ಸ್ಟಿಂಗ್ ಆಪರೇಷನ್ ಚರ್ಚೆ ರಾಜ್ಯ ರಾಜಕಾರಣದಲ್ಲಿ ಬಿಸಿಬಿಸಿ ಚರ್ಚೆಯಾಗುತ್ತಿರುವಾಗಲೇ ಮಾಜಿ ಸಿಎಂ ಸಿದ್ದರಾಮಯ್ಯ ಅವರನ್ನು ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ನಿನ್ನೆ ಶುಕ್ರವಾರ ಅವರ ಮೈಸೂರು ನಿವಾಸದಲ್ಲಿ ಭೇಟಿ ಮಾಡಿ ಚರ್ಚೆ ನಡೆಸಿದ್ದಾರೆ.

ಮೈಸೂರಿನ ಸಿದ್ದರಾಮಯ್ಯ ನಿವಾಸದಲ್ಲಿ ಭೇಟಿಯಾಗಿ ಸುಮಾರು 30 ನಿಮಿಷ ಚರ್ಚೆ ನಡೆಸಿದ್ದಾರೆ.‌ ಸ್ಟಿಂಗ್ ವಿಚಾರದ ತನಿಖೆ ಸೇರಿದಂತೆ ಹಲವು ವಿಚಾರಗಳ ಬಗ್ಗೆ ಚರ್ಚೆ ನಡೆಸಿದ್ದಾರೆ ಎನ್ನಲಾಗಿದೆ.

‘ಸ್ಟಿಂಗ್ ಕಾರ್ಯಾಚರಣೆ’ ವಿಚಾರದ ಕುರಿತ ಚರ್ಚೆ ಗಳು ರಾಜ್ಯ ರಾಜಕಾರಣದಲ್ಲಿ ತೀವ್ರಗೊಂಡಿರುವ ಸಂದರ್ಭದಲ್ಲಿ ಈ ಭೇಟಿಗೆ ಮಹತ್ವ ಬಂದಿದೆ.

‘ನಮ್ಮ ನಾಯಕರಾದ ಸಿದ್ದರಾಮಯ್ಯ ಅವರು ಹಿರಿಯರು, ಅವರ ಆಶೀರ್ವಾದ ಪಡೆಯಲೆಂದು ಬಂದಿದ್ದೆ’ ಎಂದಷ್ಟೇ ಹೊರಗೆ ನಿಂತಿದ್ದ ಮಾಧ್ಯಮ ಪ್ರತಿನಿಧಿಗಳಿಗೆ ಪ್ರಿಯಾಂಕ್ ಪ್ರತಿಕ್ರಿಯಿಸಿದರು. ಶಾಸಕ ಕೆ.ಹರೀಶ್ ಗೌಡ ಜೊತೆಗಿದ್ದರು.

‘ನನ್ನ ವಿರುದ್ಧ ಮಾತನಾಡುತ್ತಿರುವ ಕುಮಾರಸ್ವಾಮಿ ಅವರ ಮನಃ ಸ್ಥಿತಿಯನ್ನು ತೋರಿಸುತ್ತಿದೆ. ಅದರಿಂದ ನನಗೇನೂ ಪರಿಣಾಮ ಆಗುವುದಿಲ್ಲ. ದಲಿತನೊಬ್ಬ ಐಟಿ ಸಚಿವ ಆಗಬಾರದಾ? ಗೃಹ ಸಚಿವ ಆಗಬಾರದಾ? ಸೂಟ್ ಹಾಕಿಕೊಳ್ಳಬಾರದಾ? ವಿದೇಶಕ್ಕೆ ಹೋಗಿ ರಾಜ್ಯಕ್ಕೆ ಹೂಡಿಕೆ ತರಬಾರದಾ?’ ಎಂದು ಪ್ರಶ್ನಿಸಿದರು.