ಶಿಲ್ಲಾಂಗ್ (ಮೇಘಾಲಯ): ತೃಣಮೂಲ ಕಾಂಗ್ರೆಸ್ ಪಕ್ಷದ ನಂತರ ಮತ್ತೊಂದು ಪ್ರಾದೇಶಿಕ ಪಕ್ಷದಲ್ಲಿ ಭರ್ಜರಿ ಸರ್ಜರಿ ಮಾಡಿರುವ ಭಾರತೀಯ ಜನತಾ ಪಾರ್ಟಿ (BJP), ಮೇಘಾಲಯದ ಪ್ರಮುಖ ಪ್ರಾದೇಶಿಕ ಪಕ್ಷವಾದ ಯುನೈಟೆಡ್ ಡೆಮಾಕ್ರಟಿಕ್ ಪಾರ್ಟಿಯ (UDP) ಎಂಟು ಶಾಸಕರನ್ನು ತನ್ನತ್ತ ಸೆಳೆದುಕೊಂಡಿದ್ದು, ಕೇಂದ್ರ ಸಚಿವ ಕಿರಣ್ ರಿಜಿಜು ಹಾಗೂ ಬಿಜೆಪಿ ವಕ್ತಾರ ಸಂಬಿತ್ ಪಾತ್ರ ಸಮ್ಮುಖದಲ್ಲಿ BJP ಸೇರ್ಪಡೆಯಾಗಿದ್ದಾರೆ. ಈ ಮೂಲಕ 60 ಸದಸ್ಯರ ಮೇಘಾಲಯ ವಿಧಾನಸಭೆಯಲ್ಲಿ ಬಿಜೆಪಿಯ ಶಾಸಕರ ಸಂಖ್ಯೆ 2 ರಿಂದ 10 ಕ್ಕೆ ಏರಿಕೆಯಾಗಿದೆ. ಆ ಕುರಿತ ವರದಿ ಇಲ್ಲಿದೆ:

MDA ಮೈತ್ರಿಕೂಟದಲ್ಲಿ ಬದಲಾವಣೆ

ಮುಖ್ಯಮಂತ್ರಿ ಕಾನ್ರಾಡ್ ಸಂಗ್ಮಾ ನೇತೃತ್ವದ ನ್ಯಾಷನಲ್ ಪೀಪಲ್ಸ್ ಪಾರ್ಟಿ (NPP) ಬೆಂಬಲಿಸುವ ಆಡಳಿತಾರೂಢ ಮೇಘಾಲಯ ಡೆಮಾಕ್ರಟಿಕ್ ಅಲಯನ್ಸ್ (MDA)ನಲ್ಲಿ UDP ಮತ್ತು BJP ಎರಡೂ ಕೂಡ ಭಾಗವಾಗಿದ್ದವು. ಈ ಪೈಕಿ, ವಿಧಾನಸಭೆಯಲ್ಲಿ 12 ಸ್ಥಾನಗಳನ್ನು ಹೊಂದಿದ್ದ UDP ರಾಜ್ಯದ ಅತಿ ದೊಡ್ಡ ಪ್ರಾದೇಶಿಕ ಪಕ್ಷವಾಗಿತ್ತು. ಆದರೆ, ಪಕ್ಷದ 12 ಶಾಸಕರ ಪೈಕಿ 8 ಶಾಸಕರು BJP ಸೇರ್ಪಡೆಯಾಗಿರುವುದರಿಂದ ಸದನದಲ್ಲಿ ಬಿಜೆಪಿಯ ಸಂಖ್ಯಾಬಲ ಈಗ 10 ಕ್ಕೆ ಏರಿಕೆಯಾಗಿದ್ದು, ಈ ಮೂಲಕ ರಾಜ್ಯ ವಿಧಾನಸಭೆಯಲ್ಲಿ ಎರಡನೇ ಅತಿ ದೊಡ್ಡ ರಾಜಕೀಯ ಪಕ್ಷವಾಗಿ ಹೊರಹೊಮ್ಮಿದೆ.

ಬಿಜೆಪಿ ಸೇರಿದ ಶಾಸಕರು ಯಾರು?

ಯುಡಿಪಿಯ ಒಟ್ಟು 12 ಶಾಸಕರಲ್ಲಿ 8 ಮಂದಿ ಪಕ್ಷಾಂತರ ಮಾಡಿದ್ದು, ಲಹ್ಕ್ಮೆನ್ ರಿಂಬುಯಿ, ಲೂಯಿಸ್ ಮಾರ್ವೀನ್, ಕೈರ್ಮೆನ್ ಶಿಲ್ಲಾ, ಮೇರಾಲ್ಬೋರ್ನ್ ಸೈಯೆಮ್, ಮ್ಯಾಥ್ಯೂ ಕುರ್ಬಾ, ಒಲನ್ ಸಿಂಗ್ ಸುಯಿನ್, ಬಾಲಾಜೀದ್ ಕುಪರ್ ಸಿನ್ರೆಮ್ ಮತ್ತು ಸೈಂಶರ್ ಕುಪರ್ ರಾಯ್ ಲಿಂಗ್ಡೋ ಥಾಬಾ ಕೇಸರಿ ಪಡಿಗೆ ಸೇರ್ಪಡೆಗೊಂಡ ನಾಯಕರಾಗಿದ್ದಾರೆ.

ಹಾಗಾದ್ರೆ, ಪಕ್ಷಾಂತರಕ್ಕೆ ಪ್ರಮುಖ ಕಾರಣಗಳೇನು?

ಬಿಜೆಪಿ ಸೇರಿದ ಬಳಿಕ ಮಾತನಾಡಿದ ಹಿರಿಯ ನಾಯಕ ಲಹ್ಕ್ಮೆನ್ ರಿಂಬುಯಿ, ಪ್ರಧಾನಿ ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ಈಶಾನ್ಯ ರಾಜ್ಯಗಳಲ್ಲಿ ಆಗುತ್ತಿರುವ ಅಭಿವೃದ್ಧಿ ತಮಗೆ ಪ್ರೇರಣೆಯಾಗಿದೆ ಎಂದಿದ್ದಾರೆ. ಜೊತೆಗೆ, ಮೇಘಾಲಯದ 4 ಪ್ರಮುಖ ಬೇಡಿಕೆಗಳಾದ ಸಂವಿಧಾನದ 8 ನೇ ಅನುಸೂಚಿಗೆ ಖಾಸಿ ಮತ್ತು ಗಾರೊ ಭಾಷೆಗಳನ್ನು ಸೇರ್ಪಡೆ, ಮೇಘಾಲಯದ ಕಲ್ಲಿದ್ದಲು ಗಣಿಗಾರಿಕೆ ಸಮಸ್ಯೆಗೆ ಪರಿಹಾರ, ಮೇಘಾಲಯ ನಿವಾಸಿಗಳ ಸುರಕ್ಷತೆ ಮತ್ತು ಭದ್ರತಾ ಕಾಯ್ದೆ (MRSSA) ತಿದ್ದುಪಡಿ ಹಾಗೂ ಹರಿಜನ್ ಕಾಲೋನಿ ಸ್ಥಳಾಂತರ ಪ್ರಕ್ರಿಯೆ ಚುರುಕುಗೊಳಿಸುವುದಕ್ಕೆ ಕೇಂದ್ರ ನಾಯಕರು ಭರವಸೆ ನೀಡಿದ್ದರಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.

ಪ್ರಾದೇಶಿಕ ಮಂಡಳಿ ಮೇಲಿನ ಪ್ರಭಾವ

ಮುಂದುವರೆದು, ಈ 8 ಶಾಸಕರ ಪಕ್ಷಾಂತರದಿಂದ ಸ್ಥಳೀಯ ಆಡಳಿತದ ಮೇಲೂ ನೇರ ಪರಿಣಾಮ ಬೀರಿದೆ. ಅದರಂತೆ, ಪಕ್ಷಾಂತರ ಮಾಡಿದ ಶಾಸಕರ ಪೈಕಿ ಸನ್ಶಾರ್ ಕುಪಾರ್ ರಾಯ್ ಲಿಂಗ್ಡೋ ಥಾಬಾ ಮತ್ತು ಪಯಸ್ ಮಾರ್ವೀನ್ ಅವರು ಖಾಸಿ ಹಿಲ್ಸ್ ಸ್ವಾಯತ್ತ ಜಿಲ್ಲಾ ಮಂಡಳಿಯ ಸದಸ್ಯರಾಗಿಯೂ ಇದ್ದಾರೆ. ಇವರ ಪಕ್ಷಾಂತರದಿಂದಾಗಿ 8 ವರ್ಷಗಳ ನಂತರ ಬಿಜೆಪಿ ಮತ್ತೆ ಈ ಪ್ರಾದೇಶಿಕ ಮಂಡಳಿಯನ್ನು ಪ್ರವೇಶಿಸಿದೆ. ಇದರಿಂದ 29 ಸದಸ್ಯರ ಮಂಡಳಿಯಲ್ಲಿ ಯುಡಿಪಿಯ ಪ್ರಭಾವ ಭಾರಿ ಪ್ರಮಾಣದಲ್ಲಿ ಕುಸಿದಿದೆ.

ಏತನ್ಮಧ್ಯೆ, ಖ್ಲೀಹ್ರಿಯಾಟ್ ಕ್ಷೇತ್ರದ ಶಾಸಕ ಕ್ಯರ್ಮೆನ್ ಶಿಲ್ಲಾ ಅವರ ಹೇಳಿಕೆಯ ಪ್ರಕಾರ, 2028ರ ಮೇಘಾಲಯ ವಿಧಾನಸಭಾ ಚುನಾವಣೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಈ ಕಾರ್ಯತಂತ್ರದ ಹೆಜ್ಜೆಯನ್ನು ಇಡಲಾಗಿದೆ. ರಾಜ್ಯದ ದೀರ್ಘಕಾಲದ ಪ್ರಾದೇಶಿಕ ಬೇಡಿಕೆಗಳನ್ನು ಈಡೇರಿಸುವ ಕುರಿತು ಕೇಂದ್ರ ಬಿಜೆಪಿ ನಾಯಕತ್ವದಿಂದ ಭರವಸೆ ಪಡೆದ ನಂತರವೇ ಶಾಸಕರು ಈ ನಿರ್ಧಾರ ಕೈಗೊಂಡಿದ್ದಾರೆ.