ಬೆಂಗಳೂರು: ತನ್ನ ರಾಷ್ಟ್ರೀಯ ಪ್ರಚಾರದ ಭಾಗವಾಗಿ ಯುವ ಮತದಾರರನ್ನು ಸೆಳೆಯುವ ಪ್ರಬಲ ಪ್ರಯತ್ನದಲ್ಲಿ, ರಾಜ್ಯ ಬಿಜೆಪಿ ಶುಕ್ರವಾರ ಬಿಜೆಪಿ ಯುವ ಮೋರ್ಚಾ ರಾಷ್ಟ್ರೀಯ ಅಧ್ಯಕ್ಷ ತೇಜಸ್ವಿ ಸೂರ್ಯ ನೇತೃತ್ವದ ಐದು ಸದಸ್ಯರ ಸಮಿತಿಯನ್ನು ಪ್ರಕಟಿಸಿದೆ. 
2024ರ ಲೋಕಸಭಾ ಚುನಾವಣೆಗೆ ಮುನ್ನ 'ನನ್ನ ದೇಶಕ್ಕಾಗಿ ನನ್ನ ಮತ','ಮೋದಿಗೆ ಮತ್ತೊಮ್ಮೆ ಮತ ನೀಡಿ' ಮತ್ತು 'ಮೋದಿಗಾಗಿ ನಾವು' ಎನ್ನುವ ಘೋಷಣೆ ಅಡಿಯಲ್ಲಿ ಇದು ವಿವಿಧ ಪ್ರಚಾರ ಅಭಿಯಾನಗಳನ್ನು ಕೈಗೊಳ್ಳಲಿದೆ.

ಸಮಿತಿ ರಚನೆಯನ್ನು ಪ್ರಕಟಿಸಿದ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಸುದ್ದಿಗಾರರೊಂದಿಗೆ ಮಾತನಾಡಿ, 'ನನ್ನ ದೇಶಕ್ಕಾಗಿ ನನ್ನ ಮತ' ಎಂಬ ಮೊದಲ ಅಭಿಯಾನವನ್ನು ಸೆಪ್ಟೆಂಬರ್ 1 ರಿಂದ 10ರ ನಡುವೆ ಪ್ರಾರಂಭಿಸಲಾಗುವುದು ಮತ್ತು 'ವೀ ಆರ್ ಫಾರ್ ಮೋದಿ' ಅಡಿಯಲ್ಲಿ ಸೆಪ್ಟೆಂಬರ್ 1 ರಿಂದ 10 ರ ನಡುವೆ ಪಕ್ಷವು ಮನೆ ಮನೆಗೆ ಪ್ರಚಾರವನ್ನು ಪ್ರಾರಂಭಿಸುತ್ತದೆ. ಅಂತಿಮವಾಗಿ ಸೆಪ್ಟೆಂಬರ್ 17ರಂದು (ಮೋದಿ ಅವರ ಜನ್ಮದಿನದಂದು), ರಾಜ್ಯದಲ್ಲಿ ಮತದಾರರನ್ನು ವಿಶೇಷವಾಗಿ ಯುವಕರನ್ನು ಸೆಳೆಯಲು 'ವೋಟ್ ಫಾರ್ ಮೋದಿ ಎಗೇನ್' ಅಭಿಯಾನವನ್ನು ಪ್ರಾರಂಭಿಸಲಾಗುವುದು ಎಂದು ಹೇಳಿದರು.

ತೇಜಸ್ವಿ ಸೂರ್ಯ ನೇತೃತ್ವದ ಐದು ಸದಸ್ಯರ ಸಮಿತಿಯಲ್ಲಿ ಹುಬ್ಬಳ್ಳಿ-ಧಾರವಾಡ (ಪಶ್ಚಿಮ) ಶಾಸಕ ಅರವಿಂದ ಬೆಲ್ಲದ್, ಕುಡಚಿ ಮಾಜಿ ಶಾಸಕ ಪಿ ರಾಜೀವ್ ಮತ್ತು ಬಿಜೆಪಿ ಮುಖಂಡರಾದ ವಿವೇಕರೆಡ್ಡಿ ಮತ್ತು ಲೋಕೇಶ್ ಬಿಜ್ಜವರ ಇರುತ್ತಾರೆ ಎಂದು ಅವರು ಹೇಳಿದರು.

ರಾಜ್ಯದಲ್ಲಿ ಯುವ ಮತದಾರರನ್ನು ಆಕ್ರಮಣಕಾರಿಯಾಗಿ ಚುನಾವಣೆಗಳಲ್ಲಿ ಪಾಲ್ಗೊಳ್ಳುವಂತೆ ಪ್ರೇರೇಪಿಸುವ ಸಲುವಾಗಿ ಜಿಲ್ಲೆಗಳಲ್ಲಿ ಮತ್ತು ಪ್ರತಿ ವಿಧಾನಸಭಾ ಕ್ಷೇತ್ರಗಳಲ್ಲಿ ತಲಾ ಮೂರು ಸದಸ್ಯರನ್ನು ಒಳಗೊಂಡಂತೆ ಸಮಿತಿಗಳನ್ನು ರಚಿಸಲು ಪಕ್ಷವು ಉದ್ದೇಶಿಸಿದೆ ಎಂದು ಅವರು ಹೇಳಿದರು.