ಬೆಂಗಳೂರು: ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ರಾಜ್ಯ ಪ್ರವಾಸ ಜನತೆಗೆ ಉತ್ತಮ ಮನರಂಜನೆಯಾಗಿದೆ ಎಂದು ಕೇಂದ್ರ ಸಚಿವ ಅನಂತ್ ಕುಮಾರ್ ಹೆಗಡೆ ಬುಧವಾರ ಹೇಳಿದ್ದಾರೆ. 

ಉತ್ತರ ಕನ್ನಡ ಜಿಲ್ಲೆಯ ಶಿರಸಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿರುವ ಅವರು, ರಾಜ್ಯಕ್ಕೆ ರಾಹುಲ್ ಗಾಂಧಿಯವರು ಎಷ್ಟು ಬಾರಿ ಬೇಕಾದರೂ ಬರಲಿ. ಅದು ಉತ್ತಮವಾಗಿರುತ್ತದೆ. ಏಕೆಂದರೆ, ಕರ್ನಾಟಕ ರಾಜ್ಯ ಜನತೆಗೆ ಇದೊಂದು ಉತ್ತಮ ಮನರಂಜನೆಯಾಗಿರುತ್ತದೆ. ಇದರೊಂದಿಗೆ, ಕರ್ನಾಟಕದಲ್ಲಿರುವ ಬಿಜೆಪಿ ಮತ್ತಷ್ಟು ಶಕ್ತಿಶಾಲಿಯಾಗಲು ಅವಕಾಶ ಸಿಕ್ಕಂತಾಗುತ್ತದೆ ಎಂದು ಹೇಳಿದ್ದಾರೆ. 

ಕರ್ನಾಟಕದ ಜನತೆ ಹೆಚ್ಚೆಚ್ಚು ಮನರಂಜನಾ ಕಾರ್ಯಕ್ರಮಗಳನ್ನು ಬಯಸುತ್ತಾರೆಂದು ರಾಹುಲ್ ಪ್ರವಾಸದ ಕುರಿತು ವ್ಯಂಗ್ಯವಾಡಿದ್ದಾರೆ. 

ಇತ್ತೀಚೆಗೆ ಕೋಟಾ ಹಿಂದುತ್ವವಾದಿಗಳು ಹುಟ್ಟಿಕೊಳ್ಳುತ್ತಿದ್ದಾರೆ. ಕೋಟಾ ಹಿಂದುತ್ವವಾದಿಯೇ ಆಗಲಿ, ರಾಷ್ಟ್ರೀಯತೆ ಮರೆಯುತ್ತಿರುವ ಹೊತ್ತಿನಲ್ಲಾದರೂ ರಾಹುಲ್ ಗಾಂಧಿ ಹಾಗೂ ಸಿದ್ದರಾಮಯ್ಯ ಅವರಿಗೆ ತಾವು ಹಿಂದುಗಳು ಎಂಬುದನ್ನು ನೆನಪಿಸಿಕೊಳ್ಳುತ್ತಿದ್ದಾರೆ. ಇದು ಕೊಂಚ ಮಟ್ಟಿಗಾದರೂ ಸಂಸತವನ್ನು ತಂದಿದೆ ಎಂದಿದ್ದಾರೆ. 

ರಾಹುಲ್ ಹಾಗೂ ಸಿದ್ದರಾಮಯ್ಯ ಅವರಿಗೆ ಕೇವಲ ಹಿಂದುತ್ವ ನೆನಪಾದರೆ ಸಾಲದು, ಬಾಯಲ್ಲಿ ಹೇಳಿದರೆ ಸಾಲದು ಆಚರಣೆಗೆ ತರಬೇಕು. ಹಾಗಾದರೆ ಮಾತ್ರ ನಿಮ್ಮ ರಕ್ತಕ್ಕೆ ನೀವು ಗೌರವ ಕೊಡುತ್ತಿದ್ದೀರಿ ಎಂದಾಗುತ್ತದೆ ಎಂದು ತಿಳಿಸಿದ್ದಾರೆ.