಡೆಯಿಂದ ಬಂದ ಅತ್ಯಂತ ವೇಗದ ಫೋರ್ಡ್ ಕಾರು (UP 32 K 2425) ಚಾಲಕನ ನಿಯಂತ್ರಣ ತಪ್ಪಿ ನೇರವಾಗಿ ಟೆಂಟ್‌ಗೆ ನುಗ್ಗಿ, ಅಲ್ಲಿ ಕುಳಿತಿದ್ದವರ ಮೇಲೆ ಹರಿದು ಬಳಿಕ ಗೋಡೆಗೆ ಡಿಕ್ಕಿ ಹೊಡೆದಿದೆ. ಇನ್ನು, ಅಪಘಾತದ ತೀವ್ರತೆಗೆ ಒಂದೇ ಗ್ರಾಮದ ಪಾಟ್ಶ್ವರಿ ಪ್ರಸಾದ್ ಅಲಿಯಾಸ್ ಮಹತಾ ಪ್ರಸಾದ್ (42), ಮನೋಜ್ ಸಿಂಗ್ (51), ಮತ್ತು ಗಣೇಶ್ ಪಾಂಡೆ (45) ಎಂಬ ಮೂವರು ಸ್ಥಳದಲ್ಲೇ ದಾರುಣವಾಗಿ ಮೃತಪಟ್ಟಿದ್ದಾರೆ. ಇನ್ನು, ಘಟನೆಯಲ್ಲಿ ಛೇದಿರಾಮ್ (50), ಘೋಷ್‌ರಾಮ್ (31), ಡಬ್ಲ್ಯೂ (37) ಮತ್ತು ಮುಕೇಶ್ ತಿವಾರಿ (30) ಎಂಬ ನಾಲ್ವರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಮುಂದುವರೆದು, ಅಪಘಾತದ ತಕ್ಷಣವೇ ಸ್ಥಳದಲ್ಲಿ ಭಾರಿ ಆಕ್ರೋಶ ಮತ್ತು ಚೀರಾಟ ಉಂಟಾಯಿತು. ಮಾಹಿತಿ ತಿಳಿದು ಸ್ಥಳಕ್ಕೆ ಧಾವಿಸಿದ ಪೊಲೀಸರು ಸಾರ್ವಜನಿಕರ ಸಹಾಯದಿಂದ ಗಾಯಾಳುಗಳನ್ನು ಜಿಲ್ಲಾ ಮೆಮೋರಿಯಲ್ ಆಸ್ಪತ್ರೆಗೆ ದಾಖಲಿಸಿದರು. ಆದರೆ, ಇವರಲ್ಲಿ ಇಬ್ಬರ ಸ್ಥಿತಿ ಅತ್ಯಂತ ಚಿಂತಾಜನಕವಾಗಿದ್ದರಿಂದ ಅವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಬಹ್ರೈಚ್‌ನ ಹೈಯರ್ ಮೆಡಿಕಲ್ ಸೆಂಟರ್‌ಗೆ ದಾಖಲಿಸಲಾಗಿದೆ. ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದೆ.

ಚಾಲಕನ ಬಂಧನ

ಅಪಘಾತದ ತಕ್ಷಣ ಚಾಲಕ ಕಾರಿನೊಂದಿಗೆ ಸ್ಥಳದಿಂದ ಪರಾರಿಯಾಗಿದ್ದರೂ, ತನಿಖೆ ಕೈಗೆತ್ತಿಕೊಂಡ ಪೊಲೀಸರು ಕಾರ್ಯಾಚರಣೆ ನಡೆಸಿ ಕೇವಲ ಒಂದು ಗಂಟೆಯೊಳಗೆ ಮದ್ಯಪಾನ ಮಾಡಿದ್ದ ಚಾಲಕನನ್ನು ಕಾರು ಸಮೇತ ವಶಕ್ಕೆ ಪಡೆದಿದ್ದಾರೆ.